សៀមរាប៖ អាជ្ញាធរខេត្តសៀមរាប ឱ្យដឹងថា ទឹកជំនន់ដោយសារភ្លៀងធ្លាក់ខ្លាំងរហូតមកដល់ពេលនេះ បានធ្វើឱ្យខូចខាតដំណាំស្រូវនិងដំឡូងមីចំនួនជិត៤ម៉ឺនហិកតា ព្រមទាំងធ្វើឱ្យប្រជាពលរដ្ឋចំនួនជាង២៥.០០០គ្រួសារ ទទួលរងការប៉ះពាល់។
![](https://cambodiaflashnews.com/wp-content/uploads/2021/06/top-banner.gif)
រដ្ឋបាលសាលាខេត្តសៀមរាប ឱ្យដឹងថា គ្រោះធម្មជាតិនេះ បានបង្កឱ្យមានការប៉ះពាល់ និងការខូចខាតដំណាំស្រូវទំហំដី៣២.៦៥៣ហិកតា ដែលជារបស់ប្រជាពលរដ្ឋចំនួន២៣.៥៧៨គ្រួសារ ប៉ះពាល់និងខូចខាតដំឡូងមីទំហំដី៤.៦២៦ហិកតា ដែលជារបស់ប្រជាពលរដ្ឋចំនួន៣.៦២៦គ្រួសារ។ ជាមួយគ្នានេះ ទឹកជំនន់ក៏បានធ្វើឱ្យប៉ះពាល់និងបំផ្លាញហេដ្ឋារចនាសម្ព័ន្ធផ្លូវថ្នល់និងសត្វចិញ្ចឹមផងដែរ។
របាយការណ៍របស់គណៈកម្មាធិការគ្រប់គ្រងគ្រោះមហន្ដរាយខេត្ដសៀមរាប ឱ្យដឹងថា គិតចាប់ពីថ្ងៃទី១៧ រហូតដល់ថ្ងៃទី២៨ខែកញ្ញា ឆ្នាំ២០២២ ជំនន់ដោយសារទឹកភ្លៀងក្នុងខេត្តសៀមរាប បណ្តាលឱ្យមានផលប៉ះពាល់ដល់ប្រជាពលរដ្ឋចំនួន ២៥.០៣១គ្រួសារ ប៉ះពាល់ភូមិចំនួន៣១៤ភូមិ ឃុំចំនួន៦១ ក្នុងស្រុកចំនួន៩ រួមមាន ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុកសូទ្រនិគម ស្រុកប្រាសាទបាគង និងស្រុកអង្គរធំ៕