កំពង់ឆ្នាំង៖ ខណៈមានជំនន់ទឹកភ្លៀងលិចនៅតំបន់មួយចំនួននោះមក ផ្ទះប្រជាពលរដ្ឋជិត៧០ខ្នង បានលិចដោយសារទឹកទន្លេឡើងជាបន្តបន្ទាប់នៅស្រុកកំពង់លែង ខេត្តកំពង់ឆ្នាំង។
![](https://cambodiaflashnews.com/wp-content/uploads/2021/06/top-banner.gif)
លោកប៉ាត់ គន មេឃុំផ្លូវទូក ស្រុកកំពង់លែងបានឱ្យដឹងនៅរសៀលថ្ងៃទី២៧ ខែកញ្ញាថា គិតមកដល់ថ្ងៃនេះ ផ្ទះពលរដ្ឋចំនួន៦២ខ្នងក្នុងភូមិពាមខ្នង ឃុំផ្លូវទូក ស្រុកកំពង់លែង ត្រូវបានទឹកទន្លេឡើងជន់លិច។ ខណៈផ្ទះខ្លះត្រូវលិចពាក់កណ្ដាលនិងផ្ទះមួយចំនួនទៀតលិចប្រមាណកន្លះម៉ែត្រ។ករណីគ្រោះធម្មជាតិនេះ ពលរដ្ឋបានលើកធ្នើរក្នុងផ្ទះឱ្យផុតទឹក ដើម្បីស្នាក់នៅជាបណ្ដោះអាសន្នដោយស្ថិតក្នុងសភាពប្រឈមបំផុត។
លោកមេឃុំបានបន្តថា ទឹកទន្លេពេលនេះនៅបន្តឡើងជារៀងរាល់ថ្ងៃនៅឡើយ។តែបើទឹកនៅបន្តឡើងខ្លាំងទៀតនោះ ពលរដ្ឋរងគ្រោះអាចនឹងត្រូវជម្លៀសចេញទៅរកទីទួលសុវត្ថិភាពជាពុំខាន។សម្រាប់នៅទីនោះគឺមានតែវត្តថ្នល់ឈើទាលមួយប៉ុណ្ណោះដែលខ្ពស់បន្តិច។ពាក់ព័ន្ធករណីខាងលើ អភិបាលខេត្តកំពង់ឆ្នាំង បានចាត់ឱ្យក្រុមការងារចុះទៅពិនិត្យមើលជាបន្ទាន់ដើម្បីដោះស្រាយតាមសភាពការណ៍ជាក់ស្ដែង៕
ដោយ៖វិចិត្រ