សៀមរាប៖ រដ្ឋមន្ត្រីសេដ្ឋកិច្ចអាស៊ាន និងអង្គការកម្មសិទ្ធិបញ្ញាពិភពលោកនាថ្ងៃទី១៥ខែកញ្ញា បានធ្វើការពិភាក្សាពីការផ្តល់ជំនួយបច្ចេកទេសនិងការបន្តកិច្ចសហប្រតិបត្តិការ ដល់បណ្តាប្រទេសអាស៊ាន និងបញ្ហាមួយចំនួនពាក់ព័ន្ធនឹងការជួយលើកកម្ពស់សមត្ថភាព របស់សហគ្រាសធុនតូចនិងមធ្យមដើម្បីជំរុញឱ្យសហគ្រាសធុនតូចនិងមធ្យមប្រើប្រាស់កម្មសិទ្ធិបញ្ញា ជំរុញការធ្វើអាជីវកម្មឱ្យកាន់តែរីកចម្រើន។
ក្នុងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម បានថ្លែងក្នុងសន្និសីទសារព័ត៌មានថា ក្នុងកិច្ចពិភាក្សានេះ បានជំរុញនិងលើកទឹកចិត្តដល់ការប្រើប្រាស់កម្មសិទ្ធិបញ្ញាជាលក្ខណៈពាណិជ្ជកម្មឱ្យបានពេញលេញ ដែលជំរុញឱ្យសហគ្រាសធុនតូច និងមធ្យម ក៏ដូចជាអ្នកច្នៃប្រឌិតធ្វើយ៉ាងណាប្រើប្រាស់កម្មសិទ្ធិបញ្ញារបស់ខ្លួនជាទ្រព្យក្នុងការជំរុញការធ្វើអាជីវកម្មនិងប្រើប្រាស់កម្មសិទ្ធិបញ្ញានេះឱ្យអស់លទ្ធភាពដើម្បីភាពរីកចម្រើននៃក្រុមហ៊ុនរបស់ខ្លួន។
លោកបានលើកឡើងថាការប្រើប្រាស់កម្មសិទ្ធិបញ្ញាជាលក្ខណៈពាណិជ្ជកម្មនេះនឹងអាចជួយឱ្យមានការទាក់ទាញវិនិយោគដោយផ្ទាល់ថែមទៀតនៅក្នុងបណ្តាប្រទេសអាស៊ានទាំងមូលហើយកិច្ចនេះមានប្រយោជន៍បំផុតសម្រាប់ប្រទេសកម្ពុជាយើង ដោយសារយើងមានកម្មសិទ្ធិបញ្ញាមាំមួន យើងមានច្បាប់គ្រប់គ្រាន់ទាំងច្បាប់ម៉ាក ពាណិជ្ជសញ្ញា និងការប្រកួតប្រជែងមិនស្មោះត្រង់ ច្បាប់សិទ្ធិអ្នកនិពន្ធ និងច្បាប់សិទ្ធិប្រហាក់ប្រហែល៕ដោយៈសិរីមតី