លោក Graham Potter ត្រូវបានតែងតាំងជាអ្នកចាត់ការថ្មីរបស់ក្រុមតោខៀវ Chelsea ក្នុងកិច្ចសន្យារយៈពេល៥ឆ្នាំ កាលពីថ្ងៃព្រហស្បតិ៍ ដើម្បីជំនួសលោក Thomas Tuchel ដែលត្រូវបានបញ្ចប់តួនាតីដ៏គួរឱ្យភ្ញាក់ផ្អើល។
![](https://cambodiaflashnews.com/wp-content/uploads/2021/06/top-banner.gif)
បុរសសញ្ជាតិអង់គ្លេស លោក Potter វ័យ ៤៧ បានចាកចេញពី Brighton ដែលជាក្លិប នៅក្របខ័ណ្ឌ Premier League មួយទៀត ដើម្បីផ្លាស់ទៅទឹកដី Stamford Bridge ដោយក្រោយការសម្រេចយករូបលោកមកដឹកនាំក្រុមនេះ ក្លិប Chelsea បានសរសើរពីភាពវិវឌ្ឍទៅមុខជានិច្ច ក្នុងការប្រកួតប្រជែងបាល់ទាត់ និងការបង្វឹកប្រកបដោយភាពច្នៃប្រឌិត។
គាត់ទទួលបានការកោតសរសើរយ៉ាងខ្លាំង សម្រាប់ការបំពេញតួនាទី នៅឯក្លិប Brighton ដោយបានដឹកនាំក្រុមដែលមានរហស្សនាមថា «Seagulls» (រំពេសមុទ្រ) ឱ្យបញ្ចប់ក្នុងចំណាត់ថ្នាក់លេខ ៦ ក្នុងតារាងលីគកំពូលរបស់អង់គ្លេស កាលពីរដូវកាលមុន ហើយបាននាំពួកគេឡើងទៅកាន់ចំណាត់ថ្នាក់ទី៤ នារដូវកាលនេះ ខណៈដែលគាត់បានទាមទារឱ្យមានការបង្ហាញនូវទម្រង់លេង ប្រកបដោយភាពរីករាយ និងកលល្បិចពីកីឡាកររបសគាត់។
ហ្គេមដំបូងរបស់លោក Potter ក្នុងនាមជាគ្រូបង្វឹករបស់ក្រុមតោខៀវ Chelsea នឹងជាជំនួប រវាងក្រុមនៅទីក្រុងឡុងដ៍ជាមួយគ្នា គឺក្រុម Fulham នៅថ្ងៃសៅរ៍ចុងសប្ដាហ៍នេះ។
«ខ្ញុំមានមោទនភាព និងរំភើបខ្លាំងណាស់ ក្នុងការបានក្លាយជាតំណាងរបស់ក្លិប Chelsea FC។ នេះជាក្លិបបាល់ទាត់ដ៏អស្ចារ្យបំផុត។ ខ្ញុំពិតជារំភើបណាស់ ដែលបានរួមការងារជាមួយក្រុមអ្នកគ្រប់គ្រងថ្មីរបស់ក្លិប Chelsea ហើយមិនអាចទន្ទឹងរង់ចាំបានទៀតទេ ក្នុងការជួប និងធ្វើការជាមួយក្រុមកីឡាករដ៏គួរឱ្យរំភើប ដើម្បីអភិវឌ្ឍក្រុម និងវប្បធម៌ ដែលអ្នកគាំទ្រដ៏អស្ចារ្យរបស់យើងអាចមានមោទនភាពបាន»។ នេះជាសម្ដីរបស់លោក Potter៕