លោក Domenico Tedesco ត្រូវបានបញ្ចប់តួនាទីជាគ្រូបង្វឹកក្នុងក្រុម RB Leipzig របស់អាល្លឺម៉ង់ហើយ កាលពីថ្ងៃពុធ ពោលគឺ ១ថ្ងៃបន្ទាប់ពីការរងបរាជ័យយ៉ាងអាម៉ាស់ ក្នុងលទ្ធផល ៤-១ ដោយសារក្រុម Shakhtar Donetsk របស់អ៊ុយក្រែន ក្នុងការប្រកួតបើកឆាក នៅក្របខ័ណ្ឌ Champions League របស់ពួកគេ។
វាកើតឡើងប៉ុន្មានខែ បន្ទាប់ពីលោក Tedesco បានដឹកនាំក្រុម Leipzig ឱ្យឈ្នះពានរង្វាន់ ក្នុងកម្មវិធី German Cup តែមានការចាប់ផ្តើមដ៏គួរឱ្យបារម្ភក្នុងយុទ្ធនាការ នៅលីគរបស់ពួកគេ ដោយដណ្ដើមបានតែ ៥ពិន្ទុប៉ុណ្ណោះពីការប្រកួតចំនួន ៥លើក ក្នុងក្របខ័ណ្ឌ Bundesliga។
ក្លិបបានបង្ហោះសារនៅលើបណ្ដាញសង្គម Twitter របស់ខ្លួនថា៖ «ក្លិប RB Leipzig បានចែកផ្លូវជាមួយលោក Domenico Tedesco ដោយមានប្រសិទ្ធភាពភ្លាមៗ»។
សូម្បីតែមុនមានការរងភាពអាម៉ាស់នេះ កាលពីថ្ងៃអង្គារ ក៏មានពាក្យចចាមអារ៉ាមថា ក្លិប Leipzig បានមានពាក់ព័ន្ធនឹងអតីតគ្រូបង្វឹករបស់ក្រុម Borussia Dortmund លោក Marco Rose រួចហើយ។ លោក Rose ដែលមានកំណើតនៅក្រុង Leipzig នេះតែម្ដង បានឈ្នះពានរង្វាន់លីគកំពូលរបស់ប្រទេសអូទ្រីសចំនួន ២ដង ជាមួយក្លិប Red Bull Salzburg។
បុរសសញ្ជាតិអ៊ីតាលី លោក Tedesco អាយុ ៣៦ឆ្នាំ ទើបបានចូលកាន់តំណែងកាលពីខែធ្នូមុន នៅពេលដែលក្លិប Leipzig បញ្ចប់តំណែងរបស់គ្រូបង្វឹកសញ្ជាតិអាម៉េរិក លោក Jesse Marsch បន្ទាប់ពីមានលទ្ធផលមិនល្អ ដែលធ្វើឱ្យពួកគេឈរនៅលេខ ១១ ក្នុងតារាងពិន្ទុ ដោយមានគម្លាតដល់ទៅ ៧ពិន្ទុពីការបានសិទ្ធិទៅលេងនៅ Champions League។
នាយកប្រតិបត្តិក្លិប Leipzig លោក Oliver Mintzlaff បាននិយាយកាលពីថ្ងៃពុធថា៖ «ការសម្រេចចិត្តដើម្បីដោះលែងលោក Domenico Tedesco គឺពិបាកណាស់សម្រាប់ពួកយើង។ យើងបានមានពាក់កណ្តាលរដូវកាលដ៏ជោគជ័យជាមួយលោក Domenico កាលពីឆ្នាំមុន។យើងសោកស្តាយ ដែលពេលនេះពួកយើងបែកគ្នា ហើយសូមថ្លែងអំណរគុណយ៉ាងជ្រាលជ្រៅចំពោះលោក Domenico Tedesco និងក្រុមការងាររបស់គាត់ សម្រាប់ការបំពេញតួនាទីបានយ៉ាងល្អ»៕
