ក្លិប Chelsea បានទាក់ទងទៅក្លិបរួមលីគ Brighton ដើម្បីសុំពិភាក្សាជាមួយលោក Graham Potter បន្ទាប់ពីបានបញ្ចប់តួនាទីគ្រូបង្វឹករបស់លោក Thomas Tuchel ក្រោយការរងបរាជ័យក្នុងលទ្ធផល ១-០ កាលពីយប់ថ្ងៃអង្គារ នៅឯទឹកដីរបស់ក្រុម Dinamo Zagreb ក្នុងការប្រកួតនៅក្របខ័ណ្ឌ Champions League។
លោក Potter គឺជាជម្រើសដំបូងរបស់ក្រុមតោខៀវ Chelsea តែលោក Mauricio Pochettino និងលោក Zinedine Zidane ដែលអ្នកទាំង២ នៅទំនេរពីការងារ ក៏ស្ថិតក្នុងបញ្ជីឈ្មោះអ្នកដែលត្រូវមកជំនួសលោក Tuchel ដែរ។ លោក Potter មានតម្លៃផ្ដាច់កុងត្រា ដែលត្រូវបានគេជឿថានឹងថយចុះជារៀងរាល់ឆ្នាំ និងបច្ចុប្បន្នប្រហែលជា ១៦លានផោន (ជាង ១៨លានដុល្លារ)។
ការចាកចេញរបស់លោក Tuchel កើតឡើងបន្ទាប់ពីមានការចាប់ផ្តើមរដូវកាលដ៏គួរខកចិត្ត ដោយក្លិបក៏បានប្រកួតចាញ់ទាំងក្រុម Leeds និង Southampton នៅ Premier League ផង ហើយក៏ត្រៀមនឹងកើតឡើងបន្ទាប់ពីទំនាក់ទំនងរបស់លោក Tuchel ជាមួយម្ចាស់ក្លិបរួម លោក Todd Boehly មានភាពរកាំរកូស ក្នុងអំឡុងពេលទីផ្សារដោះដូរកីឡាកររដូវក្តៅដ៏ច្របូកច្របល់ដោយបញ្ហានេះ រហូតនាំឱ្យអ្នកទាំង ២ ស្ទើរតែឈប់មានការប្រាស្រ័យទាក់ទងគ្នាទៀតផង។
ក្លិប Chelsea បានចំណាយនូវទឹកប្រាក់ជាកំណត់ត្រា ២៦៦លានផោន (៣០៦លានដុល្លារ) ក្នុងទីផ្សារដោះដូរកីឡាករនេះ ដើម្បីនាំយក Wesley Fofana, Marc Cucurella, Raheem Sterling, Kalidou Koulibaly, Carney Chukwuemeka និង Pierre-Emerick Aubameyang ក្នុងចំណោមកីឡាករដទៃផ្សេងទៀត។ នោះបានបង្កើនសម្ពាធលើលោក Tuchel តែមិនមែនការចុះហត្ថលេខាទាំងអស់ ជាការសម្រេចរបស់គាត់នោះទេ ដោយមានករណីជាច្រើនផ្សេងទៀត ដែលម្ចាស់ក្លិប ព្យាយាមយកកីឡាករផ្ទុយពីការចង់បានរបស់គាត់។
ឧទាហរណ៍ជាក់ស្ដែងមួយ គឺករណីរបស់កីឡាករ Anthony Gordon ដែលលោក Tuchel មិនចង់បាន។ អ្នកវិភាគទិន្នន័យរបស់លោក Boehly បានជំរុញឱ្យទិញយកខ្សែបម្រើរបស់ក្លិប Everton រូបនេះ បន្ទាប់ពីមានការចាប់អារម្មណ៍យ៉ាងខ្លាំង ចំពោះទម្រង់លេងខ្លះៗរបស់គេ តែលោក Tuchel មានអារម្មណ៍ថា គាត់មានកីឡាករច្រើនពេកហើយក្នុងតំណែងនេះ ហើយសមត្ថភាពរបស់កីឡាកររូបនោះ នៅមិនទាន់គ្រប់គ្រាន់ឱ្យគាត់អាចពឹងពាក់បាននោះឡើយ៕
