អ្នកចាត់ការក្រុមលោក Jurgen Klopp បាននិយាយថា ក្រុមហង្សក្រហម Liverpool របស់លោក ត្រូវតែសាង ឬពង្រឹងខ្លួនឯងឡើងវិញ បន្ទាប់ពីមានការចាប់ផ្តើមរដូវកាលមិនល្អ ដែលត្រូវមកបូកបន្ថែមទៀតជាមួយនឹងការបរាជ័យ ៤-១ ក្រោមដៃរបស់ក្រុមម្ចាស់ផ្ទះ Napoli ក្នុងការប្រកួតបើកឆាក នៅក្របខ័ណ្ឌ Champions League កាលពីយប់ថ្ងៃពុធ។
![](https://cambodiaflashnews.com/wp-content/uploads/2021/06/top-banner.gif)
ទំហំនៃការបរាជ័យនេះ គឺស្មើនឹងភាពអាក្រក់បំផុតមិនធ្លាប់មានរបស់ក្រុម Liverpool នៅ Champions League ហើយអាចនឹងធ្ងន់ធ្ងរជាងនេះទៅទៀត ប្រសិនបើអ្នកចាំទី Alisson Becker មិនអាចសង្គ្រោះបាល់ប៉េណាល់ទីក្នុងវគ្គទី១ ពីការស៊ុតរបស់កីឡាករ Victor Osimhen ទេនោះ។
កីឡាករ Piotr Zielinski ស៊ុតបញ្ចូលទី ២គ្រាប់ ទាំងវគ្គទី ១ និងទី ២ រួមជាមួយនឹងគ្រាប់បាល់ពីកីឡាករ Andre-Frank Zambo Anguissa និង Giovanni Simeone បានជួយឱ្យក្រុមរបស់អ៊ីតាលីនាំមុខ ៤-០ មុននឹងកីឡាករ Luis Diaz កាត់បន្ថយបាន ១គ្រាប់ នៅដើមវគ្គទី ២ តែយ៉ាងណា ក្រុមរបស់លោក Klopp នៅតែវិលទៅអង់គ្លេសវិញ ជាមួយនឹងការខកចិត្តយ៉ាងធំធេង។
ក្រុមហង្សក្រហមបានឈ្នះតែ ២ប្រកួតប៉ុណ្ណោះ ក្នុងចំណោមហ្គេមបើកឆាកចំនួន ៧លើករបស់ពួកគេ នៅរដូវកាលថ្មីនេះ ហើយកំពុងឈរនៅលេខ ៧ ក្នុងតារាងពិន្ទុរបស់ក្របខ័ណ្ឌ Premier League ដោយមានគម្លាត ៦ពិន្ទុពីក្រោមក្រុមឈរ នៅកំពូលតារាង។
លោក Klopp បានប្រាប់ទៅប្រព័ន្ធផ្សព្វផ្សាយ BT Sport ថា៖ «វាហាក់ដូចជាយើងត្រូវតែប្រឹងប្រែងពង្រឹងខ្លួនឯងឡើងវិញ។ មានការខ្វះខាតនូវចំណុចជាច្រើន។ ផ្នែកដ៏រីករាយ គឺយើងត្រូវសម្រេចវាឱ្យបាននៅពាក់កណ្តាលរដូវកាលនៃ Premier League និងយុទ្ធនាការ នៅ Champions League»។
«ក្នុងរយៈពេល ៣ថ្ងៃ យើងត្រូវប្រកួតជាមួយក្រុម Wolves ហើយនៅពេលដែលពួកគេ បានឃើញការប្រកួតនៅយប់នេះ ពួកគេមិនអាចទប់សំណើចបានទេ ហើយគិតថា នេះជាចង្វាក់ពេលវេលាដ៏ល្អឥតខ្ចោះ សម្រាប់ពួកគេ។ ខ្ញុំគិតថា វាជាពេលវេលាដ៏ល្អឥតខ្ចោះមែន តែយើងត្រូវព្យាយាមស្វែងរកឱ្យឃើញនូវការរៀបចំ ដើម្បីធ្វើឱ្យកាន់តែប្រសើរឡើងគ្រប់យ៉ាង»។ លោក Klopp បានបន្ថែម៕