ភ្នំពេញ៖សាលាអន្តរជាតិ Shrewsbury ភ្នំពេញ បានប្រារព្ធពិធីបើកសម្ពោធជាផ្លូវការនូវសាលារបស់ខ្លួនដែលផ្តោតសំខាន់ទៅលើការអប់រំកុមារតូចៗ នាថ្ងៃទី៦ ខែកញ្ញា ឆ្នាំ២០២២ នៅសណ្ឋាគារ Raffles Hotel Le Royal។ ពិធីនេះប្រព្រឹត្តទៅក្រោមអធិបតីភាពឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា។
ជាកិច្ចចាប់ផ្ដើមនៃពិធីនេះ មានការសម្តែងនូវរបាំជួនពរ ដែលជារបាំប្រពៃណីខ្មែរមួយប្រភេទមានប្រភពមកពីរបាំបុរាណខ្មែរ។របាំជូនពរត្រូវបានគេនិយមធ្វើឡើងក្នុងការប្រារព្ធកម្មវិធីពិសេសណាមួយហើយសាលាក៏បានរៀបចំការសម្តែងនេះដើម្បីសុំសុខភាពល្អ សុភមង្គល ភាពចម្រុងចម្រើន និងជោគជ័យផងដែរ។
កម្មវិធីនេះប្រព្រឹត្តទៅយ៉ាងមហោឡារិក ក្រោមការចូលរួមគាំទ្រពីសំណាក់ឥស្សរជនជាន់ខ្ពស់របស់រាជរដ្ឋាភិបាល និង សាលា Shrewsbury នៃចក្រភពអង់គ្លេសហើយក៏មានការចូលរួមពីសំណាក់លោក Dominic Williams MBE ឯកអគ្គរាជទូតអង់គ្លេសប្រចាំនៅកម្ពុជា បណ្ឌិត Maghin Tamilarasan អភិបាលនៃសាលាអន្តរជាតិ Shrewsbury ដែលមានមូលដ្ឋាននៅចក្រភពអង់គ្លេសនិងជានាយកផ្នែកធុរកិច្ចអន្តរជាតិនៃសម្ព័ន្ធសាលា Shrewsbury លោក Kong Jianming ប្រធានក្រុមហ៊ុន Jovan Group (Cambodia) និងមន្ត្រីជាច្រើនទៀតមកពីសាលាអន្តរជាតិ Shrewsbury ភ្នំពេញ ដោយរួមមាន លោក Charles Wong សហស្ថាបនិក និងជានាយកប្រតិបត្តិ លោក Keith Chan នាយកគ្រប់គ្រងទូទៅ លោក Toby Waterson នាយកស្ថាបនិក និងលោកស្រី Charlotte Thomas – នាយិការងរបស់សាលា។
លោក Charles Wong ដែលជាសហស្ថាបនិក និងជានាយកប្រតិបត្តិសាលាអន្តរជាតិ Shrewsbury ភ្នំពេញ បានលើកឡើងថា“ខ្ញុំមានកិត្តិយសណាស់ ដែលបាននាំយកការអប់រំលំដាប់ពិភពលោកមកកាន់ប្រទេសកម្ពុជា ហើយវាក៏ជាក្តីសង្ឃឹម និងក្តីសុបិនរបស់ខ្ញុំដោយគិតថាថ្ងៃណាមួយមាតាបិតាសិស្សនឹងចងចាំរូបខ្ញុំ ក៏ដូចជាសាលា នូវអ្វីដែលយើងបានរួមចំណែកក្នុងការផ្តល់ជូននូវប្រព័ន្ធអប់រំមួយប្រកបដោយគុណភាពល្អបំផុត។ យ៉ាងណាមិញ ខ្ញុំជឿជាក់យ៉ាងមុតមាំថា ការអប់រំអាចនាំមកនូវការផ្លាស់ប្តូរពិភពលោកឱ្យបានកាន់តែប្រសើរឡើង” ។
លោក Wong បានមានប្រសាសន៍បន្តទៀតថា៖ “ខ្ញុំសន្និដ្ឋានថា ខ្ញុំអាចនាំយកប្រព័ន្ធអប់រំល្អបំផុតរបស់ប្រទេសអង់គ្លេសដែលប្រកបដោយប្រសិទ្ធភាពជាង ៤០០ឆ្នាំ មកកាន់ប្រទេសកម្ពុជា ដោយសារតែខ្ញុំបានចាក់ឬសយ៉ាងជ្រៅក្នុងវិស័យនេះ។ វានឹងផ្សារភ្ជាប់គម្លាតរវាងបទដ្ឋានក្នុងស្រុក និងបទដ្ឋានអន្តរជាតិនៅក្នុងឧស្សាហកម្មអប់រំដែលកំពុងមានស្រាប់” ។
ថ្លែងក្នុងពិធីសម្ពោធសាលាអន្តរជាតិShrewsbury លោក សាន វឌ្ឍនា អនុរដ្ឋលេខាធិការក្រសួងអប់រំយុវជននិងកីឡាបានអបអរសាទរ និងស្វាគមយា់ងកក់ក្តៅចំពោះវត្តមានសាលាដ៏ល្បីមកពីចក្រភពអង់គ្លេស ដែលក្លាយជាផ្នែកមួយនៃប្រព័ន្ធអប់រំនៅកម្ពុជា។លោករំពឹងថា សាលាអន្តរជាតិShrewsbury នឹងជួយលើកកម្ពស់គុណភាពវិស័យអប់រំនៅកម្ពុជា ជាពិសេសការអប់រំកុមារតូច។
ពិធីដាំដើមឈើនៅកម្ពុជារបស់សាលា Shrewsbury បានធ្វើឡើងដោយមានតំណាងពីជួររាជរដ្ឋាភិបាល និង មន្ត្រីរបស់សាលាផ្ទាល់ដោយផ្តើមចេញពីផ្នត់គំនិតនៃដំណើរទស្សនកិច្ចដាំដើមឈើក្នុងសាលារបស់សាលា Shrewsbury នៃចក្រភពអង់គ្លេស។ដើមឈើដែលបានជ្រើសរើសមកដាំមានឈ្មោះថាដើមផ្ការំដួលហើយផ្ការបស់វាគឺជាផ្កាដែលតំណាងឱ្យជាតិខ្មែរ។ ផ្ការបស់វាផ្តល់ក្លិនក្រអូប ជាពិសេសនៅពេលល្ងាចរីឯដើមរបស់វាវិញផ្តល់នូវម្លប់ដល់មនុស្សដែលជ្រកនៅខាងក្រោម។ ដើមឈើតូចដែលកំពុងដាំសម្រាប់អបអរពិធីបើកសម្ពោធសាលាអន្តរជាតិ Shrewsbury ភ្នំពេញ នឹងរីកលូតលាស់ប្រៀបដូចជាការធំធាត់របស់ក្មេង ហើយថ្ងៃណាមួយវានឹងក្លាយជាព្រៃដ៏ធំសម្រាប់មនុស្សជំនាន់ក្រោយនៅរាជធានីភ្នំពេញ។
ព្រឹត្តិការណ៍នេះមានចំណុចពិសេសមួយ គឺការចុះហត្ថលេខាលើអនុស្សរណៈនៃការយោគយល់គ្នារវាងលោក កេត ច័ន្ទ(KeithChan)នាយកគ្រប់គ្រងទូទៅសាលាអន្តរជាតិ Shrewsbury ភ្នំពេញនិងលោក Joe Kwong នាយកគ្រប់គ្រងទូទៅក្រុមហ៊ុន Jovan Group(Cambodia)។នេះជាសមិទ្ធផលដ៏សំខាន់មួយសម្រាប់សាលាព្រោះវាជាការចុះកិច្ចព្រមព្រៀងជាមួយក្រុមហ៊ុនអភិវឌ្ឍន៍ក្នុងការសាងសង់ទីតាំងធំនៃអគារសាលាអន្តរជាតិShrewsbury ភ្នំពេញ ដែលមានទីតាំងនៅជាប់គម្រោងបុរីចូវ៉ាន(Jovan City)ដំណាក់កាលដំបូងស្ថិតលើផ្លូវជាតិលេខ ៦អាក្នុងសង្កាត់ជ្រោយចង្វារ។សាលាលាតសន្ធឹងលើផ្ទៃដី ៧,៥ហិកតា នៃផ្ទៃដីសរុប ១៤០ហិកតាក្នុងបុរីចូវ៉ាន (Jovan City) ហើយនឹងសាងសង់ឡើងសម្រាប់ទទួលសិស្សចំនួន ២,០០០នាក់ នៅអាគារនៃសាលាអប់រំលំដាប់កំពូលរបស់ខ្លួន។
ចុងបញ្ចប់នៃពិធីបើកសម្ពោធនេះ មានការធ្វើសន្និសីទសារព័ត៌មានរបស់មន្ត្រីសាលា និងអ្នកពាក់ព័ន្ធដទៃទៀតដើម្បីផ្តល់ព័ត៌មានលម្អិតសំខាន់ៗអំពីផែនការសម្រាប់សាលាបឋមសិក្សា និងមធ្យមសិក្សា។ហើយក៏មានការបង្ហាញអំពីដំណាក់កាលនៃការសាងសង់សាលាផងដែតាមរយៈចាក់បញ្ចាំងបង្ហាញវីដេអូរបស់ក្រុមហ៊ុនស្ថាបត្យកម្មដែលត្រូវបានការអញ្ជើញឱ្យមកបង្ហាញពីទស្សនាទាគម្រោងប្លង់របស់ពួកគេសម្រាប់ទីតាំងសំខាន់ៗរបស់សាលា។
សាលា Shrewsbury នៃចក្រភពអង់គ្លេសគឺជាសាលាដ៏ធំជាងគេមួយក្នុងចំណោមសាលាសាធារណៈទាំងប្រាំពីរដែលកត់ត្រាទុកជាសាលាសាធារណៈដ៏ល្បីមួយក្នុងឆ្នាំ១៨៦៨ ហើយត្រូវបានទទួលស្គាល់ថាបានប្រើប្រាស់ប្រព័ន្ធអប់រំតាមបែបចក្រភពអង់គ្លេសដែលមានលក្ខណៈពិសេសល្អបំផុត។ សាលានេះមានអតីតនិស្សិតល្បីៗជាច្រើនរូប ហើយក៏មានទាំងធម្មជាតិវិទូដ៏ល្បីល្បាញ គឺលោក Charles Darwin ផងដែរ ។នៅចក្រភពអង់គ្លេស សាលានេះបានឈ្នះពានរង្វាន់សាលាឯករាជ្យល្អបំផុតប្រចាំឆ្នាំ២០២០ ។ សាលាអន្តរជាតិ Shrewsbury ភ្នំពេញត្រូវបានបង្កើតឡើនៅក្នុងអាគារពាណិជ្ជកម្ម Flatiron by Meridian នឹងបើកដំណើការជាផ្លូវការចាប់ពីខែកញ្ញាឆ្នាំ២០២២ក្នុងការផ្តល់ការអប់រំស្តង់ដារអន្តរជាតិដ៏ទំនើបទាន់សម័យដល់កុមារ។ សាលានឹងអនុវត្តន៍តាមកម្មធីសិក្សាពិសេសរបស់ សាលា Shrewsbury នៃចក្រភពអង់គ្លេស តាមបែប Floreatដែលផ្តល់នូវការអប់រំសហកម្មវិធីសិក្សានិងគ្រូបង្គោលដែលពោរពេញដោយចំណេះដឹងខ្ពស់ជាមួយនឹងថ្នាក់រៀនដ៏ទំនើប ការលេងកីឡា ការសម្តែង ការលេងតន្ត្រីនិងសម្ភារទំនើបៗទាន់សម័យ។ ថ្នាក់ភាសាអង់គ្លេស ភាសាខ្មែរ និងភាសាចិន នឹងត្រូវបានផ្តល់ជូនដល់កូនៗរបស់លោកអ្នកផងដែរ៕ដោយៈផាវី