លោក Erik ten Hag បានប្តេជ្ញានឹងផ្តល់ដល់ស៊ុបភើស្តារ Cristiano Ronaldo ទាំងការគាំទ្រ និងពេលវេលាដែលរូបគេត្រូវការ ដើម្បីធ្វើយ៉ាងណាមានលទ្ធភាពរួមជាមួយមិត្តរួមក្រុម Manchester United ដទៃទៀតរបស់ខ្លួន។
កីឡាករ Ronaldo បានអវត្តមានភាគច្រើនក្នុងការប្រកួតត្រៀមរដូវកាល និងបានស្នើសុំចាកចេញពីក្លិបនៅរដូវក្តៅនេះ តែបានក្លាយជាផ្នែកមួយនៃក្រុមទាំង ៦ហ្គេម នៅក្របខ័ណ្ឌ Premier League ក្រោមការដឹកនាំរបស់លោក Ten Hag ដោយបានចូលលេងជាកីឡាករជម្រើសដំបូង ១ដង និងជាកីឡាករបម្រុង ៥ដង។
ដោយទីផ្សារដោះដូរកីឡាករនាពេលនេះ ត្រូវបានបិទហើយ ហើយកីឡាករ Ronaldo ត្រូវបង្ខំចិត្តឱ្យរក្សាការផ្តោតអារម្មណ៍របស់ខ្លួនតែជាមួយក្រុម Man United នោះ លោក Ten Hag បានប្តេជ្ញាថា នឹងធ្វើអ្វីដែលគាត់អាចធ្វើទៅបាន ដើម្បីជួយឱ្យកីឡាករវ័យ ៣៧ឆ្នាំរូបនេះ ត្រឡប់មករកទម្រង់ល្អបំផុតរបស់ខ្លួនវិញ។
លោក Ten Hag បាននិយាយមុនការទទួលបានជ័យជម្នះ ៣-១ លើក្រុមកាំភ្លើងធំ Arsenal កាលពីថ្ងៃអាទិត្យថា៖ «ខ្ញុំនឹងក្លាយជាមិត្តរបស់គេ ហើយពេលខ្លះខ្ញុំនឹងក្លាយជាគ្រូរបស់គេ។ វាអាស្រ័យលើស្ថានភាព។ ដូចដែលយើងទាំងអស់គ្នាដឹងថា រូបគេអវត្តមានក្នុងការប្រកួតត្រៀមរដូវកាល ហើយអ្នកមិនអាចខកខានក្នុងការប្រកួតបែបនេះនោះទេ»។
«វាគឺជាការប្រកួតមូលដ្ឋាន និងជាពិសេសក្នុងហ្គេមដែលយើងលេង ពោលវិធីសាស្ត្រនៃការលេង។ យើងលេងតាមវិធីមួយប្រភេទផ្សេងទៀត បើប្រៀបធៀបទៅនឹងឆ្នាំមុន។ វាអាស្រ័យលើតម្រូវការ ការរួមសហការ និងតំណែងជាក់លាក់ ទាំងក្នុង និងក្រៅទីតាំង ដែលត្រូវឈរ ហើយរឿងមួយទៀត គឺកាយសម្បទា (រឹងមាំ ១០០% ឬអត់)»។ លោក Ten Hag បានបន្ត។
លោក Ten Hag បានបញ្ជាក់អះអាងថា Ronaldo ក៏ដូចកីឡាករគ្រប់រូបក្នុងក្រុមដែរ នឹងត្រូវការពេលវេលាដើម្បីកែសម្រួលទម្រង់ ដោយទទួលស្គាល់ថា ខ្សែប្រយុទ្ធរូបនេះនៅពីក្រោយកីឡាករដទៃទៀតក្នុងក្រុម ដោយសារការចូលលេងត្រៀមរដូវកាលរបស់គេតិចពេក។
ក្លិបធំៗមួយចំនួនជុំវិញពិភពលោក ត្រូវបានភ្ជាប់ទំនាក់ទំនងជាមួយកីឡាករ Ronaldo តែភាគច្រើននៃពួកគេ បានចេញបដិសេធជាសាធារណៈ ក្នុងការចាប់អារម្មណ៍លើខ្សែប្រយុទ្ធរូបនេះ ក្នុងនោះរួមមានទាំងក្លិប Bayern Munich, Atletico Madrid ហើយថ្មីៗនេះ ក្លិប Napoli។
កុងត្រាបច្ចុប្បន្នរបស់កីឡាករ Ronaldo មានសុពលភាព រហូតដល់ចប់រដូវកាលនេះ បើទោះបីជាមានជម្រើសដើម្បីឱ្យក្រុម Man United បន្តកុងត្រានោះរយៈពេល ១២ខែបន្ថែមទៀតក៏ដោយ៕
