ខ្សែការពារ Reece James របស់ក្លិប Chelsea និងក្រុមជម្រើសជាតិអង់គ្លេស បានចុះកិច្ចសន្យាថ្មីរយៈពេល ៥ឆ្នាំទៀត ដែលមានន័យថា នឹងរក្សារូបគេនៅទឹកដី Stamford Bridge រហូតដល់ឆ្នាំ២០២៧។ នេះបើយោងតាមការប្រកាសរបស់ក្លិបយក្ស នៅក្របខ័ណ្ឌ Premier League កាលពីថ្ងៃចន្ទ។
![](https://cambodiaflashnews.com/wp-content/uploads/2021/06/top-banner.gif)
ខ្សែការពារស្លាបស្តាំវ័យ ២២ឆ្នាំរូបនេះ បង្ហាញខ្លួនបានចំនួន ១២៨ហ្គេមហើយ សម្រាប់ក្រុមតោខៀវ បន្ទាប់ពីមកចូលរួម តាមរយៈការឆ្លងកាត់សាលាបាល់ទាត់ថ្នាលរបស់ក្លិបផ្ទាល់តែម្ដង។
កីឡាករ James បានប្រាប់ឱ្យដឹងតាមរយៈវេបសាយផ្លូវការរបស់ក្លិប Chelsea ថា៖ «ខ្ញុំមានអារម្មណ៍រំភើបណាស់ជាមួយនឹងកិច្ចសន្យាថ្មីរបស់ខ្ញុំនេះ ហើយខ្ញុំសូមអរគុណ ចំពោះអ្នកគាំទ្រ ម្ចាស់ក្លិបថ្មី និងអ្នកពាក់ព័ន្ធ ក្នុងក្លិបទាំងអស់»។
«ខ្ញុំពិតជាពិបាក ក្នុងការរង់ចាំមើលថា តើអនាគតនឹងទៅជាយ៉ាងណានោះ ហើយខ្ញុំប្រាកដថា យើងនឹងមានឱកាសឈ្នះពានរង្វាន់ជាច្រើនបន្ថែមទៀត»។ កីឡាករ James បាននិយាយបន្ត។
James បានបន្ថែមថា៖ «ខ្ញុំធំធាត់ឡើងជាមួយនឹងការគាំទ្រចំពោះក្លិបនេះ ហើយខ្ញុំបាននៅទីនេះតាំងពីខ្ញុំមានអាយុ ៦ឆ្នាំមកម្ល៉េះ។ ខ្ញុំបានព្រមព្រៀងចុះហត្ថលេខាក្នុងកិច្ចសន្យាថ្មីមួយ ព្រោះនេះគឺជាក្លិបដែលខ្ញុំចង់នៅ។ យើងមានអនាគតដ៏ភ្លឺស្វាងនៅខាងមុខរបស់យើង»។
ប្រធានក្លិប Chelsea លោក Todd Boehly បាននិយាយក្រោយការបន្តកុងត្រានេះថា៖ «យើងពិតជារំភើបណាស់ ដែលបានផ្តល់ឱ្យកីឡាករ James នូវកិច្ចសន្យារយៈពេលវែងថ្មីមួយ ដើម្បីឱ្យរូបគេបន្តស្នាក់នៅក្លិប Chelsea។ រូបគេគឺជាកីឡាករឆ្នើមម្នាក់ និងជាមនុស្សរបស់ក្លិប Chelsea ដ៏ពិតប្រាកដ»៕