កីឡាករវាយកូនបាល់អាជីព Rafael Nadal បានបញ្ជាក់ប្រាប់កាលពីថ្ងៃចន្ទថា រូបគេមិនប្រាកដថា នៅពេលណានឹងត្រឡប់មកកាន់ទីលានវិញនោះទេ បន្ទាប់ពីមិនអាចបន្តដំណើរទៅមុខ ក្នុងព្រឹត្តិការណ៍ US Open ២០២២ ក្រោយចាញ់កីឡាករវ័យក្មេង Frances Tiafoe ដែលនេះជាការធ្លាក់លឿនបំផុត គិតចាប់តាំងពីឆ្នាំ២០១៦ មក។
កីឡាករ Nadal ដែលជាម្ចាស់ពានរង្វាន់ ក្នុងកម្មវិធី US Open នេះ ៤សម័យកាល និងដែលកំពុងប្រឹងប្រែងដណ្តើមឱ្យបានជើងឯកលំដាប់ Grand Slam ជាលើកទី២៣ បានរងបរាជ័យក្នុងលទ្ធផល ៦-៤ ៤-៦ ៦-៤ និង ៦-៣ ក្នុងវគ្គ ១៦នាក់ចុងក្រោយ ក្រោមថ្វីដៃរបស់កីឡាករTiafoe ដែលមានចំណាត់ថ្នាក់លំដាប់ទី២៦ ពិភពលោក។
នេះជាការចាញ់ ក្នុងប្រកួត Grand Slam លើកដំបូងរបស់កីឡាករ Nadal ក្នុងឆ្នាំ២០២២ បន្ទាប់ពីអាការឈឺពោះ បានបង្ខំឱ្យរូបគេចាកចេញពីការប្រកួត នៅឯព្រឹត្តិការណ៍ Wimbledon ក្នុងវគ្គពាក់កណ្តាលផ្តាច់ព្រ័ត្រ ហើយការបរាជ័យនេះ បានបញ្ចប់ការប្រកួតលំដាប់ Grand Slam ចំនួន ១៦ដងជាប់ៗគ្នា ដែលកីឡាករសញ្ជាតិអេស្ប៉ាញរូបនេះ យ៉ាងហោចណាស់ក៏បានឡើងដល់វគ្គ ៨នាក់ចុងក្រោយដែរ។
Nadal បាននិយាយ នៅឯសន្និសីទសារព័ត៌មានថា៖ «ខ្ញុំត្រូវត្រឡប់ទៅវិញ។ ខ្ញុំត្រូវការពេលវេលាស្ដារឡើងវិញ។ ខ្ញុំមិនដឹងថា ខ្ញុំនឹងត្រឡប់មកវិញនៅពេលណានោះទេ។ ខ្ញុំនឹងព្យាយាមរៀបចំផ្លូវចិត្តឱ្យប្រសើរវិញ។ នៅពេលដែលខ្ញុំមានអារម្មណ៍ថា ខ្ញុំនឹងត្រៀមខ្លួនរួចហើយ ដើម្បីប្រកួតប្រជែង ខ្ញុំនឹងលេចមុខម្ដងទៀត»។
«ឥឡូវនេះ ខ្ញុំត្រូវត្រលប់ទៅផ្ទះវិញ ខ្ញុំមានរឿងសំខាន់ៗជាច្រើនជាងកីឡាវាយកូនបាល់ ដែលត្រូវចូលរួម។ ការសម្រេចចិត្តនឹងត្រូវធ្វើឡើងដោយផ្អែកលើអ្វីគ្រប់យ៉ាង ដែលដំណើរការនៅក្នុងជីវិតផ្ទាល់ខ្លួនរបស់ខ្ញុំ ពោលគឺអ្វីដែលកើតឡើងមុនពេលជីវិតអាជីពរបស់ខ្ញុំ»។ នេះជាការបន្ថែមរបស់កីឡាករ Nadal៕
