Antony បង្ហាញឱ្យឃើញនូវទម្រង់លេងយ៉ាងល្អអស្ចារ្យ ដោយការស៊ុតបញ្ចូលទី ១គ្រាប់ ក្នុងជ័យជម្នះ ៣-១ របស់ក្រុមបិសាចក្រហម Manchester United លើក្រុមកាំភ្លើងធំ Arsenal កាលពីថ្ងៃអាទិត្យ ដែលគ្រាប់បាល់នេះបានធ្វើឱ្យរូបគេក្លាយជាកីឡាករសញ្ជាតិប្រេស៊ីលដំបូងគេបង្អស់ដែលរកគ្រាប់បាល់បាននៅថ្ងៃបង្ហាញខ្លួនដំបូងឱ្យក្លិប នៅក្របខ័ណ្ឌ Premier League។
ខ្សែបម្រើស្លាប ដែលបានមកដល់ដោយការធ្វើដំណើរពីក្លិប Ajax ក្នុងកិច្ចព្រមព្រៀងតម្លៃ ៨១,៣លានផោន (៩៤,២៥លានដុល្លារ) បានរត់ទៅស៊ុតបាល់បញ្ចូលទីយ៉ាងស្អាតពីការបញ្ជូនរបស់ខ្សែប្រយុទ្ធ Marcus Rashford ដោយនោះជាគ្រាប់បាល់ជួយឱ្យក្រុម Man United បើកការនាំមុខក្នុងការប្រកួត នៅកីឡដ្ឋាន Old Trafford។
Antony បានក្លាយជាកីឡាករប្រេស៊ីលទី៩ ដែលបានបង្ហាញខ្លួនឱ្យក្រុម Man United នៅ Premier League ហើយដោយមានវ័យ ២២ឆ្នាំ និង ១៩២ថ្ងៃ គ្រាប់បាល់នេះធ្វើឱ្យគាត់ក្លាយជាកីឡាករប្រេស៊ីលក្មេងជាងគេបំផុត ដែលអាចរកគ្រាប់បាល់បាននៅថ្ងៃបង្ហាញខ្លួនដំបូង ក្នុងក្របខ័ណ្ឌ Premier League សម្រាប់ក្រុមណាមួយ។
Casemiro បានក្លាយជាកីឡាករប្រេស៊ីលទី៨ ដែលលេចមុខក្នុងសម្លៀកបំពាក់របស់ក្រុមបិសាចក្រហម ក្នុងការប្រកួតកាលពីខែមុន បន្ទាប់ពីចូលរួម ដោយការចាកចេញពីក្រុម Real Madrid តែខ្សែបម្រើរូបនេះនៅតែទន្ទឹងរង់ចាំ ក្នុងការបានចូលលេងជម្រើសដំបូង សម្រាប់ក្លិប។
Antony គឺជាការបន្ថែមកីឡាករចំណូលថ្មីដ៏ថ្លៃបំផុតរបស់ក្រុម Man United ក្នុងទីផ្សារដោះដូរកីឡាកររដូវក្ដៅដ៏មមាញឹករបស់ខ្លួន ដោយរួមបញ្ចូលជាមួយកីឡាករដូចជា Christian Eriksen, Tyrell Malacia, Lisandro Martinez, Casemiro និង Martin Dubravka ក្នុងការផ្លាស់មកកាន់ទឹកដី Old Trafford៕
