អ្នកចាំទី Alisson Becker ជឿជាក់ថា ក្រុម Liverpool របស់ខ្លួនកំពុងតែមានភាពប្រសើរឡើងបន្តិចម្ដងៗ បើទោះបីជាមាននូវការចាប់ផ្តើមរដូវកាលដ៏អាក្រក់បំផុត នៅក្របខ័ណ្ឌ Premier League ក្រោមការដឹកនាំរបស់លោក Jurgen Klopp ក៏ដោយ ខណៈដែលក្រុមហង្សក្រហម បានបញ្ចប់ក្នុងលទ្ធផលស្មើជាមួយក្រុម Everton ក្នុងជំនួប Merseyside Derby។
បន្ទាប់ពីបាត់បង់ឱកាសជាច្រើន ក្នុងលទ្ធផល ០-០ ពីការប្រកួត នៅកីឡដ្ឋាន Goodison Park កាលពីថ្ងៃសៅរ៍ ក្រុម Liverpool ទទួលបានត្រឹមតែ ៩ពិន្ទុប៉ុណ្ណោះពីការប្រកួត ៦លើកដំបូងនៃរដូវកាលថ្មី ដែលជាចំនួនសរុបទាបបំផុត គិតចាប់តាំងពីពួកគេដណ្តើមបានត្រឹម ៨ពិន្ទុ ក្រោមការដឹកនាំរបស់លោក Brendan Rodgers ក្នុងរដូវកាល ២០១៥-២០១៦។
ហ្គេមទី២៥ នៅ Premier League របស់ក្រុម Liverpool ក្នុងឆ្នាំ២០២២ ក៏ជាលើកទី១ ដែរ ដែលពួកគេមិនអាចទម្លុះសំណាញ់ទីបាន ដោយទាំងកីឡាករ Mohamed Salah និង Luis Diaz បានស៊ុតត្រឹមបុករបារទី ខណៈដែលការស៊ុតផ្សេងៗទៀត មិនអាចរួចផុតពីដៃអ្នកចាំទី Jordan Pickford របស់ក្រុម Everton។
ក្រោយចប់ការប្រកួត អ្នកចាំទីរបស់ក្រុមហង្សក្រហម Alisson ដែលបានជួយសង្គ្រោះបាល់យ៉ាងច្រើនក្នុងហ្គេមនេះដែរ បាននិយាយប្រាប់គេហទំព័រផ្លូវការរបស់ក្លិបថា៖ «យើងពិតជាផ្តោតលើការទទួលបានជ័យជម្នះមកវិញ។ វាពិតជាសំខាន់ណាស់ ដែលយើងបានឈ្នះការប្រកួតចុងក្រោយ (ពេលលេងទល់នឹង Newcastle United កាលពីថ្ងៃពុធ)»។
«មិនមែនចេះតែទទួលបានលទ្ធផលដែលអ្នកចង់បាននោះទេ តែអ្នកត្រូវតប្រឹងតស៊ូ ដើម្បីសម្រេចលទ្ធផលនោះ។ អ្នកត្រូវតែមានភាពស៊ីចង្វាក់គ្នា ក្នុងការលេងរបស់អ្នក ហើយពួកយើងនឹងទៅដល់គោលដៅ។ យើងកំពុងប្រសើរឡើងៗ បើមើលពីការប្រកួតចុងក្រោយរបស់យើង ដោយរៀងរាល់ហ្គេម យើងកំពុងប្រសើរម្ដងបន្តិចៗ»។ កីឡាករ Alisson បានបន្ត។
នៅពេលសួរថា តើក្រុម Liverpool ធ្វើបានល្អគ្រប់គ្រាន់ ដើម្បីយកឈ្នះលើក្រុម Everton ដែរឬទេ កីឡាករអន្តរជាតិប្រេស៊ីលបានឆ្លើយតបថា៖ «យើងមិនទទួលបានជ័យជម្នះ ដូច្នេះចម្លើយគឺអត់ទេ។ តែយ៉ាងណា យើងធ្វើបានល្អគួរសមដែរ»។
ក្រុម Liverpool នឹងបង្វែរការចាប់អារម្មណ៍របស់ខ្លួនទៅក្របខ័ណ្ឌ Champions League វិញ នៅពេលដែលពួកគេត្រូវធ្វើដំណើរទៅកាន់ទឹកដីរបស់ក្រុម Napoli នាយប់ថ្ងៃពុធ មុនពេលបើកទ្វារកីឡដ្ឋានរបស់ខ្លួនទទួលក្រុម Wolverhampton Wanderers ក្នុងការប្រកួតបន្ទាប់របស់ពួកគេនៅ Premier League នាថ្ងៃសៅរ៍៕
