បង្ហាញកំណត់ត្រា នៅក្របខ័ណ្ឌ Premier League ចំនួន ៥ ទាំងរបស់កីឡាករ កាលពីអតីត និងបច្ចុប្បន្ន ដូចជា Alan Shearer, Sergio Aguero និង Mohamed Salah ដែលកំពុងរង់ចាំឱ្យកីឡាករ Erling Haaland របស់ក្លិប Manchester City ធ្វើការបំបែក បន្ទាប់ពីបង្ហាញខ្លួន ក្នុងរដូវកាលដំបូងបានយ៉ាងត្រចះត្រចង់។
![](https://cambodiaflashnews.com/wp-content/uploads/2021/06/top-banner.gif)
Erling Haaland ដែលជាខ្សែប្រយុទ្ធថ្មីរបស់ក្រុម Manchester City បានស៊ុតបញ្ចូលទីដល់ទៅ ១០គ្រាប់ ក្នុងការបង្ហាញខ្លួនត្រឹមតែ ៦លើកប៉ុណ្ណោះ នៅក្របខ័ណ្ឌ Premier League បន្ទាប់ពីទម្លុះសំណាញ់ទីបាន ១គ្រាប់ទៀត ក្នុងការប្រកួតដែលក្រុមមេឃខៀវ ស្មើជាមួយក្រុមម្ចាស់ផ្ទះ Aston Villa ១-១ កាលពីថ្ងៃសៅរ៍ទី៣ ខែកញ្ញា។
ខ្សែប្រយុទ្ធជម្រើសជាតិន័រវែស សម្រេចបានកំណត់ត្រា ក្នុងការស៊ុតបានរហូត ១០គ្រាប់លឿនបំផុត នៅក្របខ័ណ្ឌកំពូលរបស់អង់គ្លេស ក្នុងរយៈពេល ៣០ឆ្នាំ ដោយស្មើគ្នានឹងចំនួនរបស់លោក Micky Quinn ដែលធ្វើបានឱ្យក្រុម Coventry City កាលពីខែធ្នូ ឆ្នាំ១៩៩២។
ទោះយ៉ាងណាក៏ដោយ នៅមានកំណត់ត្រាផ្សេងទៀត នៅ Premier League ដែល Haaland ទំនងជានឹងបំបែកបាន តួយ៉ាងដូច ៥ ខាងក្រោមនេះ៖
១-ស៊ុតបញ្ចូលទីបានច្រើនបំផុត ក្នុង ១រដូវកាល តាំងពីប្រើប្រព័ន្ធប្រកួត ៣៨ហ្គេម ក្នុង១រដូវកាល
កីឡាករដែលកាន់កំណត់ត្រានេះ គឺខ្សែបម្រើស្លាប Mohamed Salah របស់ក្រុមហង្សក្រហម Liverpool ដោយស៊ុតបញ្ចូលទីបានច្រើនជាងគេបំផុត ក្នុងរដូវកាល ២០១៧-២០១៨ រហូតដល់ទៅចំនួន ៣២គ្រាប់។
២-មធ្យមភាគស៊ុតបញ្ចូលទីល្អបំផុត គិតជានាទី
Sergio Aguero ដែលជាអតីតខ្សែប្រយុទ្ធក្រុម Man City គ្រងកំណត់ត្រានេះ បន្ទាប់ពីមានមធ្យមភាគស៊ុតបញ្ចូលទីបាន នៅរៀងរាល់ ១០៨នាទី រហូតមដល់ពេលនេះ កីឡាករ Haaland រកគ្រាប់បាល់បានជាមធ្យមភាគរៀងរាល់ត្រឹមតែ ៤៣នាទីប៉ុណ្ណោះ។
៣-ធ្វើហ៊ែតទ្រិក (ស៊ុត ៣គ្រាប់) ច្រើនជាងគេបំផុត នៅ Premier League
កីឡាករដែលកាន់កំណត់ត្រាហ៊ែតទ្រិកជាងគេបំផុត ក្នុងប្រវត្តិសាស្ត្រ Premier League គឺនៅតែជា Aguero ដោយសម្រេចបានសរុបចំនួន ១២លើក តែប្រសិនបើគិតត្រឹម ១រដូវកាលវិញ គឺ Alan Shearer ដែលជាអតីតខ្សែប្រយុទ្ធរបស់ក្រុម Blackburn Rovers ជាមួយនឹងចំនួន ៥ដងក្នុងរដូវកាល ១៩៩៥-១៩៩៦ ចំណែកឯ Haaland បង្ហាញខ្លួនត្រឹមតែ ៦ហ្គេម ធ្វើបានហើយ ២ហ៊ែតទ្រិក។
៤-អ្នកស៊ុតបញ្ចូលទីបានច្រើនជាងចំនួនហ្គេម
រហូតមកទល់ពេលនេះ គ្មានកីឡាករណាម្នាក់ស៊ុតបញ្ចូលទីបានដលទៅ ៣៨គ្រាប់ នៅ Premier League ក្នុង ១រដូវកាល ស្មើនឹងចំនួនការប្រកួតនោះទេ ខណៈដែល Haaland ចូលលេងបានត្រឹមតែ ៦ប្រកួតប៉ុណ្ណោះ ក៏រកបាន ១០គ្រាប់ទៅហើយ ដែលផ្តល់ឱកាសខ្ពស់បំផុតឱ្យរូបគេ ក្នុងការក្លាយជាកីឡាករដំបូង ដែលរកគ្រាប់បាល់បានលើស ៣៨គ្រាប់ ក្នុងរដូវកាលតែមួយ។
៥-អ្នកស៊ុតបញ្ចូលទីច្រើនជាងគេបំផុតគ្រប់កាល នៅ Premier League
ស្ថិតិ ឬកំណត់ត្រានេះ អាចប្រើពេលរាប់ឆ្នាំ ដើម្បីសម្រេចបាន បន្ទាប់ពីអ្នកស៊ុតបញ្ចូលទីច្រើនជាងគេគ្រប់កាល នៅ Premier League រហូតមកដល់ពេលនេះ គឺ Alan Shearer ដែលបំប៉ោងសំណាញ់ទីរួចហើយបានចំនួន ២៦០គ្រាប់ ដូច្នេះ កីឡាករ Haaland នៅសល់ ២៥១ គ្រាប់ទៀត ទើបបំបែកចំនួននេះបាន៕