កីឡាករ Arthur Melo បានប្តេជ្ញាថា រូបគេនឹងប្រឹងប្រែងឱ្យអស់ពីលទ្ធភាព ក្នុងសម្លៀកបំពាក់របស់ក្រុមហង្សក្រហម Liverpool បន្ទាប់ពីចាកចេញពីក្រុមសេះបង្កង់ Juventus មករួមជាមួយក្រុមរបស់លោក Jurgen Klopp ក្នុងលក្ខខណ្ឌខ្ចីជើងរយៈពេល ១រដូវកាល។
ក្រុមហង្សក្រហមបានបញ្ជាក់ពីការមកដល់របស់ខ្សែបម្រើសញ្ជាតិប្រេស៊ីលវ័យ ២៦ឆ្នាំ ដោយមានរយៈពេលតែ ១ម៉ោងប៉ុណ្ណោះ មុនពេលទីផ្សារដោះដូរកីឡាករនារដូវក្ដៅនេះត្រូវបានបិទបញ្ចប់ជាផ្លូវការ។
កីឡាករ Arthur នឹងមកជួយលោក Klopp នៅតំបន់បម្រើកណ្ដាល បន្ទាប់ពីប្រធានក្រុម Jordan Henderson ដើរខ្ញើចៗចេញពីទីលាន ពេលប៉ះក្រុម Newcastle ដោយត្រូវចូលរួមជាមួយ Thiago Alcantara, Naby Keita និង Alex Oxlade-Chamberlain ក្នុងបញ្ជីឈ្មោះរបស់កីឡាកររងរបួស។
ពាក់អាវដ៏អស្ចារ្យជាមួយនឹងផ្លាកសញ្ញាដ៏ល្បីល្បាញនេះ ដែលតំណាងឱ្យពិភពបាល់ទាត់យ៉ាងច្រើន។ វាជាក្ដីសុបិនមួយ»។
«យើងបាននិយាយគ្នាយ៉ាងច្រើន ហើយគំនិត និងចក្ខុវិស័យរបស់យើង គឺត្រូវគ្នាល្អ ដូច្នេះខ្ញុំប្រាកដថា វាជាជម្រើសដ៏ត្រឹមត្រូវ។ ខ្ញុំពិតជាសប្បាយចិត្ត និងទទួលបានការលើកទឹកចិត្តខ្ពស់ ដែលជួយបន្តក្តីសុបិនរបស់ខ្ញុំនៅលើទីលាន ហើយខ្ញុំនឹងប្រឹងប្រឹងឱ្យអស់ពីលទ្ធភាព ក្នុងសម្លៀកបំពាក់របស់ក្រុម Liverpool»។ កីឡាករ Arthur បានបន្ត។
រូបគេបានបន្ថែមថា៖ «ក្លិប Liverpool មានប្រវត្តិដ៏អស្ចារ្យក្នុងវិស័យបាល់ទាត់។ ខ្ញុំបានលេងទល់នឹងក្រុម Liverpool ខ្ញុំដឹងថា វាមានអារម្មណ៍យ៉ាងណា ក្នុងការនៅក្នុងកីឡដ្ឋាន ដែលមានអ្នកគាំទ្រនៅពីក្រោយពួកគេ។ ពីមុន ខ្ញុំលេងប្រឆាំង តែឥឡូវនេះខ្ញុំនៅខាងពួកគេ ដូច្នេះខ្ញុំពិតជារំភើបណាស់។ នេះជាក្លិបដ៏ធំមួយ ដែលមានអ្នកចាត់ការ និងកីឡាករដ៏អស្ចារ្យ។ ដូចដែលខ្ញុំបាននិយាយពីមុនមក វាជាក្ដីសុបិនក្នុងការបានមកនៅទីនេះ»។
កីឡាករ Arthur បានមកដល់ទឹកដី Anfield បន្ទាប់ពីចំណាយ ២រដូវកាលជាមួយក្រុម Juve ដែលនៅទីនោះ រូបគេបានបង្ហាញខ្លួនចំនួន ៦៣លើក និងស៊ុតបញ្ចូលទីបាន ១គ្រាប់ បន្ទាប់ពីផ្ទេរពីក្លិប Barcelona ក្នុងខែកញ្ញា ឆ្នាំ២០២០។ ជាមួយគ្នានេះ ក្លិបយក្សអ៊ីតាលី ក៏បានបញ្ជាក់ដែរថា ក្រុម Liverpool មានជម្រើសក្នុងការផ្ទេរជាអចិន្ត្រៃយ៍នៅបញ្ចប់រដូវកាលនេះ៕
