Chelsea បានទុកឱ្យរាងយឺតពេលបន្តិចក្នុងការបង្កើនជម្រើសនៅតំបន់ប្រយុទ្ធរបស់ខ្លួន ដោយទាក់ទាញកីឡាករ Pierre-Emerick Aubameyang ឱ្យព្រមត្រឡប់មកកាន់ក្របខ័ណ្ឌ Premier League វិញ។
ក្រុមតោខៀវ បានប្រកាសពីការវិលត្រឡប់របស់ខ្សែប្រយុទ្ធ Aubameyang មកកាន់ការប្រកួតបាល់ទាត់អង់គ្លេស ស្ទើរតែជិត ៩០នាទី បន្ទាប់ពីទីផ្សារដោះដូរកីឡាករ រដូវក្ដៅនេះ បានបិទបញ្ចប់។
កីឡាករ Aubameyang វ័យ ៣៣ឆ្នាំ បាននិយាយក្រោយការផ្ទេរនេះថា៖ «ខ្ញុំពិតជារីករាយណាស់។ វាជាកិត្តិយសមួយ ដែលបានក្លាយជាផ្នែកមួយនៃក្រុមនេះ ហើយខ្ញុំមិនអាចទន្ទឹងរង់ចាំក្នុងការចាប់ផ្តើមនោះទេ។ ខ្ញុំមានកិច្ចការខ្លះដែលមិនទាន់បញ្ចប់សព្វគ្រប់ ជាមួយ Premier League ដូច្នេះ វាជាការល្អក្នុងការត្រឡប់មកវិញ ហើយពិតជាគួរឱ្យរំភើបណាស់»។
អតីតកីឡាករជម្រើសជាតិហ្គាបុង បានចូលរួមជាមួយក្រុមអ្នកមានបុណ្យ Barcelona កាលពីដើមឆ្នាំនេះ បន្ទាប់ពីក្លិប Arsenal បានលុបចោលកិច្ចសន្យាជាមួយរូបគេ តែក្លិបយក្សរបស់អេស្ប៉ាញ បានចំណាយប្រាក់ ចំពេលមានការបញ្ហាផ្នែកហិរញ្ញវត្ថុ។
គេជឿថា ក្លិប Chelsea បានចំណាយត្រឹមតែជាង ១០លានផោន (១១,៥៤លានដុល្លារ) ដើម្បីនាំយកអតីតប្រធានក្រុមកាំភ្លើងធំមករួមការងារម្ដងទៀតជាមួយគ្រូបង្វឹក លោក Thomas Tuchel ដែលធ្លាប់ជាគ្រូ និងសិស្ស កាលនៅក្លិប Borussia Dortmund ហើយកីឡាករ Aubameyang ត្រូវបានគេរំពឹងថា នឹងក្លាយជាចំណុចស្នូលនៃប្រព័ន្ធប្រយុទ្ធថ្មីនៅទឹកដី Stamford Bridge នៅពេលរូបគេជាសះស្បើយពីរបួសថ្គាមបាក់។
ក្រុមតោខៀវ រកបានត្រឹមតែ ៧ពិន្ទុប៉ុណ្ណោះពីការប្រកួតបើកឆាក នៅ Premier League ៥លើករបស់ពួកគេ ហើយកីឡាករ Raheem Sterling គឺជាខ្សែប្រយុទ្ធតែម្នាក់គត់ ដែលមានឈ្មោះក្នុងបញ្ជីអ្នកស៊ុតបញ្ចូលទីរបស់ក្លិប សម្រាប់រដូវកាលនេះ៕
