កីឡាករ Hector Bellerin បានវិលត្រឡប់ទៅចូលរួមជាមួយក្លិបដើមដំបូងរបស់ខ្លួនវិញ គឺអ្នកមានបុណ្យ Barcelona ក្នុងនាមជាកីឡាករឥតគិតថ្លៃ កាលពីថ្ងៃព្រហស្បតិ៍ បន្ទាប់ពីក្លិប Arsenal បានព្រមព្រៀងបញ្ចប់កិច្ចសន្យារបស់ខ្សែការពារស្តាំសញ្ជាតិអេស្ប៉ាញរូបនេះ។
![](https://cambodiaflashnews.com/wp-content/uploads/2021/06/top-banner.gif)
កីឡាករវ័យ ២៧ឆ្នាំ បានចូលរួមជាមួយ Barca ដែលជាក្លិបនៅស្រុកកំណើត នៅលើកទី ១ ពេលមានអាយុ ៨ឆ្នាំ តែបានផ្លាស់ទៅកាន់ក្លិប Arsenal នៅវ័យ ១៦ឆ្នាំ។
កីឡាករ Bellerin បានចូលលេងក្នុងការប្រកួតនៅក្របខ័ណ្ឌ Premier League ចំនួន ១៨៣ដង សម្រាប់ក្រុមកាំភ្លើងធំ ដោយក្នុងនោះរួមចំណែកជួយឱ្យក្រុមយក្សក្រុងឡុងដ៍ឈ្នះពាន ក្នុងកម្មវិធី FA Cup ៣ដង។ ជាមួយគ្នានេះ រូបគេបានឈ្នះពាន Copa del Rey ពេលចូលរួមជាមួយក្រុម Real Betis ក្នុងលក្ខខណ្ឌខ្ចីជើង កាលពីរដូវកាលមុន។
កីឡាករ Bellerin នឹងជំនួសកន្លែងរបស់កីឡាករសញ្ជាតិអាម៉េរិក Sergino Dest ដែលត្រូវបានក្លិប Barca ឱ្យក្រុមនៅអ៊ីតាលី AC Milan ខ្ចីជើងកាលពីថ្ងៃព្រហស្បតិ៍ ដោយមានជម្រើសទិញផ្ដាច់ ក្នុងតម្លៃ ២០លានអឺរ៉ូ ។
ក្លិប Barca មានភាពមមាញឹកយ៉ាងខ្លាំង ក្នុងទីផ្សារដោះដូរកីឡាករនារដូវក្ដៅនេះ ដោយនៅមុននេះ បានចុះហត្ថលេខាជាមួយកីឡាករឥតតម្លៃខ្លួន Franck Kessie និង Andreas Christensen ព្រមទាំងបានទិញយកកីឡាករ Raphinha, Robert Lewandowski និង Jules Kounde៕