ការប្រកួតបើកឆាក ក្នុងព្រឹត្តិការណ៍ World Cup ឆ្នាំនេះ រវាងក្រុមម្ចាស់ផ្ទះកាតា និងអេក្វាទ័រ នឹងត្រូវធ្វើឡើងលឿន ១ថ្ងៃ នាថ្ងៃទី២០ ខែវិច្ឆិកា។ នេះបើតាមប្រភពពីអ្នករៀបចំ World Cup ដែលបានប្រាប់មកបណ្ដាញសារព័ត៌មានធំៗ កាលពីថ្ងៃពុធ។
![](https://cambodiaflashnews.com/wp-content/uploads/2021/06/top-banner.gif)
ការផ្លាស់ប្តូរ ដែលគួរតែត្រូវបានអនុម័តដោយក្រុមប្រឹក្សារបស់សហព័ន្ធបាល់ទាត់អន្តរជាតិ (FIFA) នៅមុនការរាប់ថយក្រោយ ១០០ថ្ងៃ ចាប់ផ្តើមនៅសប្តាហ៍នេះ នឹងរក្សាប្រពៃណី (ទម្លាប់) នៃការប្រកួតដំបូង ដែលមានប្រទេសម្ចាស់ផ្ទះដដែល។
ក្រោមការរៀបចំដែលមានស្រាប់ ក្រុមជម្រើសជាតិសេណេហ្គាល់ និងហូឡង់ នឹងត្រូវលេងហ្គេមបើកឆាកនេះនៅថ្ងៃទី២១ ខែវិច្ឆិកា ដោយតាមមកដោយការប្រកួតបើកជាផ្លូវការ រវាងក្រុមម្ចាស់ផ្ទះកាតា និងអេក្វាទ័រ នៅពេលបន្ទាប់នាថ្ងៃនោះ។
ប្រភពពីអ្នករៀបចំ World Cup បាននិយាយថា ការបញ្ជាក់អះអាងពីការកែប្រែនេះ ត្រូវបានរំពឹងថា នឹងមានឆាប់ៗនេះ ខណៈដែល FIFA និងគណៈកម្មាធិការរៀបចំព្រឹត្តិការណ៍ដ៏ធំនេះរបស់ប្រទេសកាតា បានបដិសេធមិនធ្វើអត្ថាធិប្បាយអ្វីទេ។
«មានការពិភាក្សា និងការព្រមព្រៀងគ្នា រវាងក្រុមទាំង២ រៀងៗខ្លួន ហើយមានការស្នើសុំពី CONMEBOL ដែលជាសហព័ន្ធអាម៉េរិកខាងត្បូង (អាម៉េរិកឡាទីន)»។ នេះបើតាមប្រភពមួយពីអ្នករៀបចំ World Cup ដែលបានប្រាប់មក AFP ដោយនិយាយក្នុងលក្ខខណ្ឌមិនបញ្ចេញឈ្មោះ ខណៈមិនមានការប្រកាសជាផ្លូវការពីការសម្រេចនេះ។
ប្រភពនោះបានបន្ថែមថា៖ «យើងចង់ធ្វើតាមប្រពៃណី (ទម្លាប់) ដែលក្រុមម្ចាស់ជើងឯក ឬក្រុមប្រទេសម្ចាស់ផ្ទះ ត្រូវមានវត្តមានសម្រាប់ការប្រកួតបើកឆាក»។
សម្រាប់អ្នកគាំទ្រ ដែលមានសំបុត្រសម្រាប់ការប្រកួតថ្ងៃទី២១ ខែវិច្ឆិកា ការរំខាន ឬការមានបញ្ហាណាមួយ នឹងត្រូវបានដោះស្រាយ ដូច្នេះផលប៉ះពាល់គឺតិចតួចទេ។ នេះបើតាមប្រភពមួយផ្សេងទៀតពីអ្នករៀបចំការប្រកួតប្រជែងនេះ៕