ក្រុមអធិរាជស Real Madrid ដែលជាម្ចាស់ជើងឯករបស់ក្របខ័ណ្ឌ Champions League បានយកឈ្នះក្រុម Eintracht Frankfurt ដែលជាម្ចាស់ជើងឯក នៅក្របខ័ណ្ឌ Europa League ក្នុងលទ្ធផល ២-០ កាលពីថ្ងៃពុធ ដើម្បីតាមស្មើការលើកពានរង្វាន់ ក្នុងកម្មវិធី UEFA Super Cup ជាកំណត់ត្រា ៥ដង ហើយចាប់ផ្តើមរដូវកាលជាមួយនឹងការឈ្នះពានរង្វាន់មួយ។
២គ្រាប់ ដែលបានជួយឱ្យក្រុមយក្សអេស្ប៉ាញ មានជ័យជម្នះនោះ គឺ ១គ្រាប់ក្នុងវគ្គទី១ ពីខ្សែការពារ David Alaba និង ១គ្រាប់ទៀតពីខ្សែប្រយុទ្ធ Karim Benzema នៅនាទីទី៦៥ ដែលគ្រាប់បាល់នេះបានជួយឱ្យកីឡាករសញ្ជាតិបារាំង ឡើងទៅឈរនៅលេខ ២ ក្នុងបញ្ជីអ្នកស៊ុតបញ្ចូលទីបានច្រើនជាងគេគ្រប់កាលរបស់ក្លិប Real ជាមួយនឹងគ្រាប់បាល់ចំនួន ៣២៤គ្រាប់។
ទន្ទឹមនឹងនេះដែរ ជ័យជម្នះក៏មានន័យថា លោក Carlo Ancelotti របស់ក្រុម Real ក្លាយជាគ្រូបង្វឹកដំបូងគេបង្អស់ដែលដឹកនាំក្រុមលើកពានបានចំនួន ៤។
ហើយជាមួយគ្នានេះ អ្នកចាត់ការសញ្ជាតិអ៊ីតាលី ដែលបានដាក់កីឡាករជម្រើសដំបូងដូចគ្នានឹងជម្រើស ១១នាក់ ពេលឈ្នះការប្រកួតក្នុងវគ្គផ្តាច់ព្រ័ត្រ នៅ Champions League នាក្រុងប៉ារីស កាលពីខែឧសភានោះ ក៏បានពោលសរសើរជាពិសេស ចំពោះកីឡាករប្រធានក្រុម Benzema ដែលជាអ្នកស៊ុតបញ្ចូលទីបានច្រើនជាងគេនារដូវកាលមុន នៅអឺរ៉ុបនេះ។
លោក Ancelotti បាននិយាយថា៖ «រូបគេ គឺជាកីឡាករសំខាន់ម្នាក់ ពោលគឺជាអ្នកដឹកនាំក្រុម (នៅលើទីលាន)។ ខណៈដែលយើងបានមកឈរនៅទីនេះ ក៏ភាគច្រើនដោយសារតែគុណសម្បត្តិរបស់គេ គេស៊ុតបញ្ចូលទីបានច្រើនគ្រាប់ គេបញ្ចប់រដូវកាលបានយ៉ាងល្អ គេស៊ុតបាន១គ្រាប់នៅថ្ងៃនេះ ហើយឥឡូវនេះគេនឹងឈ្នះពានរង្វាន់ Ballon d’Or»។
ការសម្រេចបានជោគជ័យនេះ បានធ្វើឱ្យក្រុម Real ឡើងទៅស្មើជាមួយក្រុម AC Milan និង Barcelona ដែលបានឈ្នះពានរង្វាន់ក្នុងកម្មវិធី Super Cup ចំនួន ៥ ដែរ៕
