កីឡាករ Benjamin Mendy របស់ក្រុមមេឃខៀវ Manchester City និងជម្រើសជាតិបារាំង កាលពីថ្ងៃពុធ បានចាប់ផ្តើមឡើងសវនាការ សម្រាប់ការចោទពីបទចាប់រំលោភ និងរំលោភបំពានផ្លូវភេទលើនារី ៧នាក់ ដែលអាចធ្វើឱ្យអាជីពបាល់ទាត់របស់គេនឹង ត្រូវបញ្ចប់ ក្នុងពន្ធនាគារ ប្រសិនបើត្រូវបានកាត់ទោសថាពិតជាខុសមែន។
Mendy វ័យ ២៨ឆ្នាំ បានមកដល់តុលាការ Chester Crown ដែលមានទីតាំងនៅភាគពាយព្យនៃប្រទេសអង់គ្លេស ជាមួយនឹងសម្លៀកបំពាក់ឈុតពណ៌ខៀវចាស់ និងក្រវាត់ក ដើម្បីប្រឈមនឹងបទចោទចាប់រំលោភចំនួន ៨ករណី ១ករណីពីបទរំលោភបំពានផ្លូវភេទ និង ១ករណីទៀតពីបទប៉ុនប៉ងចាប់រំលោភ ដែលពាក់ព័ន្ធនឹងស្ត្រីវ័យក្មេងចំនួន ៧នាក់។
ដោយមានអមអ្នកបកប្រែ នៅឯរង្វង់ក្រចកសេះ កីឡាករបារាំងបាននិយាយជាភាសា អង់គ្លេសដើម្បីបញ្ជាក់អត្តសញ្ញាណរបស់ខ្លួន។ កីឡាកររូបនេះបានផ្ដល់ចម្លើយថា មិនបានប្រព្រឹត្តខុសនោះឡើយ កាលពីខែឧសភា ចំពោះការចោទ ៩ករណី ហើយក៏បដិសេធថា គ្មានកំហុសដែរ កាលពីថ្ងៃពុធ ចំពោះបទចោទរំលោភជាបន្តបន្ទាប់ ដែលមិនទាន់នាំរូបគេមកកាត់ទោសតាមច្បាប់។
បទល្មើសទាំងអស់ត្រូវបានគេនិយាយថា បានកើតឡើងក្នុងផ្ទះរបស់ Mendy នៅប្រទេសអង់គ្លេស ចន្លោះខែតុលា ឆ្នាំ២០១៨ និងខែសីហា ឆ្នាំមុន។ រូបគេកំពុងស្ថិតក្នុងការជំនុំជម្រះចំពោះមុខគណៈវិនិច្ឆ័យ រួមជាមួយចុងចោទម្នាក់ទៀត Louis Saha Matturie វ័យ ៤០ឆ្នាំ ដែលបានអះអាងថា មិនមានកំហុសដែរ។
ចុងចោទទាំង២ កំពុងនៅក្រៅឃុំ ដោយកីឡាករ Mendy ត្រូវស្ថិតក្រោមអ្វីដែលចៅក្រម ពីមុនហៅថា លក្ខខណ្ឌ «តឹងរ៉ឹង» ក្នុងនោះរួមទាំងការដកហូតលិខិតឆ្លងដែនរបស់គេផងដែរ។ សវនាការនេះនឹងមានរយៈពេល ១៥សប្តាហ៍ ដោយអយ្យការគ្រោងនឹងបើកសំណុំរឿងនេះ នៅថ្ងៃចន្ទ។
កីឡាករ Mendy បានចូលរួមជាមួយក្រុម Man City ដែលជាម្ចាស់ជើងឯកក្របខ័ណ្ឌ Premier League ដោយការចាកចេញពីក្រុម Monaco របស់បារាំង ក្នុងឆ្នាំ២០១៧។ រូបគេបានចូលលេង ៧៥ដងឱ្យក្លិបយក្ស នៅក្រុង Manchester មុននឹងត្រូវបានក្រុមមេឃខៀវ ព្យួរការងារ បន្ទាប់ពីត្រូវប៉ូលិសចោទប្រកាន់កាលពីខែសីហា៕