ក្លិប RB Leipzig បានឱ្យដឹងកាលពីថ្ងៃអង្គារថា ក្លិបបានចុះហត្ថលេខាផ្ទេរយកអតីតខ្សែប្រយុទ្ធ Timo Werner ពីក្លិប Chelsea ក្នុងកិច្ចសន្យារយៈពេល ៤ឆ្នាំ ដែលនេះមានន័យថា កីឡាករសញ្ជាតិអាល្លឺម៉ង់នឹងត្រូវបញ្ចប់រយៈពេលដ៏លំបាក ២រដូវកាល នៅក្លិបយក្សអង់គ្លេស ជាមួយនឹងការស៊ុតបញ្ចូលទីបាន ១០គ្រាប់ ពីការបង្ហាញខ្លួន ៥៦ដង នៅក្របខ័ណ្ឌ Premier League។
![](https://cambodiaflashnews.com/wp-content/uploads/2021/06/top-banner.gif)
យោងតាមសេចក្ដីរាយការណ៍នានា ក្លិបនៅក្របខ័ណ្ឌ Bundesliga បានចំណាយ ២៥លានផោន (៣០,២លានដុល្លារ) សម្រាប់កីឡាករវ័យ ២៦ឆ្នាំ ដែលជាអ្នកស៊ុតបញ្ចូលទីកំណត់ត្រារបស់ក្លិប កាលពីមុន។
កីឡាករ Werner បាននិយាយនៅក្នុងសេចក្តីថ្លែងការណ៍របស់ក្រុម Leipzig ថា៖ «ខ្ញុំរីករាយណាស់ដែលអាចមកលេងឱ្យក្រុម RB Leipzig ម្តងទៀត។ ខ្ញុំមានពេលវេលាដ៏អស្ចារ្យនៅទីនេះចន្លោះឆ្នាំ២០១៦ និង២០២០ នៅពេលដែលពួកយើងធ្វើបានយ៉ាងអស្ចារ្យ ក្នុងនាមជាក្រុមចំណូលថ្មីរបស់លីគ»។
កាលពីព្រឹកថ្ងៃអង្គារ កីឡាករដែលបង្ហាញខ្លួនជាអន្តរជាតិ ៥៣ដងរូបនេះ បានប្រកាសពីការចាកចេញរបស់ខ្លួនពីកីឡដ្ឋាន Stamford Bridge ជាកន្លែងដែលរូបគេបានឈ្នះពានរង្វាន់ នៅក្របខ័ណ្ឌ Champions League ក្នុងឆ្នាំ២០២១ ប៉ុន្តែបានជួបការលំបាកក្នុងការរកឱ្យឃើញនូវទម្រង់ដ៏ល្អ ដើម្បីបានចូលលេងជាប់លាប់។
«ថ្ងៃនេះ ជាថ្ងៃបញ្ចប់នៃការធ្វើដំណើររបស់ខ្ញុំជាមួយក្លិប Chelsea។ ខ្ញុំអរគុណណាស់ សម្រាប់ពេលវេលាដែលខ្ញុំបានចំណាយនៅជាមួយក្លិបដ៏ពិសេសនេះ»។ នេះជាការរៀបរាប់របស់កីឡាករ Werner នៅលើបណ្ដាញសង្គម។
ការប្រកួតទី២ របស់ក្រុម Leipzig នៅ Bundesliga រដូវកាលថ្មីនេះ គឺនៅថ្ងៃសៅរ៍ ដោយត្រូវតទល់នឹងក្រុម Cologne នៅផ្ទះខ្លួនឯង ហើយបន្ទាប់មកត្រូវត្រៀមខ្លួនសម្រាប់ការប្រកួតប្រជែងនៅក្របខ័ណ្ឌ Champions League៕