ក្លិប Everton បានឈានដល់កិច្ចព្រមព្រមចុះហត្ថលេខាផ្ទេរយកកីឡាករអន្តរជាតិបែលហ្ស៊ិក Amadou Onana ក្នុងតម្លៃមិនបញ្ចេញឱ្យដឹង ពីក្លិប Lille របស់បារាំង។ នេះបើតាមការប្រកាសរបស់ក្លិបនៅក្របខ័ណ្ឌ Premier League អង់គ្លេស កាលពីថ្ងៃអង្គារ។
ខ្សែបម្រើវ័យ ២០ឆ្នាំរូបនេះ បានយល់ព្រមរួមរស់ជាមួយក្លិបនៅទឹកដី Goodison Park ក្នុងកិច្ចសន្យារយៈពេល ៥ឆ្នាំ ហើយក្លាយជាកីឡាករចំណូលថ្មីរបស់ក្រុម Toffees (ស្ករតាំងម៉ែ) ក្នុងទីផ្សារដោះដូរកីឡាករនាពេលនេះ បន្ទាប់ពីកីឡាករ James Tarkowski, Ruben Vinagre, Conor Coady និង Dwight McNeil។
កីឡាករ Onana បានប្រាប់គេហទំព័រផ្លូវការរបស់ក្រុម នៅតំបន់ Merseyside ថា៖ «វាមានអារម្មណ៍អស្ចារ្យណាស់ក្នុងការបានចូលរួមជាមួយក្លិប Everton។ ខ្ញុំដឹងច្បាស់ថា នេះជាក្លិបដ៏ធំមួយ ដែលជាក្លិបមួយក្នុងចំណោមក្លិបដ៏ធំបំផុតនៅប្រទេសអង់គ្លេស។ វាជាអ្វីដែលខ្ញុំចង់ក្លាយជាផ្នែកមួយនៃក្លិប អស់រយៈពេលជាច្រើនឆ្នាំមកហើយ»។
ជាមួយគ្នានេះ កីឡាករ Onana បាននិយាយថា ការទាក់ទាញមួយផ្សេងទៀត ដែលនាំឱ្យរូបគេផ្លាស់មកកីឡដ្ឋាន Goodison Park គឺឱកាសដែលបានរួមការងារជាមួយអ្នកចាត់ការរបស់ក្រុម Everton លោក Frank Lampard ដែលជាអតីតខ្សែបម្រើរបស់ក្រុម Chelsea និងជម្រើសជាតិអង់គ្លេស។
«គាត់ (Lampard ) បានលេងបាល់ទាត់ក្នុងកម្រិតខ្ពស់បំផុត ឈ្នះអ្វីៗជាច្រើន និងជាខ្សែបម្រើផងដែរ។ វាមានន័យណាស់ ដែលមានការចាប់អារម្មណ៍ពីគាត់ ហើយខ្ញុំគិតថា គាត់អាចបង្រៀនខ្ញុំនូវរឿងជាច្រើន»។ នេះជាការបន្ថែមរបស់កីឡាករ Onana ដែលមានកំណើតដើមនៅឯប្រទេសសេណេហ្គាល់៕
