អតីតក្រុមជើងឯកអឺរ៉ុប ២សម័យកាល Benfica នឹងត្រូវប្រកួតជាមួយក្រុម Dynamo Kyiv របស់អ៊ុយក្រែន ខណៈក្រុម PSV Eindhoven របស់លោក Ruud van Nistelrooy នឹងត្រូវជួបជាមួយក្រុម Glasgow Rangers បន្ទាប់ពីក្រុមទាំងអស់នេះ ដណ្ដើមបានសិទ្ធិ សម្រាប់ការប្រកួតវគ្គជម្រុះ (Play-off) ជុំចុងក្រោយនៃក្របខ័ណ្ឌ Champions League កាលពីថ្ងៃអង្គារ។
ខ្សែប្រយុទ្ធ Luuk De Jong រកបានគ្រាប់ជ័យជម្នះនៅនាទីទី១០៩ ខណៈដែលក្រុម PSV Eindhoven វាយបកយកឈ្នះក្រុម Monaco ៣-២ ក្នុងម៉ោងបន្ថែមពិសេស ១៥នាទី ២ដង នៅទឹកដីខ្លួនឯង ដែលជាលទ្ធផលធ្វើឱ្យក្រុមរបស់ប្រទេសហូឡង់ ឆ្លងទៅវគ្គបន្តជាមួយនឹងគ្រាប់បាល់សរុបទាំង ២ជើងច្រើនជាងក្រុមទៅពីបារាំង ៤-៣។
ចំណែកក្រុម Benfica បានយកឈ្នះ Mitjylland ៣-១ ដើម្បីឱ្យលទ្ធផលសរុបទាំង ២ជើង គឺ ៧-២ ហើយគ្រាប់បាល់ ដែលធ្វើឱ្យក្រុមរបស់ព័រទុយហ្គាល់មានជ័យជម្នះលើក្រុមរបស់ប្រទេសដាណឺម៉ាក ស៊ុតបញ្ចូលទីដោយកីឡាករ Enzo Fernandez, Henrique Araujo និង Diogo Goncalves។
នៅឯប្រទេសស្កុតឡេនវិញ គ្រាប់បាល់ចុងក្រោយរបស់កីឡាករ Malik Tillman បានជួយបង្កើតនូវលទ្ធផលវាយបកយ៉ាងអស្ចារ្យ ខណៈពេលដែលក្រុម Rangers បានបំបាក់ក្រុម Union Saint-Gilloise ៣-០។ ក្រុមទៅពីប្រទេសបែលហ្ស៊ិក បានឈ្នះ ២-០ កាលពីជើងទី ១។
កីឡាករ Kostiantyn Vivcharenko និង Viktor Tsygankov បានជួយឱ្យក្រុម Dynamo Kiyv របស់អ៊ុយក្រែន ឆ្លងផុតក្រុមរបស់អូទ្រីស Sturm Graz ជាមួយនឹងជ័យជម្នះទាំង ២ជើង ៣-១ បន្ទាប់ពីក្រុមទាំង ២ តទល់គ្នាយ៉ាងស្វិតស្វាញ ពេលការប្រកួត ត្រូវតដល់ម៉ោងបន្ថែមពិសេស។
ក្រុម Dynamo បានជាប់ចំណាត់ថ្នាក់លេខ ២ ក្នុងតារាងពិន្ទុរបស់ក្របខ័ណ្ឌ Premier League របស់អ៊ុយក្រែន នៅពេលដែលប្រទេសរុស្ស៊ីបានឈ្លានពានប្រទេសនេះ កាលពីដើមឆ្នាំនេះ។
ការប្រកួតជើងទី ១ នៃវគ្គ Play-off ចុងក្រោយនេះ នឹងធ្វើឡើងនៅថ្ងៃទី ១៦-១៧ ខែសីហា ហើយការប្រកួតត្រឡប់មកវិញនៅ ១សប្តាហ៍បន្ទាប់៕
