សៀមរាប៖ ក្រុមការងារសហគមន៍នៃអាជ្ញាធរជាតិអប្សរា នៅតែបង្ហាញកង្វល់ថា បើទោះបីជាច្បាប់បានហាមឃាត់មិនឱ្យមានការសាងសង់សំណង់ថ្មីៗនិងមិនឱ្យមានការលក់ដូរដីទៅឱ្យអ្នកចំណូលថ្មីក៏ដោយ ក៏បច្ចុប្បន្ននេះការប្រកាសលក់ដីក្នុងតំបន់ការពាររបស់រមណីយដ្ឋានអង្គរតាមបណ្ដាញសង្គម(Face Book)និងដាក់ស្លាក(លក់ដី)នៅតែមានជាច្រើនករណី។
![](https://cambodiaflashnews.com/wp-content/uploads/2021/06/top-banner.gif)
ក្រុមមេធាវីនៃអាជ្ញាធរជាតិអប្សរា ធ្លាប់បានថ្លែងបញ្ជាក់កាលពីថ្ងៃទី១ ខែសីហាកន្លងទៅថាតំបន់អង្គរ នៅក្នុងខេត្តសៀមរាប ត្រូវបានកំណត់ជាតំបន់រមណីយដ្ឋានវប្បធម៌ ដែលត្រូវការពារជាពិសេសតំបន់១និងតំបន់២ ជាចំណុចពិសេសនិងសំខាន់ជាងគេ ដ្បិតជាតំបន់ស្នូលប្រាសាទនិងបុរាណវិទ្យា។
លោកមេធាវី ស៊ន់ សុជាតិ បានពន្យល់ថា ការប្រើប្រាស់ដីធ្លីក្នុងតំបន់១និងតំបន់២នៃរមណីយដ្ឋានអង្គរ គឺអនុញ្ញាតឱ្យប្រជាពលរដ្ឋដែលមានលំនៅនិងជាអ្នកដែលរស់នៅយូរលង់មកហើយ អាចបន្តរស់នៅបាន តែពុំមានសិទ្ធិលក់ដូរទេ។ ករណីផ្ទះសម្បែងទ្រុឌទ្រោម ម្ចាស់ផ្ទះអាចស្នើសុំជួសជុល រុះរើ ឬសាងសង់ថ្មីបាន ហើយក៏មានករណីចាំបាច់ដោះស្រាយជីវភាព ពួកគេក៏អាចលក់ដូរឱ្យអ្នកភូមិផងជាមួយគ្នាបាន តែហាមសម្រាប់ការលក់ឱ្យអ្នកចំណូលថ្មី។
របាយការណ៍នៅក្នុងខែកក្កដាឆ្នាំ២០២២ ឱ្យដឹងថា មានប្រជាពលរដ្ឋដែលរស់នៅក្នុងស្រុកនិងក្រុងចំនួន៥ ដែលស្ថិតក្នុងតំបន់រមណីយដ្ឋានអង្គរបានដាក់ពាក្យស្នើសុំជួសជុលផ្ទះ រួមទាំងសង់សំណង់តូចតាចចំនួន២៤៥សំណើ។នៅក្នុងសំណើជាង២៤០នោះ ក្រុមការងារសហគមន៍នៃអាជ្ញាធរជាតិអប្សរា បានចុះផ្សព្វផ្សាយអប់រំនិងពិនិត្យ ដោយបានសម្រេចអនុញ្ញាតឱ្យពលរដ្ឋនៅក្នុងតំបន់អង្គរ អាចជួសជុលផ្ទះ និងសង់សំណង់ស្រាលចំនួន១៨៩សំណើ។ការអនុញ្ញាតឱ្យជួសជុលនិងសង់សំណង់ស្រាលនោះ រួមមាននៅស្រុកប្រាសាទបាគងបានចំនួន១៨សំណើ ស្រុកអង្គរធំចំនួន០៣សំណើ ស្រុកពួកចំនួន១៨សំណើ ក្រុងសៀមរាបចំនួន៧៥សំណើនិងស្រុកបន្ទាយស្រី៧៥សំណើ។
រាល់ការដែលប្រជាពលរដ្ឋដាក់ពាក្យសុំច្បាប់ទៅអាជ្ញាធរអប្សរា ដើម្បីជួសជុលផ្ទះចាស់ឬក៏សាងសង់សំណង់តូចតាចនោះ គឺពុំមានការតម្រូវឱ្យបង់ប្រាក់ទេ៕