សៀមរាប៖ មន្ដ្រីជាន់ខ្ពស់ក្រសួងទេសចរណ៍បានសម្ដែងការអរគុណចំពោះរដ្ឋាភិបាលនៃសាធារណរដ្ឋឥណ្ឌា ដែលបានផ្ដល់មូលនិធិដល់ក្រុមបុរាណវិទ្យាឥណ្ឌា ឱ្យជួសជុលប្រាសាទអង្គរវត្ត តាំងពីទសវត្សរ៍ឆ្នាំ១៩៨0 ជួសជុលប្រាសាទតាព្រហ្ម និងសាងសង់សារមន្ទីរវាយណភណ្ឌប្រពៃណីអាស៊ី ក្នុងរមណីយដ្ឋានអង្គរនាខេត្តសៀមរាប។
![](https://cambodiaflashnews.com/wp-content/uploads/2021/06/top-banner.gif)
រដ្ឋលេខាធិការក្រសួងទេសចរណ៍ លោក ប៉ាក់ សុខុម បានថ្លែងអំណរគុណនេះ នៅក្នុងពិធីលៀងសាយភោជន៍ ដែលរៀបចំដោយក្រសួងទេសចរណ៍នៅប្រាសាទក្រវ៉ាន់ សង្កាត់នគរធំក្រុងសៀមរាប កាលពីរាត្រីថ្ងៃទី០៣ ខែសីហា ឆ្នាំ២០២២។
លោក ប៉ាក់ សុខុម មានប្រសាសន៍ថា តាំងតែពីឆ្នាំ២០០២មក ក្នុងដំណើរទស្សនកិច្ចជាផ្លូវការរបស់នាយករដ្ឋមន្ត្រីឥណ្ឌាមកកម្ពុជា គឺបានផ្ដល់មូលនិធិជួយសាងសង់សារមន្ទីរវាយណភណ្ឌប្រពៃណីអាស៊ី Ganga Agent Traditional Textile នៅខេត្តសៀមរាប ដោយធ្វើពិធីបញ្ចុះបឋមសិលា កាលពីឆ្នាំ២០១០ និងបានបើកសម្ពោធជាផ្លូវការនៅក្នុងឆ្នាំ២០១៤។
បច្ចុប្បន្ននេះ សារមន្ទីរវាយណភណ្ឌប្រពៃណីអាស៊ី បានធ្វើការតាំងបង្ហាញនូវផលិតផលសូត្រសំខាន់ៗ ដែលជាស្នាដៃវាយណភណ្ឌតម្បាញ ប្រពៃណីវប្បធម៌តាមដងទន្លេពីរ គឺទន្លេមេគង្គនៅក្នុងតំបន់អាស៊ីអាគ្នេយ៍មានប្រាំប្រទេស និងទន្លេហ្គាងហ្គានៅប្រទេសឥណ្ឌា ។
តាំងពីឆ្នាំ២០០៤រហូតមកដល់បច្ចុប្បន្ននេះ ក្រុមអ្នកស្រាវជ្រាវបុរាណវិទ្យាឥណ្ឌា (ASI) បានជួយជួសជុលប្រាសាទតាព្រហ្ម ទីសាលរបាំបានយ៉ាងល្អប្រសើរ ដោយទទួលបានការវាយតម្លៃខ្ពស់ពី ICC Angkorផងដែរ។
បច្ចុប្បន្ននេះ រដ្ឋាភិបាលនៃសាធារណរដ្ឋឥណ្ឌានិងស្ថានទូតឥណ្ឌាប្រចាំកម្ពុជា ក៏នៅតែសហការល្អជាមួយក្រសួងទេសចរណ៍កម្ពុជាបន្ថែមទៀតក្នុងការផ្សព្វផ្សាយទេសចរណ៏រួមគ្នា ជាពិសេសកម្មវិធី Cambodia Tourism | Roadshow នៅប្រទេសឥណ្ឌា និងការរៀបចំទិវាយោគៈអន្តរជាតិ ជារៀងរាល់ឆ្នាំនៅតាមគោលដៅទេសចរណ៍សំខាន់ៗរបស់កម្ពុជាផង៕