បាត់ដំបង៖ប្រជាពលរដ្ឋរស់នៅក្នុងតំបន់អភិរក្សក្រុងបាត់ដំបងប្រមាណ ៨០ ភាគរយ បានចូលរួមរុះរើប៉ាណូពាណិជ្ជកម្ម និងសំយាបមុខផ្ទះនៅថ្ងៃផុតឱសានវាទ។
លោក ផេង សិទ្ធី អភិបាលក្រុងបាត់ដំបង បានបញ្ជាក់ឱ្យដឹងនៅថ្ងៃទី០១ ខែសីហានេះថា ក្រោយការជូនដំណឹងជាបន្តបន្ទាប់ និងច្រើនថ្ងៃ រហូតដល់ថ្ងៃកំណត់ឱសានវាទថ្ងៃទី០១ ខែសីហានេះ ពលរដ្ឋភាគច្រើនជាអ្នកលក់ដូរមានការភ្ញាក់រលឹកចូលរួមរុះរើសំយាបមុខផ្ទះរបស់ពួកគាត់រៀងៗខ្លួនបានប្រមាណជា៨០ភាគរយហើយ។
ការរៀបចំតំបន់អភិរក្សនេះ ដើម្បីលើកកម្ពស់សណ្តាប់ធ្នាប់ សោភ័ណភាព និងបរិស្ថានឱ្យបានល្អប្រសើរ ទាក់ទាញភ្ញៀវទេសចរជាតិ អន្តរជាតិឱ្យចូលមកលេងកម្សាន្តក្នុងទឹកដីវប្បធម៌ ប្រវត្តិសាស្ត្រប្រកបដោយសក្តានុពលរបស់យើងទាំងអស់គ្នា ពិសេសសំដៅការប្រកួតប្រជែងជាសកលនៅលើឆាកអន្តរជាតិ។
ការកែសម្រួលតាមគំរូអនុវត្តទៅលើលំនៅស្ថានបុរាណត្រង់ផ្លូវខេត្តលេខ ១កន្លះ, ផ្លូវលេខ២,ផ្លូវលេខ២កន្លះ,ផ្លូវខេត្តលេខ ៣ និងកំណាត់ផ្លូវកាត់ទទឹងមួយចំនួនទៀត ក្នុងរង្វង់តំបន់អភិរក្សចាប់ពីចំណុចវត្តពិភិទ្ធារាម ដល់វត្តដំរីស ក្នុងខេត្តបាត់ដំបង៕
ដោយ៖ ព្រះអង្គខ្មៅ
