ដោយ៖ស-សម្បត្តិ
ភ្នំពេញ ៖ ករណីវិវាទដីធ្លីមួយកន្លែងនៅភូមិតាំងរបង ឃុំហោសំណំ ស្រុកឱរ៉ាល់ ខេត្តកំពង់ស្ពឺ ដោយជនរងគ្រោះលោក ឃិត ឈឿន បានទិញពីម្ចាស់ដើម តាំងពីឆ្នាំ២០១៧ ហើយស្រ្តីម្នាក់កាន់ក្រដាសមួយសន្លឹក អះអាងថា ជាម្ចាស់ដី ពេលនេះ ទាំងអាជ្ញាធរមូលដ្ឋាន ជាពិសេស លោក ជាម ច័ន្ទ សោភ័ណ្ឌអភិបាលខេត្តកំពង់ស្ពឺ បាននឹងកំពុងយកចិត្តទុកដាក់ ពិនិត្យលើសំណុំរឿងនេះហើយ ដើម្បីស្វែងរកយុត្តិធម៌ ជូនជនរងគ្រោះពិតប្រាកដ។
ក្រោយទទួលរងនូវភាពអយុត្តិធម៌បែបនេះ បុរសជាម្ចាស់ដី បានធ្វើលិខិត ស្នើសុំអន្តរាគមន៍ ទៅកាន់អាជ្ញាធរខេត្តកំពង់ស្ពឺ គ្រប់លំដាប់ថ្នាក់ មេត្តាជួយរកយុត្តិធម៌ ឲ្យលោកផង។
ជាការឆ្លើយតប ឯកឧត្តម ជាម ច័ន្ទសោភ័ណ្ឌ អភិបាលខេត្តកំពង់ស្ពឺ បានចាត់ឲ្យលោកអភិបាលស្រុកស្រុកឱរ៉ាល់ ចុះពិនិត្យដោះស្រាយជាមួយសមត្ថកិច្ច រួចរាយការណ៍ជាលាយលក្ខណ៍អក្សរ មកអភិបាលខេត្តវិញ ដើម្បីមានមូលដ្ឋានចាត់ការបន្តតាមផ្លូវច្បាប់។
លោក ឃិត ឈឿន ដែលជាជនរងគ្រោះបានទិញដីពីម្ចាស់ដើមផ្ទាល់ និងកាន់កាប់ដីនិងអាស្រ័យផល តាំងពីឆ្នាំ២០១៧ បានសំដែងនូវក្តីរីករាយ នៅពេលដែល អាជ្ញាធរមូលដ្ឋាន ជាពិសេស លោកអភិបាលខេត្ត បានខ្នះខ្នែង ខិតខំប្រឹងប្រែង ដើម្បីជួយស្វែងរកនូវយុត្តិធម៌ ជូនលោក។
លោកឃិត ឈឿន ក៏បានសូមថ្លែងអំណរគុណ ចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្តមួយនេះយ៉ាងខ្លាំង។ជាមួយគ្នានេះលោកឃិត ឈឿន សង្ឃឹមទុកយ៉ាងមុតមាំថាអាជ្ញាធរគ្រប់លំដាប់ថ្នាក់ជាពិសេសឯកឧត្តមអភិបាលខេត្តកំពង់ស្ពឺនឹងផ្តល់នូវភាពយុត្តិធម៌ដល់ជនរងគ្រោះនៅក្នុងទំនាស់ដីមួយនេះជាក់ជាមិនខានឡើយ៕
