ដោយ៖ កំចាយ
កែប÷ កុមារាម្នាក់បានស្លាប់បន្ទាប់ពីរងរបួសធ្ងន់ក្នុងចំណោម២នាក់ព្រោះតែរថយន្តបុកម៉ូតូពីក្រោយពេលធ្វើដំណើរលើដងផ្លូវជាតិលេខ៣៣។ ហេតុការណ៍នេះបានកើតឡើងនៅភូមិដំណាក់ចង្អើរ សង្កាត់ព្រៃធំ ក្រុងកែប នារសៀលថ្ងៃទី២០ ខែមីនា ឆ្នាំ២០២៥។ ពលរដ្ឋបានឃាត់ខ្លួនអ្នកបើករថយន្តប្រគល់ជូនសមត្ថកិច្ចដើម្បីសួរនាំ។
សមត្ថកិច្ចនគរបាលចរាចរណ៍នៃស្នងការដ្ឋានខេត្តកែបបានប្រាប់ឲ្យដឹងថា កុមារាដែលបានស្លាប់ឈ្មោះ យាម ណាត់ អាយុ ១៤ឆ្នាំ ជាសិស្សសាលាមានទីលំនៅភូមិកែវក្រសាំង សង្កាត់កែប ក្រុងកែប ខេត្តកែប។ រីឯអ្នករងរបួសឈ្មោះ ធី សាទាន អាយុ ១៤ឆ្នាំ រស់នៅភូមិកែប សង្កាត់កែប ក្រុងកែប ខេត្តកែប។ ចំណែកអ្នកបើករថយន្តបង្កឈ្មោះ ទ្រី រតនៈ ភេទប្រុស អាយុ ២២ឆ្នាំ រស់នៅភូមិអូរដូង ឃុំពងទឹក ស្រុកដំណាក់ចង្អើរ ខេត្តកែប។
ប្រភពដដែលបានរៀបរាប់ថា៖ កាលពីម៉ោង៣ និង៤០នាទីរសៀលថ្ងៃទី២០ ខែមីនា មានគ្រោះថ្នាក់ចរាចរមួយបានកើតឡើងរវាងរថយន្ត និងម៉ូតូពេលធ្វើដំណើរស្របទិសគ្នា។ មុនគ្រោះថ្នាក់កើតឡើង គេឃើញកុមារាជាសិស្សសាលា២នាក់បានបើកម៉ូតូឌុបគ្នាលើផ្លូវជាតិលេខ៣៣ ក្នុងទិសដៅពីកើតទៅលិច។ លុះមកដល់ចន្លោះបង្គោលគីឡូម៉ែត្រលេខ១៩-២០ ស្រាប់តែមានរថយន្តម៉ាកតូយ៉ូតាអាល់ហ្វាតបើកមកពីក្រោយយ៉ាងលឿន រួចជ្រុលបុកម៉ូតូពេញទំហឹងបណ្តាលឲ្យកុមារាទាំង២នាក់ដេកដួល និងរងរបួសជាទម្ងន់។
សមត្ថកិច្ចបានបញ្ជាក់ថា ក្នុងស្ថានភាពបែបនោះ អ្នកជិតខាងបានឃាត់ខ្លួនអ្នកបើកបររថយន្តប្រគល់ជូនសមត្ថកិច្ចដើម្បីចាត់ការតាមនីតិវិធី។ ចំណែកជនរងគ្រោះទាំង២នាក់ត្រូវបានបញ្ជូនទៅសង្គ្រោះនៅមន្ទីរពេទ្យឯកជនស្ថិតក្នុងភូមិដំណាក់ចង្អើរ សង្កាត់ព្រៃធំ ក្រុងកែប។ ដោយសារម្នាក់ក្នុងចំណោមនោះមានស្ថានភាពធ្ងន់ធ្ងរខ្លាំង ក្រុមគ្រូពេទ្យក៏បញ្ជូនបន្តទៅមន្ទីរពេទ្យខេត្តកំពត តែចៃដន្យបានស្លាប់នៅតាមផ្លូវតែម្តង៕
