ដោយ៖ គង់ហេង
កំពង់ចាម៖ មណ្ឌលសុខភាពឃុំពាមកោះស្នា ស្រុកស្ទឹងត្រង់ដែល មានតម្លៃជិត ១៥ម៉ឺន ដុល្លារអាមេរិក ដែលបានសម្ពោធដាក់ឱ្យប្រើប្រាស់ ដោយឯកឧត្តមសន្តិបណ្ឌិត នេត សាវឿន ឧបនាយករដ្ឋមន្រ្តី ប្រធានក្រុមការងាររាជរដ្ឋាភិបាលចុះមូលដ្ឋាន ខេត្តកំពង់ចាម អាចបម្រើសេវាសុខភាពជូនប្រជាពលរដ្ឋចំនួន បីឃុំ។
នេះបើតាមការបញ្ជាក់ឱ្យដឹងនៅក្នុងសុន្ទរកថាស្វាគមន៍ របស់ឯកឧត្តម អ៊ុន ចាន់ដា អភិបាលខេត្តកំពង់ចាមថ្លែងក្នុងពិធីសម្ពោធដាក់ឱ្យប្រើប្រាស់ផ្លូវការអគារ នៃមណ្ឌលសុខភាពមួយនេះ និងពិធីបើកការដ្ឋានសាងសង់សំណង់ទ្វារទឹកព្រែកតាយី ស្ថិតក្នុងឃុំពាមកោះស្នា ស្រុកស្ទឹងត្រង់នៅព្រឹកថ្ងៃទី ១៩ មីនា។
ឯកឧត្តមអភិបាលខេត្តកំពង់ចាមបានថ្លែងបញ្ជាក់ថា៖ នៅឆ្នាំ២០០២ សម្តេចឧត្តមទេពញាណ ហ៊ុន ណេង បានសម្រេចសាងសង់អគារមណ្ឌលសុខភាពថ្មីតម្លៃ២៥.០០០ ដុល្លារជំនួសអគារចាស់ ដាក់ឱ្យដំណើរការផ្តល់សេវាជូនប្រជាពលរដ្ឋបន្តរៀងមក។ពីរឆ្នាំក្រោយ សម្តេចឧត្តមទេពញាណ បានផ្តល់រថយន្ត គិលានសង្គ្រោះ ចំនួន១គ្រឿង ដល់មណ្ឌលសុខភាពពាមកោះស្នា និងក៏ដូចជាការជួយសម្រួលដល់ មណ្ឌលសុខភាពឃុំ ព្រះអណ្តូង និងឃុំខ្ពបតាងួនផងដែរ។
ឯកឧត្តមបានបន្តថា៖ នៅឆ្នាំ២០២៤ ក្រោមការយកចិត្តទុកដាក់ពីសំណាក់ លោកជំទាវ លាង វួចឆេង ហ៊ុនណេង ដែលលោកជំទាវ មើលឃើញពីការលំបាកក្នុងការផ្តល់សេវា ដោយអគារនោះនៅតូច និងគ្មានបន្ទប់ គ្រប់គ្រាន់សម្រាប់ផ្តល់សេវា និងបុគ្គលិកសម្រាកយាមប្រចាំការពេលយប់ ហើយនិងមានបំណងចង់ ពង្រីកសេវាឱ្យបានច្រើនបន្ថែមទៀត នៅក្នុងមណ្ឌលសុខភាពពាមកោះស្នានេះ ដើម្បីជាបង្អែករបស់ប្រជាជនសម្រាប់៣ឃុំតាមមាត់ទន្លេ មានឃុំពាមកោះស្នា ឃុំព្រះអណ្តូង ឃុំខ្ពបតាងួន លោកជំទាវ បាន សម្រេចចិត្តសាងសង់អគារថ្មី ១ខ្នងដែលមានទទឹង ១៣ម៉ែត្រ បណ្តោយ ១៩ម៉ែត្រ មាន៨បន្ទប់ មាន វេរ៉ង់ដាខាងមុខសម្រាប់រថយន្តគិលានសង្គ្រោះដឹកអ្នកជំងឺឡើង-ចុះ ព្រមទាំងបានចាក់សាប ទំហំ ២,៦០ម៉ែត្រ គុណ៤,១០ម៉ែត្រ សម្រាប់ដាក់ខ្លះធ្វើពីដែកប្រក់ក្បឿង ចំនួន១ខ្នង, ឃ្លាំងដាក់សម្ភារ ១ ខ្នង ទំហំ ៣,៦០ម៉គុណ៤ម៉, រោងដាក់ឡាន ១ខ្នងទំហំ ៥ម៉ែត្រ គុណ៨,២០ម៉ែត្រ, ធ្វើរបងព័ទ្ធជុំវិញ ព្រម ទាំងខ្លោងទ្វារ មានបំពាក់ស្លាកមណ្ឌលសុខភាពរួចជាស្រេចចំណាយថវិកាសរុប ១៤៥.៦៧៨,៨៩ ដុល្លារអាមេរិក៕
