ប្រែសម្រួល៖ ស-សម្បត្តិ

ក្រុមហ៊ុន Microsoft និង OpenAI កំពុងស៊ើបអង្កេតថាតើទិន្នន័យលទ្ធផលពីបច្ចេកវិទ្យារបស់ OpenAI ត្រូវបានទទួលដោយមិនមានការអនុញ្ញាតពីក្រុមមួយដែលមានទំនាក់ទំនងជាមួយក្រុមហ៊ុនបច្ចេកវិទ្យាបញ្ញាសិប្បនិម្មិត (AI) ចិនឈ្មោះ DeepSeek ឬយ៉ាងណា តាមរបាយការណ៍របស់ Bloomberg News កាលពីថ្ងៃអង្គារ។

អ្នកស្រាវជ្រាវផ្នែកសន្តិសុខរបស់ Microsoft នៅរដូវស្លឹកឈើជ្រុះបានសង្កេតឃើញបុគ្គលដែលពួកគេជឿថាអាចមានទំនាក់ទំនងជាមួយ DeepSeek កំពុងទាញយកទិន្នន័យក្នុងបរិមាណច្រើនដោយប្រើប្រាស់ interface កម្មវិធីរបស់ OpenAI (API) តាមរបាយការណ៍បានឱ្យដឹង។

API របស់ OpenAI គឺជាមធ្យោបាយចម្បងដែលអ្នកអភិវឌ្ឍន៍កម្មវិធី និងអតិថិជនអាជីវកម្មទិញសេវាកម្មរបស់ OpenAI។

ក្រុមហ៊ុន Microsoft ដែលជាអ្នកវិនិយោគក្នុង OpenAI បានជូនដំណឹងដល់ក្រុមហ៊ុនផលិត ChatGPT អំពីសកម្មភាពគួរឱ្យសង្ស័យ តាមរបាយការណ៍របស់ Bloomberg។

Microsoft ដែលបដិសេធមិនធ្វើអត្ថាធិប្បាយជាមួយ Bloomberg និង OpenAI មិនបានឆ្លើយតបភ្លាមៗទៅនឹងអ៊ីមែលសុំការអត្ថាធិប្បាយពី Reuters ក្រៅម៉ោងធ្វើការធម្មតានោះទេ។ មិនអាចទាក់ទងទៅ DeepSeek បានភ្លាមៗសម្រាប់ការអត្ថាធិប្បាយដែរ។

ក្រុមហ៊ុនថ្មី DeepSeek របស់ចិនដែលមានតម្លៃទាប និងជាជម្រើសជំនួសឱ្យគូប្រកួតប្រជែងអាមេរិក បានបង្កឱ្យមានការលក់ភាគហ៊ុនបច្ចេកវិទ្យាកាលពីថ្ងៃចន្ទ ដោយសារជំនួយការ AI ឥតគិតថ្លៃរបស់ខ្លួនបានលើស ChatGPT របស់ OpenAI នៅលើ App Store របស់ Apple នៅសហរដ្ឋអាមេរិក៕

ប្រភព៖ Reuters