ប្រែសម្រួល៖ ស-សម្បត្តិ
មេដឹកនាំមីយ៉ាន់ម៉ា លោក មីន អ៊ុងឡាំង (Min Aung Hlaing) កំពុងបង្កើនសកម្មភាពការទូតនៅបរទេសយ៉ាងសកម្ម ដោយស្វែងរកការពង្រីកទំនាក់ទំនងអន្តរជាតិ និងពង្រឹងភាពស្របច្បាប់នៃរដ្ឋបាលរបស់គាត់។

លោកគ្រោងជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅទីក្រុងមូស្គូ នៅថ្ងៃអង្គារ (ទី១៨ ខែសីហា) និងចូលរួមក្នុងវេទិកាធុរកិច្ចមួយ ដែលក្នុងនោះកិច្ចសហប្រតិបត្តិការសេដ្ឋកិច្ចត្រូវបានគេរំពឹងថានឹងក្លាយជាប្រធានបទសំខាន់មួយនៅក្នុងរបៀបវារៈ។

អតីតនាយឧត្តមសេនីយ៍រូបនេះបានទៅដល់រដ្ឋធានីរបស់ប្រទេសរុស្ស៊ីកាលពីថ្ងៃមុន ដែលជាដំណើរបំពេញទស្សនកិច្ចចុងក្រោយគេនៅក្នុងបណ្តាដំណើរទស្សនកិច្ចទៅកាន់បរទេសជាច្រើន រួមមានប្រទេសឥណ្ឌា ចិន ឡាវ និងថៃ ចាប់តាំងពីលោកបានចូលកាន់តំណែងក្នុងរដ្ឋាភិបាលស៊ីវិលកាលពីខែមេសាមក។

យោងតាមសេចក្តីថ្លែងការណ៍របស់វិមានក្រឹមឡាំង មេដឹកនាំទាំងពីរនឹងពិភាក្សាអំពីការពង្រឹងកិច្ចសហប្រតិបត្តិការ ក៏ដូចជាបញ្ហាតំបន់ និងអន្តរជាតិ ដោយរំពឹងថានឹងមានការចុះហត្ថលេខាលើកិច្ចព្រមព្រៀងមួយចំនួន។ ការិយាល័យប្រធានាធិបតីមីយ៉ាន់ម៉ាបានឱ្យដឹងថា កិច្ចពិភាក្សានឹងគ្របដណ្តប់លើវិស័យនានា រួមទាំងសេដ្ឋកិច្ច សន្តិសុខ និងកិច្ចការសង្គម។

ដំណើរទស្សនកិច្ចនេះគឺជាលើកដំបូងរបស់លោក មីន អោង ឡាំង (Min Aung Hlaing) ទៅកាន់ប្រទេសរុស្ស៊ី ចាប់តាំងពីលោកទទួលបានជោគជ័យក្នុងការបោះឆ្នោតជ្រើសរើសដោយសភាដើម្បីដឹកនាំប្រទេសមីយ៉ាន់ម៉ា បន្ទាប់ពីការបោះឆ្នោតមួយដែលត្រូវបានគ្រប់គ្រងដោយគណបក្សដែលគាំទ្រដោយយោធា។

ប៉ុន្តែនេះគឺជាដំណើរទស្សនកិច្ចលើកទី ៧ របស់លោកទៅកាន់ប្រទេសនេះ ចាប់តាំងពីមានរដ្ឋប្រហារយោធាកាលពីឆ្នាំ ២០២១ ដែលបានទម្លាក់រដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី (Aung San Suu Kyi)។ លោកធ្លាប់បានជួបជាមួយលោក ពូទីន (Putin) នៅទីក្រុងមូស្គូកាលពីខែកញ្ញាឆ្នាំមុន។

ការជួបប្រជុំគ្នាកម្រិតខ្ពស់ញឹកញាប់នេះឆ្លុះបញ្ចាំងពីទំនាក់ទំនងដ៏ជិតស្និទ្ធរវាងមីយ៉ាន់ម៉ា និងរុស្ស៊ី។ ប្រទេសទាំងពីរស្ថិតនៅក្រោមការដាក់ទណ្ឌកម្មពីសំណាក់លោកខាងលិច ដោយមីយ៉ាន់ម៉ាទទួលរងទណ្ឌកម្មជុំវិញរដ្ឋប្រហារ និងការបង្ក្រាបដែលកើតឡើងបន្ទាប់ពីនោះ ចំណែករុស្ស៊ីទទួលរងទណ្ឌកម្មជុំវិញការឈ្លានពានលើអ៊ុយក្រែន។

លោក Hunter Marston នាយកកម្មវិធីអាស៊ីអាគ្នេយ៍នៅវិទ្យាស្ថាន Lowy ដែលជាស្ថាប័នស្រាវជ្រាវគោលនយោបាយមានមូលដ្ឋាននៅទីក្រុងស៊ីដនី (Sydney) រំពឹងថា កិច្ចសហប្រតិបត្តិការផ្នែកការពារជាតិនឹងក្លាយជាប្រធានបទសំខាន់មួយនៅក្នុងកិច្ចពិភាក្សានេះ។

ខណៈដែលយោធាមីយ៉ាន់ម៉ាកំពុងព្យាយាមដណ្តើមយកទឹកដីដែលបានបាត់បង់ទៅឱ្យកងកម្លាំងប្រឆាំងវិញនោះ រុស្ស៊ីនៅតែជាអ្នកផ្គត់ផ្គង់អាវុធដ៏សំខាន់ ទោះបីជាសង្គ្រាមនៅអ៊ុយក្រែនបានកម្រិតសមត្ថភាពរបស់ខ្លួនក្នុងការនាំចេញអាវុធបន្ថែមទៀតក៏ដោយ។

លោក Marston បានប្រាប់កម្មវិធី Asia Now របស់បណ្តាញព័ត៌មាន CNA ថា៖ «ខ្ញុំគិតថាលោក មីន អោង ឡាំង នឹងពិនិត្យមើលថាតើមានអ្វីខ្លះដែលអាចទិញបានពីប្រទេសរុស្ស៊ី ដើម្បីរក្សាឧត្តមភាពរបស់កងទ័ពជើងគោក និងកងទ័ពអាកាសមីយ៉ាន់ម៉ា លើកងកម្លាំងប្រឆាំងនៅក្នុងប្រទេស»។

កិច្ចសហប្រតិបត្តិការផ្នែកថាមពល គឺជាវិស័យមួយផ្សេងទៀតដែលទំនងជានឹងក្លាយជាប្រធានបទនៃការពិភាក្សា ខណៈដែលប្រទេសមីយ៉ាន់ម៉ាកំពុងស្វែងរកវិធីសាស្ត្រដើម្បីស្តារសេដ្ឋកិច្ចរបស់ខ្លួនដែលកំពុងជួបការលំបាក។

ក្រៅពីវិស័យការពារជាតិ និងថាមពល រុស្ស៊ីក៏ផ្តល់នូវទំនាក់ទំនងការទូតដ៏សំខាន់មួយដល់មីយ៉ាន់ម៉ាផងដែរ នៅពេលដែលទីក្រុងណៃពីដោ (Naypyidaw) កំពុងព្យាយាមពង្រីក និងធ្វើពិពិធកម្មបណ្តាញដៃគូអន្តរជាតិរបស់ខ្លួន។

លោក Marston បានមានប្រសាសន៍ថា៖ «រុស្ស៊ីដើរតួនាទីយ៉ាងសំខាន់នៅក្នុងបណ្តាញការទូតដ៏ទូលំទូលាយរបស់មីយ៉ាន់ម៉ា ដើម្បីកាត់បន្ថយការអាស្រ័យផលលើប្រទេសចិន និងដើម្បីពង្រឹងបណ្តាញដៃគូរបស់ខ្លួនចំពេលដែលប្រទេសនេះកំពុងប្រឈមមុខនឹងការឯកោពីអន្តរជាតិ និងការដាក់ទណ្ឌកម្មសេដ្ឋកិច្ចចំគោលដៅ»៕
ប្រភព៖CNA