ដោយ : បន្ទាយ
បន្ទាយមានជ័យ៖ នៅម៉ោង៧ព្រឹកថ្ងៃទី០៨ខែតុលាឆ្នាំ២០២៤ បណ្ឌិត កុលផេង វឌ្ឍនា អនុរដ្ឋលេខាធិការក្រសួងអប់រំ យុវជននិងកីឡា – ជាប្រធានគណៈមេប្រយោគទូទាំងប្រទេសប្រចាំខេត្តបន្ទាយមានជ័យ លោកអ៊ុ រាត្រី អភិបាលខេត្តបន្ទាយមានជ័យ និងប្រធានក្រុមការងារ អង្គភាពប្រឆាំងអំពើពុករលួយ ខេត្តបន្ទាយមានជ័យ លោកប្រធានមន្ទីរអប់រំ យុវជននិងកីឡាខេត្ត -ប្រធានគណ:មេប្រយោគទូទាំងខេត្តនិងមន្ត្រីជំនាញពាក់ព័ន្ធបានចូលរួមពិធីបើកវិញ្ញាសាដំបូងនៃការប្រឡងសញ្ញាប័ត្រមធ្យមសិក្សាទុតិយភូមិ ឆ្នាំ២០២៤។
ប្រតិភូតំណាងក្រសួងអប់រំ និងរដ្ឋបាលខេត្តបានជូនពរបេក្ខជន បេក្ខនារីប្រឡងឲ្យមានសុខភាពល្អ មានសុវត្ថិភាពនិងប្រឡងជាប់ ហើយក៏បានណែនាំដល់គណ:មេប្រយោគ គណៈ:កម្មការនិងបេក្ខជនអោយគោរព អនុវត្តអោយបានល្អតាមតួនាទី ភារកិច្ចដូចដែលក្រសួងអប់រំបានណែនាំរួចហើយ ។
សូមបញ្ជាក់ថា សម័យប្រឡងថ្ងៃទី៨ខែតុលាឆ្នាំ២០២៤ នៅខេត្តបន្ទាយមានជ័យមានបេក្ខជនចុះឈ្មោះប្រឡងឬក្នុងបញ្ជីសរុបចំនួន ៦.២៣៥នាក់ / ស្រី ៣.៥៦៩នាក់ ។ មណ្ឌលប្រឡងចំនួន៨ , បន្ទប់សរុបចំនួន១៧៦បន្ទប់ ។មណ្ឌលសំណេរទាំងនោះស្ថិតនៅក្រុងសិរីសោភ័ណ ជាទីប្រជុំជនខេត្ត ។
មណ្ឌលទាំងនោះមាន: ថ្នាក់វិទ្យាសាស្ត្រ មាន៣មណ្ឌល :
១-មណ្ឌលបឋមសិក្សាហ៊ុនសែន សុភី ២-មណ្ឌលវិទ្យាល័យហ៊ុនសែន ខ្លាកូន ៣-មណ្ឌលសាកលវិទ្យាល័យជាតិមានជ័យ និងថ្នាក់វិទ្យាសាស្ត្រសង្គម មាន៥ មណ្ឌល : ៤-មណ្ឌលវិទ្យាល័យសិរីសោភ័ណ ៥- មណ្ឌលវិទ្យាល័យសម្ដេចឪ ៦-មណ្ឌលសាកលវិទ្យាល័យគ្រប់គ្រងនិងសេដ្ឋកិច្ចសាខាខេត្តបន្ទាយមានជ័យ( UME ) ៧ -មណ្ឌលវិទ្យាល័យសកពនអូរអំបិលនិង ៨-មណ្ឌលអនុវិទ្យាល័យទឹកថ្លា ។
ក្នុងនោះដែរសមត្ថកិច្ចនគរបាល រាជអាវុធហត្ថបានចូលរួមថែរក្សាសន្តិសុខ សណ្តាប់ធ្នាប់ សុវត្ថិភាពនៅបរិវេណខាងក្រៅមណ្ឌល។ឯមន្ត្រីសុខាភិបាល គ្រូពេទ្យបានដាក់ប្រចាំការ ជាមួយរថយន្តសម្រាប់ការងារសង្គ្រោះនិងសុខភាព និងផ្នែកពាក់ព័ន្ធផ្សេងៗទៀត បានជួយលើការងារផ្តល់សេវានិងអន្តរាគមន៍ដូចជាការផ្ញើម៉ូតូកង់ឥតគិតថ្លៃ ផ្តល់ទឹកពិសាជាដើម ៕
