ដោយ៖ ព្រះអង្គខ្មៅ

បាត់ដំបង÷ សមត្ថកិច្ចចម្រុះបានឆ្មក់ចុះត្រួតពិនិត្យ ឆែកឆេរបង្ក្រាបករណីគ្រឿងញៀនឃាត់ខ្លួនបុរសម្នាក់ និងបានដកហូតកាំភ្លើងខ្លីមួយដើម ថ្នាំញៀនប្រភេទគ្រាប់ជិត ២ ០០០គ្រាប់។

ប្រភពព័ត៌មានបឋមពីសមត្ថកិច្ចបានបង្ហើបឲ្យថឹងថា÷ ករណីបង្ក្រាបបទល្មើសគ្រឿងញៀនជាក់ស្តែងនេះធ្វើឡើងនៅវេលាជិតម៉ោង ១២យប់ថ្ងៃទី ៧ ខែសីហា ឆ្នាំ ២០២៤ នៅលើកំណាត់ផ្លូវត្រង់ភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្តបាត់ដំបង។

ការបង្ក្រាបករណីរក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀនខាងលើនេះ កម្លាំងសមត្ថកិច្ចជំនាញស្នងការ រួមជាមួយកម្លាំងអធិការក្រុង ឃាត់ខ្លួនបានជនសង្ស័យម្នាក់ឈ្មោះឈួម សុខវណ្ណី ហៅ ឃ្លោក ភេទប្រុស អាយុ ៣៧ ឆ្នាំ មានទីលំនៅភូមិកគោ ឃុំជ្រៃ ស្រុកថ្មគោល ខេត្តបាត់ដំបង ។

ករណីដដែលក្រៅពីការឃាត់ខ្លួនជនសង្ស័យ កម្លាំងចម្រុះក៏ដកហូតបានវត្ថុពាក់ព័ន្ធមួយចំនួនទៀតរួមមាន៖ គ្រឿងញៀនគ្រាប់ពណ៌ផ្កាឈូកសរុបចំនួន ១៩៧៦ គ្រាប់, ថ្នាំដែលបែកខ្ទេចមួយចំនួនទៀត, កាំភ្លើងខ្លីម៉ាក ROLO មួយដើម មានគ្រាប់ ២៥គ្រាប់, ទូរសព្ទដៃ ៣គ្រឿង, រថយន្តម៉ាកកូរ៉ូឡាពណ៌ស្លែបិទស្គុតពណ៌ស ពាក់ផ្លាកលេខ ភ្នំពេញ ២G-៧៧៤១ មួយគ្រឿងផងដែរ។

ចំពោះមុខជនសង្ស័យ ក៏ដូចជាវត្ថុតាង ត្រូវកម្លាំងអធិការនគរបាលក្រុង កំពុងបំពេញបែបបទកសាងសំណុំរឿងអនុវត្តតាមនីតិវិធី៕