ដោយៈសិរីមតី
ភ្នំពេញ៖លោកបណ្ឌិត ហ៊ុន ម៉ាណែត សមាជិកគណៈអចិន្ត្រៃគណៈកម្មាធិការកណ្តាល និងជាប្រធានយុវជនគណបក្សប្រជាជនកម្ពុជាថ្នាក់ កណ្តាលនៅថ្ងៃទី២៨ ខែឧសភា ឆ្នាំ២០២៣ បានជួបសំណេះសំណាលជាមួយសកម្មជនយុវជនផែនសហគ្រិនវ័យក្មេង នៃក្រុមការងារយុវជនគណបក្សប្រជាជនកម្ពុជារាជធានីភ្នំពេញ នៅទីស្នាក់ការកណ្តាលគណបក្សប្រជាជនកម្ពុជា រាជធានីភ្នំពេញ។
នាឱកាសនោះដែរ លោកបណ្ឌិត ហ៊ុន ម៉ាណែត បានថ្លែងថា ឱកាសរបស់យុវជនបច្ចុប្បន្ន ដែលកំពុងរស់នៅប្រកបដោយសេចក្តីសុខ និងបានសិក្សារៀនសូត្រអភិវឌ្ឍសមត្ថភាព ក្រោមម្លប់នៃសុខសន្តិភាព ស្ថិរភាព និងសិទ្ធសេរីភាពគ្រប់បែបយ៉ាង គឺកើតឡើងដោយសារការលះបង់ និងវីរភាពរបស់យុវជនជំនាន់មុន ហើយក៏ជាថ្នាក់ដឹកនាំបច្ចុប្បន្នផងដែរ។ យុវជនជំនាន់មុន គឺជាជំនាន់យុវជនដែលបានបាត់ឱកាសដោយសារប្រទេសធ្លាក់ចូលទៅក្នុងសង្គ្រាមបែកបាក់ និងមានហានិភ័យដល់អាយុជីវិតគ្រប់ពេលវេលា ក៏ប៉ុន្តែជាយុវជនជំនាន់គំរូប្រកបដោយលក្ខណ សម្បត្តិ ៣យ៉ាង គឺ៖ ទី១. ក្តីសង្ឃឹម គឺមិនអង្គុយបន់ព្រះរង់ចាំសេចក្តីស្លាប់ពីរបបប៉ុលពតឡើយ, ទី២. មានការតស៊ូជម្នះរាល់ឧបសគ្គដើម្បីបុព្វហេតុជាតិ និងប្រជាជន និងទី៣. មានចក្ខុវិស័យដឹកនាំច្បាស់លាស់ក្នុងការរំដោះប្រទេសជាតិ, ស្តារកសាងជាតិ, ការពារជាតិ និងអភិវឌ្ឍជាតិ។
លោកបណ្ឌិត ហ៊ុន ម៉ាណែត បានបន្តថា ដូច្នេះក្នុងនាមជាយុវជនដែលកំពុងរស់ក្នុងសម័យតេជោសន្តិភាព, យើងទាំងអស់គ្នាចាំបាច់ត្រូវមើលគំរូវីរភាពរបស់យុវជនជំនាន់មុន ដោយផ្សារភ្ជាប់នឹងតថភាពបច្ចុប្បន្ន និងគោលដៅទៅអនាគត និងមិនភ្លេចសោះឡើយនូវអតីតកាលដ៏សែនជូរចត់វេទនាដោយសារ សង្គ្រាម និងជម្លោះបែកបាក់។ ក្នុងន័យនេះ, យើងទាំងអស់គ្នាចងចាំជានិច្ចនូវគុណបំណាច់នៃពលិកម្មដ៏ធំធេងរបស់យុវជនជំនាន់មុន ហើយប្តេជ្ញាបន្តស្មារតី និងសកម្មភាពដ៏ពិសិដ្ឋនេះជារៀងដរាប។
បន្ថែមពីនេះលោកបណ្ឌិត ហ៊ុន ម៉ាណែត បានបញ្ជាក់ថា ក្នុងវិស័យធុរកិច្ច, វិស័យឯកជន រួមទាំងសហគ្រិនវ័យក្មេង គឺសរសៃឈាមនៃចរន្តសេដ្ឋកិច្ចជាតិ។ ពិតណាស់, កំណើនសេដ្ឋកិច្ចអាចមានឡើងចុះ ប៉ុន្តែអ្វីដែលសំខាន់គឺនិរន្តរភាពនៃសុខសន្តិភាព, ស្ថិរភាព និងសិទ្ធិសេរីភាព ដែលចាំបាច់ត្រូវថែរក្សាឱ្យបានដាច់ខាតទោះក្នុងតម្លៃណាក៏ដោយ។ រាជរដ្ឋាភិបាល គឺជាអ្នកដើរតួនាទីស្នូលក្នុងការបង្កលក្ខណៈតាមរយៈការការពារនូវបរិស្ថានគ្រប់ដណ្តប់ដ៏ចាំបាច់នេះ ប៉ុន្តែយ៉ាងណាក៏ដោយ យើងជាយុវជនក៏ត្រូវចូលរួមចំណែកអនុវត្តតួនាទីរៀងខ្លួនៗ និងគាំទ្រដល់បុព្វហេតុរួមមួយនេះ ដើម្បីឧត្តមប្រយោជន៍របស់ជាតិ និងប្រជាជនយើង។
លោកបណ្ឌិត ហ៊ុន ម៉ាណែត បានថ្លែងថា ក្នុងនាមថ្នាក់ដឹកនាំគណបក្សប្រជាជនកម្ពុជា និងក្រុមការងារយុវជនគណបក្សថ្នាក់កណ្តាល, សូមថ្លែងអំណរគុណដល់បងប្អូនសមាជិកសហគ្រិនវ័យក្មេងទាំងអស់ ដែលបានសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា ដោយសុឆន្ទៈ និងភ្ជាប់ជាមួយនឹងការអាណិត, ស្រលាញ់ និងជឿជាក់លើថ្នាក់ដឹកនាំ និងគណបក្ស ដើម្បីបន្តដឹកនាំនាវាកម្ពុជាឆ្ពោះទៅ កាន់ការអភិវឌ្ឍ និងវិបុលភាព។ ដើម្បីឈានទៅសម្រេចបាននូវគោលដៅរួមនេះ, ក្នុងនាមជាយុវជនរបស់គណបក្ស និងយុវជនសម័យតេជោសន្តិភាព, យើងគប្បីប្តេជ្ញាថែរក្សាអ្វីដែលកំពុងមាន ពីព្រោះយើងបានដឹងហើយថា យុវជនជំនាន់តស៊ូ បានបង្កើតឱកាសគ្រប់យ៉ាងឱ្យយើងដូចថ្ងៃនេះ ដូច្នេះយើងត្រូវរួមគ្នាថែរក្សា និងការពារសមិទ្ធផលទាំងកុំឱ្យបាត់បង់ ព្រមទាំងជំរុញសមិទ្ធផលវិជ្ជមានឱ្យច្រើនឡើងបន្ថែមទៀត។
ទន្ទឹមនឹងនេះដែរលោកបណ្ឌិតហ៊ុន ម៉ាណែត បានបញ្ជាក់ថា៖សមិទ្ធផលធំដែលគណបក្សប្រជាជនកម្ពុជាបានកសាងសម្រាប់ជាតិនិងប្រជាជន គឺការបញ្ចប់សង្គ្រាមរ៉ាំរ៉ៃដែលបានអូសបន្លាយជាង ៥០០ឆ្នាំក្នុងដានប្រវត្តិសាស្ត្រ, ការសង្គ្រោះជីវិតប្រជាជនពីរណ្តៅមរណៈនៃរបបប្រល័យពូជសាសន៍ប៉ុលពត ជាពិសេសការសម្រេចបាននូវការបង្រួបបង្រួមជាតិ ឯកភាពទឹកដី នៅក្រោមរាជរដ្ឋាភិបាលតែមួយ និងរដ្ឋធម្មនុញ្ញ តាមរយៈ «នយោបាយឈ្នះ-ឈ្នះ» ក៏ដូចជាការអភិវឌ្ឍប្រទេសជាតិដោយធានាបាននូវស្ថិរភាពនយោបាយ និងម៉ាក្រូសេដ្ឋកិច្ច រហូតជីវភាពប្រជាជនមានការរីកចម្រើនសម្បូរសប្បាយ ព្រមជាមួយនឹងទស្សនវិស័យក្នុងការក្លាយទៅជាប្រទេសមានចំណូលខ្ពស់ ក្នុងឆ្នាំ២០៥០។
លោកគ្រូធំបណ្ឌិត អោម សេងបូរ៉ា ប្រធានផែនសហគ្រិនវ័យក្មេងរាជធានីភ្នំពេញ បានមានប្រសាសន៍ថា៖នេះជាថ្ងៃប្រវត្តិសាស្ត្រដ៏អស្ចារ្យប្រកបដោយសេចក្តីរំភើបរីករាយក្រៃលែង។ត្តមានរបស់ឯកឧត្តមបណ្ឌិតប្រធានក៏ដូចជាថ្នាក់ដឹកនាំទាំងអស់ដែលមានវត្តមាននៅក្នុងពិធីនេះគឺពិតជាសក្ខីភាពបង្ហាញឱ្យឃើញយ៉ាង ច្បាស់ពីការយកចិត្តទុកដាក់ និងការផ្សាភ្ជាប់មនោសញ្ចេតនានៃក្តីស្រលាញ់ និងការ ឱ្យតម្លៃរបស់ថ្នាក់ដឹកនាំជាន់ខ្ពស់របស់គណបក្សប្រជាជនកម្ពុជាដល់សមាជិករបស់ផែនសហគ្រិនវ័យនៃក្រុមការងារយុវជនគណបក្សប្រជាជនកម្ពុជារាជធានីភ្នំពេញក៏ដូចជាសមាជិករបស់ផែនសហគ្រិនវ័យនៃក្រុមការងារយុវជនគណបក្សប្រជាជនកម្ពុជាមកពីតាមបណ្តាខេត្តមួយចំនួនដែលបានចូលរួមនៅក្នុងកម្មវិធីដ៏វិសេសវិសាលនៅថ្ងៃនេះ។
លោកគ្រូធំបណ្ឌិត បានជម្រាបថា៖ផែនសហគ្រិនវ័យក្មេងនៃក្រុមការងារយុវជនគណបក្សប្រជាជនកម្ពុជារាជធានីភ្នំពេញ បាន កើតឡើងជាផ្លូវការ នៅថ្ងៃទី ២១ ខែកុម្ភៈ ឆ្នាំ២០២២ ដែលឆ្លើយតបទៅនឹងតម្រូវការនៃរចនាសម្ព័ន្ធដឹកនាំរបស់យុវជនគណបក្សប្រជាជនកម្ពុជាថ្នាក់កណ្ដាលគណបក្សប្រជាជនកម្ពុជានៅគ្រប់រាជធានី ខេត្ត។
លោកគ្រូធំបណ្ឌិត អោម សេងបូរ៉ា បានគូសបញ្ជាក់ថា៖ផែនសហគ្រិនវ័យក្មេងនៃក្រុមការងារយុវជនគណបក្សប្រជាជនកម្ពុជារាជធានីភ្នំពេញមានទស្សនវិស័យ”ចង់ឃើញកម្ពុជាក្លាយជាប្រទេសអ្នកមានបានឆាប់រហ័ស “ដែលគាំទ្រទៅនឹងគោលដៅនិងគោលនយោបាយរបស់រាជរដ្ឋាភិបាលដែលដឹកនាំដោយគណបក្សប្រជាជនកម្ពុជាចង់ឱ្យកម្ពុជាមានចំណូលមធ្យមកម្រិតខ្ពស់នៅឆ្នាំ២០៣០និងក្លាយទៅជាប្រទេសអ្នកមានចំណូលខ្ពស់នៅឆ្នាំ ២០៥០។ដើម្បីសម្រេចបាននូវទស្សនវិស័យនេះ ផែនសហគ្រិនវ័យក្មេងមានបេសកកម្ម”កសាងកម្លាំងទ័ពសេដ្ឋកិច្ចដើម្បីកម្ពុជាតាមរយៈការប្រមូលផ្ដុំកម្លាំងសហគ្រិនវ័យក្មេងឱ្យចូលរួមគាំទ្រគណបក្សប្រជាជនកម្ពុជា ក្នុងគោល បំណងចូលរួមចំណែកកសាងការពារសុខសន្តិភាពនិងជាយន្តការដ៏សំខាន់ក្នុងការជួយកសាងសមត្ថភាពនិងដោះស្រាយបញ្ហារបស់សហគ្រិនលើគ្រប់វិស័យដើម្បីធ្វើឱ្យសេដ្ឋកិច្ចជាតិមានភាពរឹងមាំ និងរីកចម្រើនបានឆាប់រហ័ស”។
លោកបណ្ឌិត អោម សេងបូរ៉ា បានលើកឡើងថា៖ផែនសហគ្រិនវ័យក្មេងប្តេជ្ញាចិត្តបង្កើតផលប្រយោជន៍ជូនសង្គមជាតិក៏ដូចជាគណបក្សប្រជាជនកម្ពុជាក្នុងនោះជួយកសាង ការពារ ស្ថិរភាពនយោបាយ សុខសន្តិភាព និងការអភិវឌ្ឍសេដ្ឋកិច្ចជាតិឱ្យមានភាពរឹងមាំនិងរីកចម្រើនបានឆាប់រហ័ស,ចូលរួមយ៉ាងសកម្មជាមួយរាជរដ្ឋា ភិបាល ដើម្បីឱ្យប្រទេសកម្ពុជាយើងសម្រេចបាននូវគោលដៅ ប្រែក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងក្លាយទៅជាប្រទេសមានចំណូលខ្ពស់នៅឆ្នាំ ២០៥០ក៏ដូចជាជួយសហគ្រិនដែលជាកម្លាំងទ័ពសេដ្ឋកិច្ចជាតិឱ្យមានសមត្ថភាពខ្ពស់ រឹងមាំនិងរីកចម្រើនបានឆាប់រហ័សដើម្បីពួកគេបង់ពន្ធបង្កើតចំណូលជូនរដ្ឋបានច្រើនបង្កើតការងារធ្វើនិងប្រាក់ចំណូលជូនប្រជាជនបានច្រើនព្រមទាំងបណ្តុះបណ្តាលធនធានមនុស្សកម្ពុជាឱ្យមានគុណភាពនៅកន្លែងការងារបាន ច្រើន បង្កើតផលិតផលសេវាកម្មឆ្លើយតបទៅនឹងតម្រូវការរបស់មនុស្សជាតិ និងសង្គមជាតិបាន ច្រើននិងជាមូលដ្ឋានគ្រឹះដ៏រឹងមាំរបស់សេដ្ឋកិច្ចជាតិយូរអង្វែងកាយចិត្ត ក្នុងការធ្វើកិច្ចការងារ សប្បុរសធម៌ មនុស្សធម៌ជួយដល់ជនរងគ្រោះ និងងាយរងគ្រោះនៅក្នុងសង្គមនិង ជួយលើកកិត្តិយសកេរ្តិ៍ឈ្មោះរបស់កម្ពុជានៅលើឆាកជាតិ និងអន្តរជាតិ តាមរយៈទំនាក់ទំនងធុរកិច្ចក្នុងវិស័យឯកជន ។
សូមជម្រាបថា៖តាំងពីពេលចាប់ផ្តើមរហូតមកដល់ពេលនេះ ផែនសហគ្រិនវ័យក្មេងនៃក្រុមការងាយុវជនគណបក្សប្រជាជនកម្ពុជារាជធានីភ្នំពេញបានធ្វើសកម្មភាពអស់រយៈពេលចំនួន១៥ខែហើយ។ គិតត្រឹមថ្ងៃទី២៥ ខែឧសភា ឆ្នាំ២០២៣ផែនសហគ្រិនវ័យក្មេងមានសាខាចំនួន ៣៦សាខា មានសមាជិកសរុបចំនួន៦៦៩០នាក់ និងសមាជិកដែលជាសហគ្រិនមានចំនួន ២៥៦៨នាក់(ស្មើនឹង៣៨,៣៨%នៃសមាជិកសរុប) ភាគច្រើនក្នុងចំណោមពូកគាត់គឺជាម្ចាស់អាជីវកម្មខ្នាតតូចនិងមធ្យម ដែលប្រកបមុខរបរលើគ្រប់វិស័យ៕