កណ្តាល៖ជនសង្ស័យបានលួចម៉ូតូជិះរត់ពីស្រុកកណ្ដាលស្ទឹង ខេត្តកណ្ដាល ត្រូវសមត្ថកិច្ចខណ្ឌដង្កោ រាជធានីភ្នំពេញចាប់បាននៅម្តុំស្តុបផ្សារថ្នល់បត់ សង្កាត់ដង្កោ ខណ្ឌដង្កោ កាលពីយប់ថ្ងៃទី២២ ខែឧសភា។
សមត្ថកិច្ចបានឱ្យដឹងថា ជនសង្ស័យឈ្មោះ រួត ប៉ុនរឿត អាយុ៣០ឆ្នាំ ស្នាក់នៅម្តុំវត្តនាគវ័ន្ត ខណ្ឌទួលគោក ។សមត្ថកិច្ចដកហូតម៉ូតូម៉ាកហុងដាផ្លាកលេខ ភ្នំពេញ1CY 0527 ជារបស់ជនរងគ្រោះ រួមទាំងឧបករណ៍សម្រាប់កាច់កម៉ូតូមួយឈុត។ចំណែកម្ចាស់ម៉ូតូឈ្មោះ ហួង លី អាយុ៦០ឆ្នាំ នៅភូមិតាឡឹប ឃុំត្រពាំងវែង ស្រុកកណ្តាលស្ទឹង ខេត្តកណ្ដាល។
លោកវរសេនីយ៍ទោ ជាង ហ៊ុកសែ អធិការរងនគរបាលខណ្ឌដង្កោបានឱ្យដឹងថា មុនកើតហេតុ បុរសរងគ្រោះបានទុកម៉ូតូនៅមុខផ្ទះរបស់ខ្លួនដោយមិនបានដកសោចេញពីម៉ូតូទេ។ពេលនោះជនសង្ស័យឃើញក៏ឆ្លៀតឱកាសធ្វើជាដើរចូលបន្លំទៅទិញសាប៊ូ ព្រោះផ្ទះជនរងគ្រោះមានលក់គ្រឿងចាប់ហួយ។
ពេលម្ចាស់ភ្លេចខ្លួន ស្រាប់តែជនសង្ស័យបញ្ឆេះម៉ូតូជិះរត់គេចខ្លួនតែម្តងរហូតចូលដល់ទឹកដីខណ្ឌដង្កោ កម្លាំងមូលដ្ឋានបានចេញអន្តរាគមន៍ជួយដេញតាម ទើបឃាត់ខ្លួនជនសង្ស័យបាន និងដកហូតម៉ូតូរបស់ជនរងគ្រោះមកវិញ។ករណីនេះគឺកើតហេតុនៅស្រុកកណ្ដាលស្ទឹង ខេត្តកណ្ដាល ក្រោយពេលសួរនាំរួច ទើបនគរបាលប៉ុស្តិ៍ដង្កោបានប្រគល់ឱ្យខាងស្រុកកណ្ដាលស្ទឹងយកទៅបន្តនីតិវិធី៕