អ៊ុយក្រែនអះអាងកាលពីថ្ងៃអាទិត្យទី ១៤ ខែឧសភា ឆ្នាំ២០២៣ថា រំដោះបានទីតាំងឈរជើងជាង១០ពីរុស្ស៊ីមកវិញនៅតំបន់ភាគខាងជើង និងខាងត្បូងនៃជាយទីក្រុងបាក់មុត។
តាមការចេញផ្សាយដោយកាសែតជាតិអ៊ុយក្រែន កងកម្លាំងការពារអ៊ុយក្រែនបានចាប់យកទីតាំងរុស្ស៊ីជាងដប់កន្លែងនៅភាគខាងជើង និងខាងត្បូងនៃជាយក្រុង Bakhmutយកមកវិញ។ ពួកគេបានឈូសឆាយតំបន់ព្រៃដ៏ធំមួយក្នុងស្រុក Ivanivske និងព្រមទាំងបានចាប់ខ្លួនអ្នកកាន់កាប់ទៀតផង។ ប្រភពពីអនុរដ្ឋមន្ត្រីក្រសួងការពារជាតិអ៊ុយក្រែន Hanna Maliar ក្នុងទូរលេខ Telegram បាននិយាយថា “យើងបន្តដំណើរទៅមុខនៅជាយក្រុងខាងមុខបាក់មុត។ សព្វថ្ងៃនេះ អង្គភាពរបស់យើងបានចាប់យកទីតាំងសត្រូវច្រើនជាងដប់នៅភាគខាងជើង និងខាងត្បូងនៃជាយក្រុង Bakhmut ហើយ “ទាហានសត្រូវមកពីផ្នែកផ្សេងៗត្រូវបានចាប់ខ្លួន”។
ព័ត៌មានលម្អិតមន្រ្តីរូបនេះ មិនបានបញ្ជាក់ថាតើទាហានរុស្ស៊ីប៉ុន្មាននាក់ដែលត្រូវបានចាប់ខ្លួននោះទេ តែបានបញ្ជាក់ថា ស្ថានភាពកំពុងតានតឹង និងឡើងកម្តៅខ្លាំង។ មានការប្រយុទ្ធគ្នាខ្លាំង ខណៈការរំដោះបានធ្វើឡើងទៅដល់ចំណុចសំបុកទ័ពរុស្ស៊ី៕
ប្រភព៖ Ukrainska Pravda
ប្រភពរូប៖Ukrainska Pravda
ប្រែសម្រួល៖សុខ តុលា