ភ្នំពេញ៖រថយន្តកំពុងបត់ឆ្លងផ្លូវត្រូវម៉ូតូឌុបគ្នាបើកយ៉ាងលឿន ក៏ជ្រុលបុកពេញទំហឹងបណ្តាលឱ្យបុរសម្នាក់ស្លាប់ ម្នាក់ទៀតរងរបួសធ្ងន់ ដែលគ្រោះថ្នាក់នេះបានកើតឡើងនៅក្បែរស្ពានទី៦ តាមផ្លូវជាតិលេខ៦A ក្នុងសង្កាត់ព្រែកលាភ ខណ្ឌជ្រោយចង្វា កាលពីវេលាទៀបភ្លឺថ្ងៃទី១៥ ខែឧសភា។
កម្លាំងគោលដៅបានឱ្យដឹងថា ជនរងគ្រោះដែលស្លាប់ឈ្មោះ ខន ដាវីត អាយុ ១៩ឆ្នាំ ជាជាងជួសជុលរថយន្ត។ចំណែកអ្នករងរបួសឈ្មោះ វិត ចិត្រា អាយុ១៨ឆ្នាំ ជាកម្មកររោងចក្រ ពួកគេទាំង២នាក់មានកន្លែងកំណើតនៅភូមិជើងព្រៃ ស្រុកស្រីសន្ធរ ខេត្តកំពង់ចាម។
មុនកើតហេតុ គេឃើញរថយន្តម៉ាក FORD RANGER ផ្លាកលេខ ភ្នំពេញ2BO-3069 បើកតាម ផ្លូវជាតិលេខ៦ ពីត្បូងទៅជើង។មកដល់កន្លែងខាងលើរថយន្តនេះក៏បានបត់ឆ្វេងឆ្លងផ្លូវ ស្រាប់តែម៉ូតូម៉ាកហុងដាឌ្រីមផ្លាកលេខភ្នំពេញ1GX-5919 ជិះឌុបគ្នា២នាក់តាមផ្លូវជាតិលេខ៦A ទិសដៅបញ្រ្ចាសគ្នា ម៉ូតូក៏ជ្រុលបុករថយន្តចំហៀងខាងក្រោយពេញទំហឹង បណ្តាលឱ្យអ្នកបើកម៉ូតូបែកក្បាលស្លាប់ភ្លាមៗ អ្នករួមដំណើររងរបួសធ្ងន់៕ដោយ៖វិចិត្រ
