ដោយ៖ សហការី
លោហធាតុដែលគេជឿថាជាអាចម៍ផ្កាយបានធ្លាក់ទម្លុះដំបូលផ្ទះអ្នកស្រុក នៅចំកណ្តាលរដ្ឋ New Jersey សហរដ្ឋអាម៉េរិក ធ្វើឲ្យមានការភ្ញាក់ផ្អើលយ៉ាងខ្លាំង។
ម្ចាស់ផ្ទះបានរកឃើញថ្មខ្មៅមួយដុំមានទំហំប៉ុនមើមដំឡូង ធ្លាក់លើដំបូលផ្ទះទម្លុះចូលទៅក្នុងផ្ទះចំលើគ្រែដេក ដែលពួកគេបានសន្និដ្ឋានថាជាដុំអាចម៍ផ្កាយ ព្រោះវាមានសភាពក្តៅនៅឡើយ។
ប៉ូលិសបាននិយាយថា មិនមានមនុស្សរងរបួសទេ ហើយក៏មិនមានការខូចខាតលំនៅដ្ឋានធ្ងន់ធ្ងរនោះដែរ។ លំនៅដ្ឋាននេះស្ថិតនៅក្នុងទីក្រុង Hopewell ភាគខាងជើងនៃរដ្ឋធានី Trenton។ លោហធាតុនោះមានទំហំប្រហែល ៤ គុណនឹង ៦ អ៊ីញ មានទម្ងន់ប្រហែល ៤ ផោន ស្មើនឹង ១.៨ គីឡូក្រាម។ Suzy Kop ដែលជាម្ចាស់ផ្ទះបាននិយាយថា ដំបូងពួកគាត់គិតថាមាននរណាម្នាក់គប់ដុំថ្មចូលក្នុងបន្ទប់គេងរបស់គាត់ ប៉ុន្តែភ្លាមៗក៏ដឹងថាវាមិនមែនជាករណីហ្នឹងទេ។ ពេលនេះក្រុមគ្រួសារគ្រោងជួបជាមួយអ្នកជំនាញខាងតារាសាស្ត្រ ដើម្បីពិនិត្យមើលលោហធាតុនេះបន្ថែមទៀត។
អ្នកស្រី Kop បានប្រាប់ Know Your World ថា យើងគិតថាវាជាថ្មអាចម៍ផ្កាយធ្លាក់មក បុកចំកម្រាលឥដ្ឋ ធ្វើឲ្យខូចខាតទាំងស្រុង វាខ្ទាតឡើងប៉ះនឹងពិតាន ហើយក៏ធ្លាក់នៅលើឥដ្ឋ” ។
ខ្ញុំបានប៉ះដុំលោហៈនេះព្រោះគិតថាវាជាថ្មដែលធ្លាក់មកដោយចៃដន្យ ពេលខ្ញុំប៉ះវា ថ្មមួយដុំនេះនៅក្តៅនៅឡើយ។ ស្រ្តីដដែលបាននិយាយទៀតថា មន្រ្តី hazmat ក៏បានឆ្លើយតបថា ក្នុងករណីនេះពួកគេបានប៉ះពាល់នឹងសារធាតុវិទ្យុសកម្ម ប៉ុន្តែយោងតាមការត្រួតពិនិត្យ គឺមានលទ្ធផលអវិជ្ជមានទាំងអស់។
ប្រធានតារាវិទូនៅវិទ្យាស្ថាន Franklin លោក Derrick Pitts បាននិយាយថា ថ្មនេះអាចមានអាយុពី ៤ ទៅ ៥ ពាន់លានឆ្នាំ។ វាបានគោចរជុំវិញលំហអាកាសគ្រប់ពេល ឥឡូវនេះវាបានមកដល់ផែនដី ហើយវាបានធ្លាក់មកលើគន្លងរបស់វា ប៉ុន្តែវាពិតជាបានវាយប្រហារមកលើផ្ទះអ្នកស្រុក ហើយមនុស្សម្នាអាចកាន់បានពិតជាមិនធម្មតាទេ។ វាបានកើតឡើងដោយកម្រណាស់នៅក្នុងប្រវត្តិសាស្ត្រ៕
