ដោយៈសិរីមតី
ភ្នំពេញ៖ ចាប់ពីឆ្នាំ២០២៩តទៅ នាវាដឹកទំនិញគ្រប់ប្រភេទមកពីជុំវិញពិភពលោក អាចចូលចតនៅកំពង់ផែអន្តរជាតិព្រះសីហនុបានដោយគ្មានឧបសគ្គជម្រៅទឹក ទីតាំងផ្ទុកកុងទីន័រ ឬបញ្ហចំណតនោះឡើយ។នេះជាការបញ្ជាក់របស់លោក លូ គឹមឈុន ប្រតិភូរាជរដ្ឋាភិបាលទទួលបន្ទុកអគ្គនាយកកំពង់ផែស្វយ័តក្រុងព្រះសីហនុ។
លោក លូ គឹមឈុន បានឱ្យដឹងថា ទន្ទឹមនឹងសកម្មភាពពាណិជ្ជកម្ម ដឹកទំនិញចេញចូលរៀងរាលថ្ងៃនោះ កំពង់ផែស្វយ័តក្រុងព្រះសីហនុក៏មមាញឹកក្នុងការអភិវឌ្ឍទីតាំងចំណត ទីតាំងផ្ទុកកុងទីន័រ បង្កើនជម្រៅផ្លូវទឹកឱ្យកាន់តែជ្រៅ ដើម្បីឆ្លើយតបនឹងការរីកចម្រើនផ្នែកពាណិជ្ជកម្មអន្តរជាតិ ការដឹកជញ្ជូន និងការសម្រេចឱ្យបានតាមផែនការ អនុញ្ញាតឱ្យនាវាដឹកទំនិញគ្រប់ធុនចូលចតបាន។ លោកបញ្ជាក់ថា មហិច្ឆតានេះនឹងសម្រេចបាននៅឆ្នាំ២០២៩តទៅ។
លោកបានឱ្យដឹងផងដែរថា៖ នៅឆ្នាំ២០២៤ខាងមុខ រាជរដ្ឋាភិបាលនឹងអនុវត្តការធ្វើផែចំណតថ្មីមួយទៀត ដែលធ្វើឱ្យសមត្ថភាពផ្ទុកកុងទីន័រកើនឡើង ៣៥ភាគរយបន្ថែមទៀត បើធៀបនឹងពេលបច្ចុប្បន្ន។ បច្ចុប្បន្ន នាវាដឹកទំនិញធុនធំចូលចតនៅកំពង់ផែព្រះសីហនុ បានតែប្រមាណ១៨ភាគរយប៉ុណ្ណោះ។
លោកបានបន្តថា នៅឆ្នាំ២០២៦ កំពង់ផែស្វយ័តក្រុងព្រះសីហនុ នឹងមានសមត្ថកិច្ចប្រហាក់ប្រហែលជាមួយកំពង់ផែប្រទេសដទៃក្នុងតំបន់ និងអាចឱ្យនាវាដឹកទំនិញក្នុងតំបន់ប្រមាណ ៩៣ភាគរយអាចចូលចតបាន ដែលធ្វើឱ្យថ្លៃដឹកជញ្ជូនថយចុះប្រមាណ ២០០ដុល្លារក្នុងមួយកុងទីន័រ ព្រមទាំងធ្វើឱ្យភាពប្រកួតប្រជែងពាណិជ្ជកម្មជាតិ មានការកើនឡើងបន្ថែមទៀត ហើយក៏អាចទាក់ទាញវិនិយោគមកប្រទេសកម្ពុជាច្រើនបន្ថែម ទៀតដែរ។
លោកបន្តទៀតថា នៅឆ្នាំ២០២៨ កម្ពុជានឹងធ្វើផែចំណតមួយថ្មីទៀត ដែលមានជម្រៅទឹក១៦.៥ម៉ែត្រ ដល់ពេលនោះទំនិញដែលដឹកទៅមកជុំវិញពិភពលោក ពិសេសសហរដ្ឋអាមេរិក មួយចំណែកនៃទ្វីបអឺរ៉ុប ក៏ដូចជាទ្វីបអាស៉ី នឹងអាចចូលចតទៅមកកំពង់ផែស្វយ័តក្រុងព្រះសីហនុ បានដោយពុំមានឧបសគ្គជម្រៅទឹកឡើយ។
លោកអគ្គនាយក លូ គឹមឈុន បានសង្កត់ធ្ងន់ដែរថា នៅឆ្នាំ២០២៩ខាងមុខន រាជរដ្ឋាភិបាលនឹងសាងសង់ចំណតកំពង់ផែថ្មីមួយទៀត ដែល មានជម្រៅទឹកដល់ទៅ១៧.៥ម៉ែត្រ ដើម្បីធានាថានាវាដឹកទំនិញគ្រប់ធុនមកពីជុំវិញពិភពលោក អាចចូលចតនៅកំពង់ផែស្វយ័តក្រុងព្រះសីហនុបានទាំងអស់ ដោយពុំមានឧបសគ្គអ្វីទាំងអស់ រាប់ទាំងជម្រៅទឹក ការចូលចត និងចំណតផ្ទុកកុងទីន័រ។
លោក លូ គឹមឈុន បានថ្លែងយ៉ាងដូច្នេះថា «ចាប់ពីឆ្នាំ២០២៦ គឺយើងប្រហាក់ប្រហែលជាមួយកំពង់ផែប្រទេសជុំវិញ ហើយចាប់ពីឆ្នាំ២០២៩ទៅ គឺយើងដូចគេដូចឯងដែរហើយ ពេលនោះកប៉ាល់មកពីជុំវិញពិភពលោក នឹងអាចចូលចតនៅកំពង់ផែយើងបានទាំងអស់ ដោយពុំមានឧបសគ្គអ្វីទាំងអស់»។
អគ្គនាយកកំពង់ផែស្វយ័តក្រុងព្រះសីហនុ មានសុទិដ្ឋិនិយមថា នៅពេលនាវាដឹកទំនិញគ្រប់ធុន អាចចូលចតនៅកំពង់ផែស្វយ័តក្រុងព្រះ សីហនុបានហើយ នោះនឹងធ្វើឱ្យថ្លៃដឹកជញ្ជូនតាមផ្លូវ សមុទ្រធ្លាក់ចុះជាងបច្ចុប្បន្ន ដែលជាហេតុនាំទៅដល់ការបង្កើនភាពប្រកួតប្រជែងធំមួយ សម្រាប់វិស័យពាណិជ្ជកម្មជាតិ បង្កើនផលចំណេញដល់ផ្នែកសេដ្ឋកិច្ចរាប់រយលានដុល្លារ, លោកថា បើតាមការសិក្សាគឺរហូតដល់ជាង ៣៥០លានដុល្លារក្នុងមួយឆ្នាំ។
ម្យ៉ាងទៀត វាក៏នឹងជួយទាក់ទាញអ្នកវិនិយោគមកពីក្រៅប្រទេស ឱ្យចូលមកបណ្ដាក់វិនិយោគនៅក្នុងប្រទេសកម្ពុជាថែមទៀតដែរ ពីព្រោះក្រុមហ៊ុនរបស់ពួកគេនឹងងាយស្រួល ក្នុងការដឹកវត្ថុធាតុដើមចូល និងដឹកផលិតផលសម្រេចចេញទៅវិញ ដោយមិនចាំបាច់ឆ្លងកាត់បណ្ដាក់ជាមួយកំពង់ផែប្រទេសផ្សេងឡើយ, នេះគឺជាផលចំណេញសម្រាប់ជាតិយ៉ាងធំ៕
