ដោយៈសិរីមតី
ភ្នំពេញ៖ក្រសួងសុខាភិបាលបានអនុញ្ញាតិឱ្យមានការ បង្កើតមន្ទីរពេទ្យ ឬគ្លីនិក ឬមជ្ឈមណ្ឌលវេជ្ជសាស្ត្រឯកជនទំនើប ដើម្បីបំពេញសេចក្តីត្រូវការផ្នែកសេវាសុខាភិបាលចូលរួមកាត់បន្ថយនូវការស្វែងរកសេវាសុខាភិបាលនៅក្រៅប្រទេស ដែលមានបន្ទុកចំណាយខ្ពស់សម្រាប់ ពលរដ្ឋកម្ពុជា។នេះជាប្រសាសន៍លើកឡើងរបស់លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិកាក្រសួងសុខាភិបាល។
ថ្លែងក្នុងពិធីបើកសម្ពោធជាផ្លូវការនៃមជ្ឈមណ្ឌលវជ្ជសាស្តសាន់រ៉ាយស៍សែនសុខកាលពីល្ងាចថ្ងៃទី២៥ខែមេសានៅផ្សារទំនើបអ៊ីអនម៉លលោកស្រីរដ្ឋលេខាធិការ បានមានប្រសាសន៍ថា៖ប្រមុខរាជរដ្ឋាភិបាលកម្ពុជាបានខិតខំប្រឹងប្រែងពង្រឹង និងកែលំអប្រព័ន្ធសុខាភិបាលបន្ថែម ដើម្បីបំពេញតម្រូវការសេវាពិនិត្យ និងព្យាបាលជូនដល់ប្រជាជនឱ្យបានទាន់ពេលវេលា មានបច្ចេកទេសកាន់តែទំនើបស្របតាមការវិវត្តនៃបច្ចេកវិទ្យាវេជ្ជសាស្ត្រក្នុងបរិបទសុខាភិបាលឌីជីថលជំរុញការផ្តល់សេវាឱ្យកាន់តែមានប្រសិទ្ធភាព និងគុណភាព។នេះជាការលើកឡើងរបស់លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិកាក្រសួងសុខាភិបាលថ្លែងក្នុងពិធីបើកសម្ពោធជាផ្លូវការនៃមជ្ឈមណ្ឌលវជ្ជសាស្តសាន់រ៉ាយស៍សែនសុខកាលពីល្ងាចថ្ងៃទី២៥ខែមេសានៅផ្សារទំនើបអ៊ីអនម៉ល។
លោកស្រីបានលើកទឹកចិត្តដល់មជ្ឈមណ្ឌលសាន់រ៉ាយស៍សែនសុខ ក៏ដូចជាមន្ទីរពេទ្យ និងគ្លីនិក ឬមជ្ឈមណ្ឌលវេជ្ជសាស្ត្រឯកជននានា ដែលបានទទួលការអនុញ្ញាតឱ្យដំណើរការនៅកម្ពុជា ត្រូវបន្តការយកចិត្តទុកដាក់ឱ្យបានជាអតិបរមា រៀបចំដោយយកចិត្តទុកដាក់តាមក្បួនខ្នាតទាំងផ្នែកបច្ចេកទេស វេជ្ជសាស្ត្រ ហេដ្ឋារចនាសម្ព័ន្ធ ការបណ្ដុះបណ្ដាលធនធានការប្រើប្រាស់ប្រព័ន្ធឌីជីថល ការងារគ្រប់គ្រង និងការ ថែទាំប្រកបដោយក្រមសីលធម៌វិជ្ជាជីវៈ ត្រឹមត្រូវ ដើម្បីធានានូវការផ្តល់សេវារបស់ខ្លួននឹងទទួលបាននូវគុណភាពនិងសុវត្ថិភាព ស្របតាមស្តង់ដារអប្បបរមាសម្រាប់មូលដ្ឋានសុខាភិបាលឯកជន ដែលទើបតែត្រូវបានដាក់ ឱ្យប្រើប្រាស់នាពេលថ្មីៗនេះ ដើម្បីឆ្លើយតបទៅនឹងផែនការយុទ្ធសាស្ត្រសុខាភិបាល ២០២៣ ដល់ ២០៣០។
លោកស្រីវេជ្ជបណ្ឌិត ឱ វណ្ណឌីន បានបញ្ជាក់ថា«មូលដ្ឋានសុខាភិបាលឯកជន នៅតែជាដៃគូអភិវឌ្ឍសុខាភិបាល ដែលស្ថិតនៅក្នុងប្រព័ន្ធសុខាភិបាល ដែលតម្រូវឱ្យមានការពង្រឹងគុណភាពសេវា និងត្រូវតែផ្តល់សេវាដែលមានគុណភាព និងសុវត្ថិភាពជូនប្រជាជននៅព្រះរាជាណាចក្កម្ពុជាដោយមិនគិតពីជាតិសាសន៍ ពណ៌សម្បុរ ឬនិន្នាការនយោបាយឡើយ ទោះស្ថិតក្នុងកាលៈទេសៈណាក៏ដោយ។
ក្នុងនាមក្រសួងសុខាភិបាល លោកស្រីសង្ឃឹមថា« វត្តមានរបស់មជ្ឈមណ្ឌលវេជ្ជសាស្ត្រសាន់រ៉ាយស៍សែនសុខនាពេលនេះ និងតទៅអនាគតនឹងធ្វើឱ្យការផ្ដល់សេវាសុខាភិបាលនៅកម្ពុជាកាន់តែល្អប្រសើរឡើង និងបង្កភាពភាពងាយស្រួល មានប្រសិទ្ធភាពខ្ពស់ និងទទួលបានទំនុកចិត្តពីប្រជាជនហើយក៏នឹងអាចជួយជំរុញឱ្យវិស័យសុខាភិបាលនៅកម្ពុជាកាន់តែរីកចំរើនទៅមុខដើម្បីជាប្រយោជន៍រួមដល់ប្រទេសជាតិនិងប្រជាជនកម្ពុជា»។
លោក កាម៉ាតៈ ខយ៉ា (Kamata Keiya) ប្រធានក្រុមប្រឹក្សាភិបាល និងជានាយកប្រតិបត្តិមន្ទីរពេទ្យ សាន់រ៉ាយស៍ភ្នំពេញ បានថ្លែងថា៖មន្ទីរពេទ្យSunrise បានបើកដំណើរការនៅឆ្នាំ២០១៦ហើយឥឡូវនេះជាឆ្នាំទី៧នៃប្រតិបត្តិការរបស់ខ្លួន។នៅពេលនេះពួកយើងបានសម្រេចចិត្តបង្កើតមជ្ឈមណ្ឌលពិនិត្យសុខភាពនៅផ្សារទំនើបអ៊ីអនម៉លសែនសុខ ដើម្បីផ្តល់សេវាសុខភាពកាន់តែទំនើប ងាយស្រួល ប្រកបដោយគុណភាព និងសុវត្ថិភាព សម្រាប់ប្រជាពលរដ្ឋ។
មជ្ឈមណ្ឌលវេជ្ជសាស្ដ្រសាន់រ៉ាយស៍សែនសុខលមានសេវាកម្មដូចជា៖ផ្នែកពិនិត្យសុខភាព ផ្នែកជំងឺទូទៅ ផ្នែកថែទាំបន្ទាន់ និងវះកាត់ខ្នាតតូច ការពិនិត្យ រោគវិនិច្ឆ័យ៖ រូបភាពវេជ្ជសាស្ត្រ និងមន្ទីរពិសោធន៍ ការចាក់ថ្នាំបង្ការ ជាដើម។ចាប់តាំងពីឆ្នាំ២០១៦ មក មន្ទីរពេទ្យ Sunrise Japan Phnom Penh បានប្តេជ្ញាបម្រើប្រជាជនកម្ពុជាតាមរយៈការផ្តល់សេវាវេជ្ជសាស្ត្រលំដាប់ពិភពលោក។ ក្នុងរយៈពេល ៧ ឆ្នាំនៃប្រតិបត្តិការយើងបានផ្តល់សេវាពិនិត្យសុខភាពច្រើនជាង ២៥,០០០រៀងរាល់ឆ្នាំ។
វេជ្ជបណ្ឌិត ហុង ឆាយ នាយកគ្រប់គ្រងមជ្ឈមណ្ឌលវេជ្ជសាស្ដ្រសាន់រ៉ាយស៍សែនសុខបានមានប្រសាសន៍ថា៖បេសកកម្មរបស់យើងសម្រាប់មជ្ឈមណ្ឌលវេជ្ជសាស្ដ្រ Sunrise គឺដើម្បីធានាថាប្រជាជនកម្ពុជាទាំងអស់អាចទទួលបានសេវាវេជ្ជសាស្ដ្រល្អបំផុតត្រឹមតែមួយជំហានប៉ុណ្ណោះពីផ្ទះ។
មជ្ឈមណ្ឌលថ្មីនេះគឺជាគ្លីនិកទំនើបបំផុតដែលមានគោលបំណងពន្លឿនការផ្តល់ការពិនិត្យសុខភាពបង្ការជាមួយនឹងជម្រើសពិនិត្យសុខភាពជាច្រើន។ យើងនឹងណែនាំមនុស្សក្នុងការសម្រេចចិត្តដោយឈ្លាសវៃតាមតម្រូវការសុខភាពរបស់ពួកគេ។ការផ្តួចផ្តើមគំនិតនេះគឺដើម្បីការពារជីវិតនិងធ្វើឱ្យមានសុខភាពល្អសម្រាប់ប្រជាពលរដ្ឋម្នាក់ៗដែលរស់នៅក្នុងប្រទេសកម្ពុជា។ប្រជាជននឹងឆ្លងកាត់បទពិសោធន៍ថែទាំសុខភាព ដ៏ធំទូលាយ ជាមួយនឹងតម្លៃសមរម្យនិងបរិយាកាសប្រកបដោយផាសុកភាព។
មជ្ឈមណ្ឌលវេជ្ជសាស្ត្រ សាន់រ៉ាយ ប្តេជ្ញាផ្តល់សេវាកម្មល្អបំផុតដើម្បីបំពេញចិត្តរបស់ប្រជាពលរដ្ឋ តាមរយៈចំណុចសំខាន់ៗចំនួន ៤៖១- តម្លៃសមរម្យ,២-សេវាកម្មរហ័ស ៣-គុណភាពខ្ពស់និងទី៤- ផាសុកភាព៕