ដោយៈសិរីមតី
ភ្នំពេញ៖សមាជិក-សមាជិកា BNI Alliance នៅថ្ងៃទី២៩ខែមីនា បានរៀបចំកម្មវិធីសង្ក្រាន្ត ALLIANCEនៅរាជធានីភ្នំពេញដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរនិងក្នុងគោលបំណងដើម្បីរៃអង្គាសថវិកាជួយទ្រទ្រង់មន្ទីរពេទ្យគន្ធៈបុប្ផា ។
លោក អ៊ុំ សារ៉ាវុធ អគ្គនាយកក្រុមហ៊ុន USRV Group និងជាអតីតប្រធាន BNI Alliance បានមានប្រសាសន៍ថា៖ BNI Allianceបានរៀបចំសង្ក្រាន្តអឹឡាយអិន ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងចូលមកដល់ក្នុងពេលឆាប់ៗខាងមុខនិងសំដៅចូលរួមនិងលើកស្ទួយមរតកវប្បធម៌ជាពិសេសក្នុងគោលបំណងដើម្បីរៃអង្គាសថវិកាជួយទ្រទ្រង់មន្ទីរពេទ្យគន្ធបុប្ផា។
លោកបានបន្តថា៖កម្មវិធីសង្ក្រាន្តដែលត្រូវបានប្រារព្ធធ្វើនៅបរិវេណក្រុមហ៊ុន Ky Chan Thol Aircon នេះ ក៏បង្កើនភាពស្និទ្ធស្នាលរវាងសមាជិកBNI Alliance ព្រមទាំងបង្កើតទំនាក់ទំនងផ្ទាល់ខ្លួននិងអាជីវកម្ម ក៏ដូចជាជួយឲ្យសមាជិកទាំងអស់បានស្គាល់គ្នា ជឿជាក់លើគ្នា មានឱកាសបង្កើតអាជីវកម្មជាមួយគ្នា ។
លោក អ៊ុំ សារ៉ាវុធ ក៏បានកោតសរសើរដល់ក្រុមហ៊ុនរៀបចំកម្មវិធីផងដែរ។នេះជាសង្ក្រាន្តលើកទីមួយរបស់BNI Alliance ហើយនៅពេលអនាគតនឹងបន្តធ្វើ ជារៀងរាល់ឆ្នាំ។លោកសង្ឃឹមថាក្រោមអាណត្តិទី៥របស់លោកវេជ្ជបណ្ឌិតសយ សូឌីណា BNI Allianceនឹងទទួលបានសមាជិកកាន់តែច្រើន បង្កើតឱកាស អាជីវកម្មច្រើន ឱកាសការងារជូនដល់ប្រជាពលរដ្ឋដើម្បីចូលរួមជាមួយរាជរដ្ឋាភិបាលអភិវឌ្ឍន៍និងជំរុញសេដ្ឋកិច្ចជាតិ។
សង្ក្រាន្តអឹឡាយអ៊ិននេះ បានប្រព្រឹត្តឡើងនៅក្នុងបរិយាកាសសប្បាយរីករាយ ស្និទ្ធស្នាលនិងពិសាអាហារសាមគ្គីរួមគ្នាប្រកបដោយភាតរភាព។
រឹតតែធ្វើឱ្យកម្មវិធីកាន់តែអ៊ឹកធឹកនិងសប្បាយរីករាយនោះកម្មវិធីបានបង្កើតការរាំលេងសប្បាយតាមចង្វាក់ប្រពៃណីខ្មែរ ដូចជា រាំវង់ សារ៉ាវ៉ាន់ ឡាំលាវ កន្ទ្រឹម ជាមួយក្រុមតន្ត្រី និងតារាចម្រៀងល្បីៗ។ជាងនេះទៅទៀតមានការលេងល្បែងប្រជាប្រិយដូចជាវ៉ៃក្អម ព្រមទាំងល្បែងកម្សាន្តជាច្រើនទៀត។
ជាកិត្តិយស កម្មវិធីសង្ត្រាន្ត BNI Alliance មានការចូលរួមពីលោក ឡុកស្មីត សាមឌី ស្ថាបនិក BNI Cambodia លោកស៊ឺ សុភក្ត្រ នាយកប្រតិបត្តិ BNI ប្រចាំតំបន់PP2 ព្រមទាំងម្ចាស់អាជីវកម្មជាច្រើន៕