ដោយ៖ ប្រសិទ្ធ
ភ្នំពេញ៖ តារាចម្រៀងដែលទទួលបានប្រជាប្រិយភាពតាំងពីកុមារ ដែលមានសំឡេងស្រដៀងតារាចម្រៀង កែវ សារ៉ាត់ គឺ កំលោះតូច ធឿន បុរី បានបញ្ចេញបទថ្មីរបស់ខ្លួនយ៉ាងពីរោះរណ្តំ ដើម្បីអបអរពិធីបុណ្យចូលឆ្នាំថ្មីប្រពៃណីជាតិនាពេលខាងមុខនេះ។
ដោយមានការគាំទ្រពីមជ្ឈដ្ឋានទូទៅ ពិសេសអ្នកនិយមស្តាប់បទចម្រៀងរបស់ ធឿន បុរី មានភាពអន្ទះសាយ៉ាងខ្លាំង ចង់ដឹង ចង់ឃើញ បទចម្រៀងថ្មីរបស់តារារូបនេះ ក៏បានសំណូមពរដល់សាមីខ្លួន និងម្ចាស់ផលិតកម្មឲ្យបញ្ចេញបទចម្រៀងថ្មីៗ ដូចជាបទ “ស្តាយនាងស្រី” ដែលជាចង្វាក់កន្រ្តឹមជាដើម។ ដើម្បីធ្វើឲ្យទស្សនិកជនបាត់ឆ្ងល់ និងឆាប់ទទួលបានភាពសប្បាយរីករាយ តារាចម្រៀងវ័យក្មេងរូបនេះបានប្រាប់អ្នកគាំទ្រនៅលើបណ្តាញសង្គម Facebook ផ្ទាល់ខ្លួនថា នៅព្រឹកថ្ងៃទី ២៩ ខែមីនា ឆ្នាំ ២០២៣នេះ៖“កុំភ្លេចស្តាប់បទថ្មីរបស់ខ្ញុំបាទ “ស្តាយនាងស្រី” ដែលជាបទសំរាប់បង្កើនភាពសប្បាយរីករាយ ដល់បងប្អូននាឱកាសចូលឆ្នាំខ្មែរខាងមុខ។
ក្រោយពីបង្ហោះនៅលើបណ្តាញសង្គម Facebook បានប៉ុន្មានម៉ោងប៉ុណ្ណោះ ក៏មានអ្នកគាំទ្រជាច្រើនបានសរសើរពីសំឡេង ធឿន បុរី ដោយសរសេរថា «នៅតែអែមសំឡេង», «ពីរោះណាស់ idol ធឿន បុរី», «ចេញច្រើនៗបទមក idol» និងមានComment ជាច្រើនទៀត។ ការComment បែបនេះគឺដោយសារតែបទថ្មី “ស្តាយអូនស្រី” មិនត្រឹមតែពីរោះនោះទេ ថែមទាំងជាចង្វាក់កន្រ្តឹមដែលប្រជាជនខ្មែរចូលចិត្តទៀតផង៕