អ៊ុយក្រែនព្រួយបារម្ភថា រោងចក្រនុយក្លេអ៊ែរ Zaporizhzhia អាចប្រឈមនឹងការខ្វះទឹកសម្រាប់ម៉ាស៊ីនរ៉េអាក់ទ័រត្រជាក់នៅចុងរដូវក្តៅនេះ ដោយសារតែកងកម្លាំងរុស្ស៊ីទំនងជាបានបញ្ចេញទឹកស្ទើរអស់នឹងពីអាងស្តុក។
លោក Ihor Syrota អគ្គនាយកនៃក្រុមហ៊ុនបង្កើតវារីអគ្គិសនី Ukrhydroenergo ដែលគ្រប់គ្រងដោយរដ្ឋបានប្រាប់ទីភ្នាក់ងារព័ត៌មានរ៉យទ័រថា មិនមានគ្រោះថ្នាក់ភ្លាមៗចំពោះរោងចក្រនុយក្លេអ៊ែរដ៏ធំបំផុតរបស់អឺរ៉ុបនោះទេ។ ក៏ប៉ុន្តែកម្រិតទឹកបានធ្លាក់ចុះទាបដោយសារទាហានរុស្ស៊ីដែលគ្រប់គ្រងអាងស្តុកទឹក និងស្ថានីយវារីអគ្គិសនី Kakhovka និងទំនប់បានបញ្ចេញទឹកចេញតាមទ្វារទំនប់អស់ក្នុងបរិមាណជាច្រើន។
Syrota បាននិយាយនៅក្នុងបទសម្ភាសន៍មួយថា “បញ្ហាមួយជាមួយនឹងកង្វះខាតទឹកសម្រាប់ធ្វើឲ្យម៉ាស៊ីនត្រជាក់អាចកើតឡើងនៅរដូវក្តៅ ឬចុងរដូវក្តៅនេះ”។ កម្រិតអាងស្តុកទឹកអាចត្រូវបានបង្ហូរយ៉ាងហោចណាស់ច្រើនថ្ងៃ ប្រសិនបើទ្វារទឹកទាំងអស់ត្រូវបានបើក។ “ខ្ញុំសង្ឃឹមថាយើងមិនចូលទៅក្នុងស្ថានភាពនោះទេ។ ខ្ញុំសង្ឃឹមថា យើងនឹងដកការកាន់កាប់បានលឿនជាងនេះ”។
មិនមានការបញ្ជាក់ពីផលប៉ះពាល់ភ្លាមៗឡើយ តែបរិមាណទឹកក្នុងអាងស្តុកគឺសំខាន់ណាស់ដើម្បីបញ្ជូនកម្ដៅចេញពីស្នូលរ៉េអាក់ទ័រទៅកាន់ទួរប៊ីន។ ទឹកនឹងធ្វើឲ្យមានមុខងារត្រជាក់ដល់ម៉ាស៊ីនរ៉េអាក់ទ័រដោយផ្ទាល់ ឬដោយប្រយោល ត្រជាក់ស្ងួត។ វាត្រូវការបរិមាណទឹកបម្រុងប្រមាណចន្លោះពី២៥០០០ ទៅ ៦០០០០ ហ្កាឡុងនៃទឹកក្នុង ១ មេហ្គាវ៉ាត់ម៉ោងនៃអគ្គិសនី។ ហើយនៅពេលផ្លាស់ប្តូរដំណើរត្រជាក់ម្តងៗត្រូវការទឹកប្រហែល ៨០០ ទៅ ២៦០០ ហ្កាឡុង៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា