ភ្នំពេញ៖អគ្គិភ័យបានឆាបឆេះផ្ទះប្រជាពលរដ្ឋចំនួន២ខ្នងផ្ទះ រួមទាំងទ្រព្យសម្បត្តិអស់ជាច្រើនស្ថិតនៅ ភូមិភា សង្កាត់ប្រទះឡាង ខណ្ឌកំបូល កាលពីព្រឹកថ្ងៃទី២៤ ខែមីនា។
អាជ្ញាធរមូលដ្ឋានបានឱ្យដឹងថា កាលពីម៉ោង៩ព្រឹក ថ្ងៃទី២៤ ខែមីនានេះ ភ្លើងបានឆាបឆេះផ្ទះ ចំនួន២ខ្នងផ្ទះយ៉ាងសន្ធោសន្ធៅ ត្រូវបានក្រុមរថយន្តពន្លត់អគ្គិភ័យមកជួយអន្តរាគមន៍បាញ់ទឹកពន្លត់។ម្ចាស់ឈ្មោះ ហេង វី អាយុ៤១ឆ្នាំ អ្នកលក់ដូរ ផ្ទះទំហំ៦ម៉ែត្រគុណ៨ម៉ែត្រឈើលើថ្មក្រោម។ម្ចាស់ម្នាក់ទៀតឈ្មោះ ឆន វែង អាយុ៥២ឆ្នាំ ផ្ទះទំហំម៉ែត្រគុណ៨ម៉ែត្រឈើលើថ្មក្រោម។ផ្ទះចំនួន២នេះត្រូវភ្លើងឆេះអស់ទាំងស្រុងនិងទ្រព្យសម្បតិ្តជាច្រើន។
មន្ត្រីដដែលបានបន្តថា មូលហេតុកើតមានអគ្គិភ័យនេះបណ្តាលមកពីឆ្លងចរន្តអគ្គិសនី ចេញពីផ្ទះឈ្មោះហេង វី បង្កជាភ្លើងឆាបឆេះយ៉ាងសន្ធោសន្ធៅ ហើយក៏បានរាលដាលដល់ផ្ទះមួយខ្នងទៀតដែលនៅជាប់គ្នា។ពេលភ្លើងកំពុងឆេះ សមត្ថកិច្ចជំនាញបានចេញរថយន្តជិត១០គ្រឿងមកជួយអន្តរាគមន៍បាញ់ទឹកពន្លត់។ប៉ុន្តែក្នុងហេតុការណ៍នេះមិនបង្កឱ្យមានគ្រោះថ្នាក់ដល់មនុស្សទេ។រីឯទំហំនៃការខូចខាតមន្ត្រីមូលដ្ឋានកំពុងសាកសួរ៕ដោយ៖វិចិត្រ
