ចិននិយាយថា បានព្រមាននាវាចម្បាំងសហរដ្ឋអាម៉េរិកឲ្យចាកចេញពីដែនទឹកសមុទ្រចិនខាងត្បូង កាលពីថ្ងៃព្រហស្បតិ៍ បន្ទាប់ពីនាវាអាម៉េរិកបានបើកឆ្លងចូលដោយខុសច្បាប់។

នៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ ទី​២៣ ខែមីនា ឆ្នាំ២០២៣ អ្នកនាំពាក្យរបស់បញ្ជាការរោងមហោស្រពភាគខាងត្បូង Tian Junli នៃកងទ័ពរំដោះប្រជាជនចិន (PLA) បាននិយាយថា USS Milius ដែលជានាវាពិឃាតដឹកនាំកាំជ្រួចអាម៉េរិក បានឈ្លានពានចូលទៅក្នុងដែនទឹកជុំវិញប្រជុំកោះ Paracel ដែលមានជម្លោះ។ កងទ័ពរំដោះប្រជាជនPLA “បានរៀបចំកងកម្លាំងសមុទ្រ និងអាកាសដើម្បីតាមដាន និងត្រួតពិនិត្យនាវានោះដោយស្របតាមច្បាប់” និង “បានព្រមានឱ្យចាកចេញ”។ ប្រព័ន្ធ​ផ្សព្វផ្សាយ​រដ្ឋ​របស់​ប្រទេស​ចិន​បាន​ពណ៌នា​កប៉ាល់​អាម៉េរិក​ថា​បាន​រំលោភ​បំពាន​ក្នុង​ “ដែន​ទឹក​របស់​ចិន”។ កប៉ាល់អាម៉េរិក “បានធ្វើការលុកលុយខុសច្បាប់ចូលទៅក្នុងដែនទឹករបស់ចិន… ដោយគ្មានការអនុញ្ញាតពីរដ្ឋាភិបាលចិន ដែលធ្វើឲ្យប៉ះពាល់ដល់សន្តិភាព និងស្ថិរភាពនៅក្នុងតំបន់”។

កងទ័ពជើងទឹកអាម៉េរិកកាលពីថ្ងៃព្រហស្បតិ៍បានជំទាស់នឹងសេចក្តីថ្លែងការណ៍របស់ PLA ភ្លាមៗដោយនិយាយថា នាវាពិឃាតរបស់ខ្លួនកំពុងធ្វើ “ប្រតិបត្តិការធម្មតា” នៅក្នុងសមុទ្រចិនខាងត្បូង ហើយមិនត្រូវបានបណ្តេញចេញដោយនាវាចិនទេ។ សេចក្តីថ្លែងការណ៍របស់កងនាវាចរទី ៧ របស់សហរដ្ឋអាម៉េរិកបាននិយាយថា “សហរដ្ឋអាម៉េរិកនឹងបន្តហោះហើរ បើកកាត់ និងប្រតិបត្តិការគ្រប់ទីកន្លែងដែលច្បាប់អន្តរជាតិអនុញ្ញាត”។

យ៉ាងណាចំពោះហេតុការណ៍នេះ មិនមានសេចក្តីរាយការណ៍ពីការប៉ះទង្គិចពីភាគីសងខាងនោះទេ៕ប្រភព៖REUTERS

ប្រភពរូប៖REUTERS
ប្រែសម្រួល៖សុខ តុលា