ព្យុះខ្សាច់វាយប្រហារភាគខាងជើង និងពាយ័ព្យប្រទេសចិន បង្កជាធូលីលាយឡំជាមួយខ្យល់ពុល ធ្វើឲ្យទិដ្ឋភាពទីក្រុងអួអាប់ឡើងព៌ណទឹកក្រូច ប្រឈមហានិភ័យគ្រោះថ្នាក់សម្រាប់អ្នកបើកបរ។
សេវាអាកាសធាតុចិនកាលពីថ្ងៃពុធសប្តាហ៍នេះ បានចេញការព្រមានកម្រិតពណ៌លឿងសម្រាប់ធូលីនៅទូទាំងតំបន់ភាគខាងជើង និងភាគពាយ័ព្យរយៈពេល ២៤ ម៉ោង។ រដ្ឋធានីប៉េកាំងក៏ត្រូវបានចេញការព្រមានអំពីព្យុះខ្សាច់ក្នុងកម្រិតពណ៌លឿងផង ដែរ។ ក្នុងរយៈពេលប៉ុន្មានថ្ងៃកន្លងមកនេះ ទីក្រុងនេះបានជួបប្រទះនឹងព្យុះខ្សាច់ និងធូលី ដែលធ្វើឲ្យកម្រិតបំពុលកាន់តែកើនឡើងយ៉ាងខ្លាំង។ ទីក្រុងប៉េកាំងបានកត់ត្រាសន្ទស្សន៍គុណភាពខ្យល់នៅចំណុច ៥០០ កម្រិតបំពុលនៅត្រឹមកម្រិត ៦ ដែលត្រូវបានគេចាត់ទុកថាមានគ្រោះថ្នាក់ខ្លាំងបំផុតដល់សុខភាពប្រព័ន្ធដង្ហើមមនុស្ស។ នេះបើតាមមជ្ឈមណ្ឌលតាមដានបរិស្ថានអេកូឡូស៊ីក្រុងប៉េកាំង។
សេវាកម្មអាកាសធាតុបាននិយាយថា ប្រជាជននៅតំបន់ដែលរងផលប៉ះពាល់ត្រូវបានណែនាំឱ្យពាក់ម៉ាស់រាល់ពេលចេញក្រៅ ប្រុងប្រយ័ត្ន រក្សាខ្លួននៅក្នុងផ្ទះដើម្បីការពារប្រឆាំងនឹងខ្យល់ និងខ្សាច់ បិទទ្វារ និងបង្អួចឱ្យបានទាន់ពេលវេលា ពិសេសត្រូវបើកបរដោយមានការប្រុងប្រយ័ត្នជាទីបំផុត៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា