ចារកម្មចក្រភពអង់គ្លេសនិយាយថា រុស្ស៊ីអាចនឹងបាត់បង់សន្ទុះនៅក្នុងទីក្រុងបាក់មុតខេត្តដូណេត វាយអ៊ុយក្រែនមិនបែកទៅមុខទៀតឡើយ ខណៈកងកម្លាំងអ៊ុយក្រែនក៏ហាក់ងើបសន្ទុះឡើងវិញ។
ចារកម្មយោធានៃក្រសួងការពារជាតិអង់គ្លេស បាននិយាយក្នុងព្រឹត្តិបត្រព័ត៌មានចុងក្រោយថ្ងៃពុធទី ២២ ខែមីនាថា លទ្ធភាពនៃការវាយលុករបស់រុស្ស៊ីមកលើទីក្រុង Bakhmut របស់អ៊ុយក្រែនហាក់កំពុងបាត់បង់សន្ទុះពីកម្រិតខ្ពស់ដែលខ្លួនធ្លាប់ទទួល បាន។ នេះអាចកើតឡើងដោយសារតែ “អង្គភាពនៃក្រសួងការពារជាតិរបស់រុស្ស៊ីមួយចំនួន ត្រូវបានបញ្ជាឲ្យផ្លាស់ប្តូរទីតាំងទៅផ្នែកផ្សេងទៀត”។ ការវាយតម្លៃកើតឡើងក្រោយគ្នា បន្ទាប់ពីកងកម្លាំងអ៊ុយក្រែនកាលពីថ្ងៃអង្គារត្រូវបានគេដឹងថាបានវាយលុកបករុស្ស៊ីវិញយ៉ាងចាស់ដៃ ដើម្បីរំដោះយកផ្នែកកណ្តាលនៃទីក្រុង Bakhmut ភាគខាងកើតមកវិញ។ កងទ័ពអ៊ុយក្រែនហាក់រីកសន្ទុះមកវិញ ដោយមានការគាំទ្រផ្នែកអាវុធពីសម្ព័ន្ធមិត្ត អ៊ុយក្រែនបានប្រើប្រព័ន្ធកាំជ្រួចប្រឆាំងរថក្រោះ Stugna នៅ Bakhmut ទប់ទល់ជាមួយរុស្ស៊ី។
រុស្ស៊ីមិនបានធ្វើការឆ្លើយតបនឹងការអះអាងនេះទេ ហើយរុស្ស៊ីក៏មិនទាន់បានអះអាងពីភាពរីកចម្រើនថ្មីណាមួយបន្ថែមទៀតនៅបាក់មុតដែរ។ របាយការណ៍ទាហានស៊ីឈ្នួលរុស្ស៊ីរបស់លោកPrigozhin បាននិយាយចុងក្រោយថា បានដណ្តើមកាន់កាប់៧០ភាគរយនៃបាក់មុត ក្រៅពីនោះវាយមិនទាន់បែកទេ ខណៈអ៊ុយក្រែនបានបញ្ជូនកម្លាំងបម្រុងមកជាហូរហែ៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា