សហរដ្ឋអាម៉េរិកនឹងបញ្ជូនកំពូលរថក្រោះ Abrams ទៅអ៊ុយក្រែននៅរដូវស្លឹកឈើជ្រុះខាងមុខនេះ ខណៈដែលប្រព័ន្ធមីស៊ីលការពារដែនអាកាស Patriot ក៏នឹងទៅដល់តាមក្រោយតាមពេលវេលាកំណត់ផងដែរ។
នេះបើតាមការជូនដំណឹងផ្ទាល់ដោយមន្ទីរបញ្ចកោណកាលពីថ្ងៃអង្គារទី ២១ ខែមីនា ឆ្នាំ២០២៣។ ឧត្តមសេនីយ៍ទោ Pat Ryder បានប្រាប់អ្នកសារព័ត៌មានថា នៅក្នុងការសម្របសម្រួលជាមួយទីក្រុង Kyiv ទីក្រុងវ៉ាស៊ីនតោន “បានធ្វើការសម្រេចចិត្តក្នុងការ ផ្តល់នូវរថក្រោះ M1A1 Abrams” ដែលមាននៅក្នុងឃ្លាំងអាវុធរបស់ខ្លួនបច្ចុប្បន្ន មិនចាំនូវផលិតថ្មីទេដើម្បីកុំឲ្យយូរ។ លោក Ryder ថា “នេះនឹងអាចឱ្យយើងពន្លឿនពេលវេលាចែកចាយយ៉ាងសំខាន់ និងផ្តល់នូវសមត្ថភាពដ៏សំខាន់នេះដល់អ៊ុយក្រែននៅរដូវស្លឹកឈើជ្រុះឆ្នាំនេះ”។
លោក Ryder បានបន្ថែមថា “យើងមានទំនុកចិត្ត យើងក៏នឹងអាចបញ្ជូន Patriots ទៅ ទីនោះតាមពេលវេលាកំណត់ដ៏ឆាប់រហ័សផងដែរ”។ចំពោះបញ្ហានៃការបណ្តុះបណ្តាលសម្រាប់ជនជាតិអ៊ុយក្រែនលើប្រព័ន្ធទាំងអស់នេះ លោក Ryderថាមិនមានការព្រួយបារម្ភអ្វីឡើយ ព្រោះយោធាអាម៉េរិកមានតិចនិកក្នុងការបង្ហាត់បង្រៀន។ គួរជម្រាបថា រដូវស្លឹកឈើជ្រុះនៅអាម៉េរិកជាធម្មតានឹងមកដល់នៅអំឡុងខែកញ្ញា មុនពេលដែលរដូវរងាចូលមកដល់៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា