ប្រធានាធិបតីអ៊ុយក្រែនលោកហ្សេឡិនស្គី បានថ្លែងអំណរគុណដល់សហភាពអឺរ៉ុបសម្រាប់កិច្ចព្រមព្រៀងជំនួយជាង២ពាន់លានដុល្លារសម្រាប់ផលិតគ្រាប់រំសេវទុកសម្រាប់ឆ្នាំក្រោយ។
នៅលើបណ្តាញសារ Telegram កាលពីថ្ងៃអង្គារទី ២១ ខែមីនា ឆ្នាំ២០២៣ ប្រធានាធិបតីអ៊ុយក្រែន លោក Volodymyr Zelenskyy បានសរសេរថា “ដៃគូអឺរ៉ុបរបស់យើងបានយល់ព្រមលើផែនការរួមមួយ ដើម្បីពន្លឿនការផ្គត់ផ្គង់គ្រាប់ផ្លោងសម្រាប់កាំភ្លើងធំរបស់យើង”។ ការសម្រេចចិត្តនេះមានតម្លៃប្រមាណពីរពាន់លានអឺរ៉ូ ស្មើនឹងជាង ២ពាន់លានដុល្លារអាម៉េរិក។ វាផ្តល់ទាំងការផ្គត់ផ្គង់សង្គ្រោះបន្ទាន់ និងការផលិតគ្រាប់រំសេវ”។ “នេះគឺជាជំហានយុទ្ធសាស្ត្រ។ វាផ្តល់ឱ្យយើងនូវទំនុកចិត្តលើការរួបរួមរបស់យើងនៅក្នុងភាពមិនអាចប្រែប្រួលនៃចលនាឆ្ពោះទៅរកជ័យជម្នះលើរដ្ឋភេរវករ”។
សម្រង់សារ “ខ្ញុំសូមអរគុណដល់ដៃគូរបស់យើងទាំងអស់នៅអឺរ៉ុប! សម្រាប់អ្នករាល់គ្នាដែលមានចំណាប់អារម្មណ៍យ៉ាងពិតប្រាកដក្នុងការធ្វើឱ្យអឺរ៉ុបរឹងមាំ និងមានសេរីភាព”។ បន្ថែមពីនេះZelenskyy ក៏បានថ្លែងអំណរគុណដល់សហរដ្ឋអាម៉េរិកសម្រាប់ការប្រកាសកញ្ចប់ជំនួយយោធាថ្មីដែលមានតម្លៃ ៣៥០ លានដុល្លារនៅសប្តាហ៍នេះផងដែរ៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
