បន្ទាយមានជ័យ៖កម្លាំងអាវុធហត្ថខេត្ត ព្រឹកថ្ងៃទី២២ ខែមីនានេះបានបញ្ជូនជនជាតិថៃ៣នាក់ ករណីប្រើកាំបិតប៉័ងតោកាប់បុរសចិន២នាក់ឱ្យរងរបួស ត្រូវបានបញ្ជូនទៅតុលាការ។
សមត្ថកិច្ចបានឱ្យដឹងថា កាលពីរសៀលថ្ងៃទី២០ ខែមីនាកន្លងទៅ អាវុធហត្ថក្រុងប៉ោយប៉ែតបានចាប់ជនជាតិថៃ៣នាក់ តាមបណ្តឹងរបស់បុរសចិន២នាក់ ករណីប្រើកាំបិតប៉័ងតោកាប់លើជនរងគ្រោះ បណ្តាលឱ្យរូបគេ២នាក់រងរបួស។ក្រុមជនសង្ស័យបានប្រព្រឹត្តនៅមុខវត្តផ្សារកណ្តាល ក្នុងសង្កាត់ផ្សារកណ្តាល ក្រុងប៉ោយប៉ែត។
មន្តី្រដដែលបានបន្តថា ជនបង្កជាតិថៃ៣នាក់ បានមកស្នាក់នៅបណ្តោះអាសន្នក្នុងភូមិផ្សារកណ្តាល ក្រុងប៉ោយប៉ែត។ចំណែកបុរសចិន២នាក់ បានរបួសជាច្រើនកន្លែងដោយរងការកាប់ប្រហារពីជនសង្ស័យទាំង៣នាក់ខាងលើ។ក្រោយពីទទួលបណ្តឹង កម្លាំងជំនាញបានចុះឃាត់ខ្លួនជនដៃដល់ ជាមួយវត្ថុតាងកាំបិតប៉័ងតោយកទៅសាកសួរ។
ក្រុមនេះបានសារភាពថា ពួកខ្លួនបានកាប់ទៅលើបុរសចិន២នាក់នោះពិតប្រាកដមែន។ដោយមានចម្លើយសារភាពជាមួយវត្ថុតាងជាក់ស្កែង អាវុធហត្ថក្រុងប៉ោយប៉ែតបានកសាងសំណុំរឿងនាំជនសង្ស័យទៅអាវុធហត្ថខេត្តដើម្បីបញ្ជូនបន្តតាមនីតិវិធី៕ដោយ៖វិចិត្រ
